قازاقستان پرەزيدەنتى نۇرسۇلتان نازارباەۆتىڭ اتىنا مەملەكەت, ۇكىمەت باسشىلارىنان, حالىقارالىق ۇيىمداردىڭ جەتەكشىلەرىنەن سايلاۋداعى جەڭىسىنە بايلانىستى قۇتتىقتاۋلار ءالى دە كەلىپ جاتىر
جاپونيا پرەمەر-ءمينيسترى سيندزو ابە نۇرسۇلتان نازارباەۆتى پرەزيدەنتتىك سايلاۋداعى ايقىن جەڭىسىمەن قۇتتىقتادى, دەپ حابارلادى پرەزيدەنتتىڭ ءباسپاسوز قىزمەتى. «قازاقستان مەن جاپونيا اراسىنداعى قارىم-قاتىناستار ساياسي عانا ەمەس, الەۋمەتتىك-ەكونوميكالىق سالادا دا دامىپ, بۇل ورايداعى ىنتىماقتاستىق جاڭا ساتىعا كوتەرىلدى. سونىمەن قاتار, ءبىز حالىقارالىق قوعامداستىق اياسىندا يادرولىق قارۋسىزدانۋ ماسەلەسىنە بايلانىستى ءبىر-ءبىرىمىزدى قولدايمىز. مەملەكەتتەرىمىزدى جاقىنداستىرۋ ماقساتىندا ىنتىماقتاستىقتى ودان ءارى جانداندىرىپ, قازاقستان مەن جاپونيانىڭ ەكىجاقتى قاتىناستارىن دامىتۋعا نيەتتى ەكەنىمدى بىلدىرەمىن», – دەلىنگەن قۇتتىقتاۋدا. سوڭىندا س.ابە مەملەكەت باسشىسىنا باقىت پەن تابىس, ال قازاقستان حالقىنا باق-بەرەكە تىلەدى. * * * كورەيا رەسپۋبليكاسىنىڭ پرەزيدەنتى پاك كىن حە نۇرسۇلتان نازارباەۆتى پرەزيدەنتتىك سايلاۋداعى جەڭىسىمەن قۇتتىقتادى, دەپ حابارلادى پرەزيدەنتتىڭ ءباسپاسوز قىزمەتى. «مەن ءسىزدىڭ مەملەكەت باسشىسى لاۋازىمىندا بولعان كەزىڭىزدە قازاقستان رەسپۋبليكاسى ءوز دامۋى مەن وركەندەۋىن جالعاستىراتىنىنا, ال ەلدەرىمىزدىڭ اراسىنداعى ستراتەگيالىق سەرىكتەستىك ودان ءارى نىعايا بەرەتىنىنە سەنىمدىمىن. ءبىزدىڭ ەلدەرىمىزدىڭ ەكىجاقتى قارىم-قاتىناستارىن دامىتۋعا مۇددەلىلىك تانىتقانىڭىز ءۇشىن العىسىمدى قابىل الىڭىز», – دەلىنگەن جەدەلحاتتا. كورەيا پرەزيدەنتى مەملەكەت باسشىسىنا مىقتى دەنساۋلىق پەن باقىت, ال قازاقستان حالقىنا باق-بەرەكە تىلەدى. * * * يسپانيا كورولى VI فەليپە نۇرسۇلتان نازارباەۆتى پرەزيدەنتتىك سايلاۋداعى جەڭىسىمەن قۇتتىقتادى, دەپ حابارلادى پرەزيدەنتتىڭ ءباسپاسوز قىزمەتى. ول قازاقستان پرەزيدەنتىنىڭ ەكى ەلدىڭ اراسىنداعى قارىم-قاتىناستاردى ودان ءارى دامىتۋ جانە نىعايتۋ ءۇشىن بيىك ماقساتتاردى ورىنداۋ جولىنداعى قىزمەتىنە تابىس تىلەدى. * * * ەلباسى نۇرسۇلتان نازارباەۆ باحرەين كورولى شەيح حاماد بەن يسا ءال حاليفامەن تەلەفون ارقىلى سويلەستى, دەپ حابارلادى پرەزيدەنتتىڭ ءباسپاسوز قىزمەتى. باحرەين بيلەۋشىسى نۇرسۇلتان نازارباەۆتى پرەزيدەنتتىك سايلاۋداعى ايقىن جەڭىسىمەن جانە مەملەكەت باسشىسى لاۋازىمىنا كىرىسۋىمەن قۇتتىقتاپ, بۇل قازاقستان حالقىنىڭ جوعارى سەنىمى مەن قولداۋىنىڭ ايقىن ايعاعى ەكەنىن اتاپ ءوتتى. شەيح حاماد بەن يسا ءال حاليفا سەنىمدى ديالوگتى جانە ەكىجاقتى ىنتىماقتاستىقتىڭ بارلىق ماسەلەلەرى بويىنشا بىرلەسكەن جۇمىستى جالعاستىرۋعا دايىن ەكەنىن ايتتى. اڭگىمە بارىسىندا ەكى مەملەكەتتىڭ كوشباسشىلارى قازاقستان-باحرەين ىنتىماقتاستىعىنىڭ باسىمدىعى بار باعىتتارىن تالقىلادى, سونداي-اق, ساۋدا-ەكونوميكالىق جانە ينۆەستيتسيالىق سالالارداعى ىقپالداستىقتى جانداندىرۋ جولدارىن بەلگىلەدى. تەلەفون ارقىلى سويلەسۋگە باحرەين جاعى باستاماشىلىق ەتتى. * * * مەملەكەت باسشىسى نۇرسۇلتان نازارباەۆ تۇركيانىڭ ەكس-پرەزيدەنتى ابدۋللا گۇلمەن تەلەفون ارقىلى سويلەستى, دەپ حابارلادى پرەزيدەنتتىڭ ءباسپاسوز قىزمەتى. ا.گۇل نۇرسۇلتان نازارباەۆتى پرەزيدەنتتىك سايلاۋداعى تاريحي جەڭىسىمەن جانە قازاقستان پرەزيدەنتى لاۋازىمىنا رەسمي كىرىسۋىمەن قۇتتىقتادى. مەملەكەت باسشىسى تۇرىك ساياساتكەرىنىڭ ەكى ەلدىڭ باۋىرلاستىق بايلانىستارىن نىعايتۋعا قوسقان ۇلەسىن جوعارى باعالادى. ا.گۇل نۇرسۇلتان نازارباەۆتىڭ قازاقستان-تۇركيا ستراتەگيالىق سەرىكتەستىگىن ودان ءارى تەرەڭدەتۋگە ۇمتىلىسىن تولىق قۇپتايتىنىن ايتتى. سوڭىندا تۇركيانىڭ ەكس-پرەزيدەنتى ەلباسىنىڭ ەل دامۋىنىڭ جاڭا كەزەڭىندەگى ستراتەگيالىق مىندەتتەردى تابىستى جۇزەگە اسىرۋىنا تىلەكتەستىك ءبىلدىردى. * * * اۆستريا رەسپۋبليكاسىنىڭ فەدەرالدىق پرەزيدەنتى حاينتس فيشەر نۇرسۇلتان نازارباەۆتى پرەزيدەنتتىك سايلاۋداعى ايقىن جەڭىسىمەن قۇتتىقتاپ, جاۋاپتى مەملەكەتتىك قىزمەتىنە تابىس تىلەدى, دەپ حابارلادى پرەزيدەنتتىڭ ءباسپاسوز قىزمەتى. «قازاقستاننىڭ ەلدەگى ەكونوميكالىق جانە ساياسي تۇراقتىلىقتى قامتاماسىز ەتە وتىرىپ, دەموكراتيالىق رەفورمالاردى دا جۇزەگە اسىرۋدى جالعاستىرۋىن تىلەيمىن», – دەلىنگەن جەدەلحاتتا. اۆستريا فەدەرالدىق پرەزيدەنتى مەملەكەت باسشىسىنا مىقتى دەنساۋلىق, ال قازاقستان حالقىنا باق-بەرەكە تىلەدى. * * * كۋۆەيت مەملەكەتىنىڭ ءامىرى ساباح ءال-احماد ءال-دجابير ءاس-ساباح نۇرسۇلتان نازارباەۆتى پرەزيدەنتتىك سايلاۋداعى جەڭىسىمەن شىن جۇرەكتەن قۇتتىقتادى, دەپ حابارلادى پرەزيدەنتتىڭ ءباسپاسوز قىزمەتى. ساباح ءال-احماد ءال-دجابير ءاس-ساباح ەكى ەل قارىم-قاتىناستارىنىڭ دامۋ قارقىنى جاقسى ەكەنىن ايتا كەلە, ءتۇرلى سالالارداعى ىنتىماقتاستىقتى كەڭەيتۋ ەكى مەملەكەتتىڭ دە مۇددەسىنە ساي ەكەنىن اتاپ ءوتتى. كۋۆەيت ءامىرى نۇرسۇلتان نازارباەۆقا مىقتى دەنساۋلىق پەن اماندىق, ال قازاقستان حالقىنا باق-بەرەكە تىلەدى. * * * ۆەتنام