«سامۇرىق-قازىنا» اق باسقارما توراعاسى نۇرلان جاقىپوۆتىڭ ايتۋىنشا, ورتالىق ازيادا العاش ءبىزدىڭ ەلدە سالىناتىن زاۋىتتا جەل ەلەكتر ستانسالارىنا قاجەتتى گوندولالار, كۇپشەكتەر مەن مۇنارالار جانە وزگە دە قاجەتتى بولشەكتەر شىعارۋعا باسىمدىق بەرىلمەك. جاڭا كاسىپورىن قۇرىلىسى كەلەسى جىلدىڭ سوڭىنا دەيىن اياقتالادى. جوبا قۇنى – 114 ملن دوللار.
«جاڭادان بوي كوتەرەتىن زاۋىتتا 300-دەن استام جاڭا جۇمىس ورنى قۇرىلادى. جوبانى دەر كەزىندە پايدالانۋعا بەرۋ ءۇشىن تىكەلەي شەتەلدىك ينۆەستيتسيا تارتىلعانىن ايتا كەتكەن ءجون. زاۋىتتى سالۋ ءۇشىن قازاقستاننىڭ دامۋ ينستيتۋتتارىنان ەشقانداي قارىز المايمىز. بۇل جوبا ەكى تاراپ ءۇشىن دە ءتيىمدى ەكەنىنە داۋ جوق. جەرگىلىكتى جەردەگى ءوندىرىس دەڭگەيى ارتىپ, كەمىندە 30 پايىزدى قۇرايدى. سول ءۇشىن دە «SANY RE» كومپانياسى R&D زەرتتەۋ ورتالىعىن اشۋعا قۇلشىنىپ وتىر», دەيدى نۇرلان جاقىپوۆ.
دەرەكتەرگە جۇگىنسەك, جوبا اياسىندا بوي كوتەرەتىن زاۋىت قازاقستان اۋماعىنداعى جەل ەلەكتر ستانسالارىن قاجەتتى بولشەكتەرمەن قامتاماسىز ەتىپ قانا قويماي, ولاردى ورتالىق ازياداعى كورشىلەس ەلدەرگە ەكسپورتقا شىعارۋدى كوزدەپ وتىر. ويتكەنى كەرەكتى قۇرال-جابدىقتارعا وزگە مەملەكەتتەر تاراپىنان قىزىعۋشىلىق بار.
قازاقستان مەن قىتاي اراسىنداعى ىنتىماقتاستىقتىڭ ءارى بەرىك ەكونوميكالىق بايلانىستىڭ ارقاسىندا قولعا الىنعان جوبا ارقىلى جاڭارتىلعان ەنەرگيا كوزدەرىن ءوندىرۋدىڭ مۇمكىندىگى ارتا تۇسپەك. زاۋىتتىڭ ىرگەتاسىن قالاۋ راسىمىندە ءسوز سويلەگەن ءوڭىر باسشىسى ەربول قاراشوكەەۆ باياندى باستامانىڭ ءوڭىر ءۇشىن عانا ەمەس, تۇتاس ەلىمىز ءۇشىن تيىمدىلىگى مول ەكەنىن تىلگە تيەك ەتتى.
«مەملەكەت باسشىسى قاسىم-جومارت توقاەۆتىڭ تاپسىرماسىمەن جانە ۇكىمەتتىڭ قولداۋىمەن وڭىردە بىرقاتار ينۆەستيتسيالىق جوبا قولعا الىنىپ, ءىرى ءوندىرىس ورىندارى اشىلىپ جاتىر. سونىڭ ءبىرى – «SANY RE» كومپانياسىنىڭ جەل گەنەراتورلارىن قۇراستىراتىن زاۋىت قۇرىلىسى. بۇل جوبا وبلىستىڭ جوعارى ينۆەستيتسيالىق الەۋەتىن راستاپ, تۇراقتى دامۋى مەن ەكولوگيالىق تازا تەحنولوگيالاردى پايدالانۋى نەگىزگى باعىتىمىز ەكەنىن كورسەتىپ وتىر.
جامبىل ءوڭىرى ەلىمىزدە جاڭارتىلاتىن ەنەرگيا كوزدەرىن دامىتۋ سالاسىندا كوشباسشىعا اينالعانى ءمالىم. بۇگىنگى تاڭدا وبلىستا جالپى قۋاتى 571,3 مەگاۆاتتى قۇرايتىن 22 جوبا ىسكە استى. ال كەيىنگى ءۇش جىلدا سارىسۋ اۋدانىندا جالپى قۋاتى 200 مەگاۆات بولاتىن «جاڭاتاس» جانە «شوقپار» جەل ەلەكتر ستانسالارى سەكىلدى ءىرى جوبالار ىسكە قوسىلدى.
«جىبەك جولى» ارنايى ەكونوميكالىق ايماعىندا ىسكە اسىرىلىپ جاتقان جاڭا جوبالاردىڭ ينۆەستيتسيالىق ارتىقشىلىقتارىنا تولىق كولەمدە قولداۋ كورسەتىلەدى. ولار كورپوراتيۆتىك تابىس, جەر, م ۇلىك سالىعىنان جانە شەتەلدەن قۇرال-جابدىقتاردى تاسىمالداۋ بارىسىندا باج سالىعىنان تولىعىمەن بوساتىلادى. بۇل ينۆەستورلار ءۇشىن ۇلكەن جەڭىلدىك دەپ سانايمىن. جوبانى ىسكە اسىرۋعا قولداۋ كورسەتكەنى ءۇشىن «سامۇرىق-قازىنا» قورىنىڭ جانە «SANY RE» كومپانياسىنىڭ باسشىلىعىنا العىسىمدى بىلدىرەمىن», دەدى ە. قاراشوكەەۆ.
قازىرگى كەزدە «سامۇرىق-قازىنا» قورى ەلەكتر ەنەرگياسىنا دەگەن سۇرانىستى قاناعاتتاندىرۋ ءۇشىن شەتەلدىك سەرىكتەستەرمەن بىرلەسىپ, اۋقىمدى جوبالاردى قولعا الىپ جاتىر. الداعى التى جىلدىڭ ىشىندە شامامەن 6 گۆت كولەمىندە جاڭارتىلاتىن ەنەرگيا كوزدەرىن ەنگىزۋدى جوسپارلاپ وتىر.
قىتايلىق «SANY Renewable Energy» كومپانياسى ديرەكتورلار كەڭەسىنىڭ توراعاسى چجوۋ فۋگۋيدىڭ ايتۋىنشا, قازاقستان بيلىگى بۇل جوبانى جۇزەگە اسىرۋ ءۇشىن قولدان كەلگەنشە قولداۋ كورسەتكەن. ۇكىمەت پەن «سامۇرىق-قازىنا» قورى دا الپاۋىت كومپانيانىڭ