پرەزيدەنتى چىونگ تان شانگ نۇرسۇلتان نازارباەۆتى پرەزيدەنتتىك سايلاۋداعى جەڭىسىمەن قۇتتىقتادى, دەپ حابارلادى پرەزيدەنتتىڭ ءباسپاسوز قىزمەتى. «ءسىزدىڭ باسشىلىعىڭىزبەن «نۇرلى جول» ساياساتى تاياۋ ارادا جاڭا تابىستار اكەلەتىنىنە, ال قازاقستان ەلدى قالىپتاستىرۋ جانە دامىتۋ ىسىندەگى جەتىستىكتەرىن جالعاستىراتىنىنا نىق سەنىمدىمىن», – دەلىنگەن جەدەلحاتتا. ۆەتنام پرەزيدەنتى ەكى ەلدىڭ باسشىلارى مەن حالقىنىڭ كۇش-جىگەرىنىڭ ارقاسىندا مەملەكەتتەر اراسىنداعى ءوزارا قارىم-قاتىناس الداعى ۋاقىتتا دا قارقىندى ءارى ءتيىمدى دامي بەرەتىنىنە سەنىم بىلدىرگەن. «قازاقستان مەن ۆەتنام اراسىنداعى ءداستۇرلى دوستىق قاتىناستار مەن كوپجاقتى ىنتىماقتاستىق كۇننەن كۇنگە دامىپ كەلە جاتقانىن قاناعاتتانۋشىلىقپەن اتاپ وتەمىن. ءسىزدىڭ – ۆەتنامعا, مەنىڭ قازاقستانعا ساپارىمنان كەيىن قارىم-قاتىناستار بۇرىنعىدان دا نىعايا ءتۇستى جانە قازىر ىنتىماقتاستىق تۋرالى بىرقاتار ماڭىزدى كەلىسىمدەر ەكى ەلدىڭ يگىلىگى ءۇشىن ءتيىمدى جۇزەگە اسىرىلۋدا», – دەلىنگەن قۇتتىقتاۋدا. سوڭىندا چ.ت.شانگ نۇرسۇلتان نازارباەۆقا مىقتى دەنساۋلىق جانە جاۋاپتى لاۋازىمداعى قىزمەتىنە زور تابىس تىلەدى. * * * حورۆاتيا پرەزيدەنتى كوليندا گرابار-كيتاروۆيچ حورۆات حالقىنىڭ جانە جەكە ءوزىنىڭ اتىنان نۇرسۇلتان نازارباەۆتى پرەزيدەنتتىك سايلاۋداعى ايقىن جەڭىسىمەن قۇتتىقتادى, دەپ حابارلادى پرەزيدەنتتىڭ ءباسپاسوز قىزمەتى. «ءبىز بىرلەسكەن كۇش-جىگەر ارقىلى ەلدەرىمىزدىڭ دوستىق قاتىناستارىن بۇدان ءارى دە نىعايتىپ, دامىتا بەرەتىنىمىزگە سەنىمدىمىن», – دەلىنگەن جەدەلحاتتا. * * * ليتۆا رەسپۋبليكاسىنىڭ پرەزيدەنتى دالي گريباۋسكايتە نۇرسۇلتان نازارباەۆتى پرەزيدەنتتىك سايلاۋداعى جەڭىسىمەن قۇتتىقتاپ, مىقتى دەنساۋلىق, سارقىلماس كۇش-قۋات جانە تابىس تىلەدى, دەپ حابارلادى پرەزيدەنتتىڭ ءباسپاسوز قىزمەتى. «ليتۆا مەن قازاقستان اراسىنداعى دوستىق قاتىناس, سونداي-اق, ەلدەرىمىزدىڭ وڭ باستامالارى ەكىجاقتى ىنتىماقتاستىقتى قارقىندى دامىتۋعا مۇمكىندىك بەرەدى. ءبىز تاياۋ بولاشاقتا ساۋدا, كولىك, مادەنيەت جانە عىلىم سالالارىنداعى ءوزارا ءتيىمدى جوبالاردى جانداندىرامىز دەپ ۇمىتتەنەمىن. ءبىزدىڭ بىرلەسكەن كۇش-جىگەرىمىز ەلدەرىمىزدىڭ يگىلىگىنە جۇمسالاتىن بولادى», – دەلىنگەن قۇتتىقتاۋدا. ليتۆا پرەزيدەنتى, سونداي-اق, نۇرسۇلتان نازارباەۆتى جانە بارشا قازاقستان حالقىن قازاق حاندىعىنىڭ 550 جىلدىعى, كونستيتۋتسيانىڭ, قازاقستان حالقى اسسامبلەياسىنىڭ 20 جىلدىعى مەرەكەلەرىمەن قۇتتىقتاپ, رەسپۋبليكامىزعا باق-بەرەكە تىلەدى. د.گريباۋسكايتە قازاقستان پرەزيدەنتىن ليتۆاعا ساپارلاپ كەلۋگە شاقىردى جانە ول ساپار ەلدەرىمىزدىڭ اراسىنداعى ىنتىماقتاستىقتى ەكىجاقتى دەڭگەيدە جانە ەۋروپالىق وداقپەن قارىم-قاتىناس اياسىندا ودان ءارى نىعايتۋدىڭ جاڭا مۇمكىندىكتەرىن جان-جاقتى تالقىلاۋعا جاعداي تۋعىزاتىنىنا سەنىم بىلدىرگەن. * * * چەرنوگوريا پرەزيدەنتى فيليپپ ۆۋيانوۆيچ نۇرسۇلتان نازارباەۆتى پرەزيدەنتتىك سايلاۋداعى جەڭىسىمەن قۇتتىقتادى, دەپ حابارلادى پرەزيدەنتتىڭ ءباسپاسوز قىزمەتى. چەرنوگوريا پرەزيدەنتى ەكى ەل قارىم-قاتىناسىنىڭ اياسى بىرتىندەپ كەڭەيىپ, دوستىق بايلانىستاردىڭ نىعايىپ كەلە جاتقانىن اتاپ وتكەن. «ەلدەرىمىز اراسىنداعى ەكىجاقتى جانە كوپجاقتى ىنتىماقتاستىق جاندانا تۇسەدى دەپ ۇمىتتەنەمىن, سونداي-اق, ورتاق ءىس-قيمىل اياسىن كەڭەيتۋگە باعىتتالعان باستامالاردى قولدايتىنىمدى بىلدىرەمىن», – دەلىنگەن قۇتتىقتاۋدا. سوڭىندا ف.ۆۋيانوۆيچ قازاقستان پرەزيدەنتىنە مىقتى دەنساۋلىق جانە تابىس تىلەدى. * * * نۇرسۇلتان نازارباەۆتىڭ قازاقستان رەسپۋبليكاسى پرەزيدەنتى بولىپ سايلانۋىنا بايلانىستى لاوس حالىقتىق-دەموكراتيالىق رەسپۋبليكاسى پرەزيدەنتى تيۋممالي ساينياسوننان قۇتتىقتاۋ جەدەلحاتى كەلىپ ءتۇستى, دەپ حابارلادى پرەزيدەنتتىڭ ءباسپاسوز قىزمەتى. ت.ساينياسون نۇرسۇلتان نازارباەۆتى پرەزيدەنتتىك سايلاۋداعى جەڭىسىمەن شىن جۇرەكتەن قۇتتىقتادى. «لاوس پەن قازاقستان اراسىنداعى دوستىق قارىم-قاتىناس جانە ىنتىماقتاستىق ءسىزدىڭ باسشىلىعىڭىزبەن حالىقتارىمىزدىڭ يگىلىگىنە, سونداي-اق بەيبىتشىلىكتى, تۇراقتىلىقتى, حالىقارالىق ءوزارا ءىس-قيمىلدى قامتاماسىز ەتۋگە باعىتتالادى دەپ ۇمىتتەنەمىن», – دەلىنگەن قۇتتىقتاۋدا. لاوس پرەزيدەنتى مەملەكەت باسشىسىنا مىقتى دەنساۋلىق جانە جاۋاپتى قىزمەتىندە تابىس تىلەدى. * * * تايلاند پرەمەر-ءمينيسترى گەنەرال پرايۋت چان-وچا تايلاند حالقىنىڭ جانە جەكە ءوزىنىڭ اتىنان نۇرسۇلتان نازارباەۆتى پرەزيدەنتتىك سايلاۋداعى جەڭىسىمەن قۇتتىقتادى, دەپ حابارلادى پرەزيدەنتتىڭ ءباسپاسوز قىزمەتى. «ءسىزدىڭ مول تاجىريبەڭىز بەن ەلدى دانالىقپەن باسقارۋىڭىزدىڭ ارقاسىندا قازاقستان رەسپۋبليكاسى وڭىردە جانە حالىقارالىق ارەنادا بەلسەندى ءارى سىندارلى ءرول اتقارۋىن جالعاستىرا بەرەتىن بولادى. ەكى ەلدىڭ ىلگەرى دامۋى ءۇشىن ءبىزدىڭ ىنتىماقتاستىعىمىزدىڭ جالعاسۋىن جانە بارلىق سالاداعى قارىم-قاتىناستاردىڭ نىعايۋىن تاعاتسىزدانا كۇتەمىن», – دەلىنگەن جەدەلحاتتا.
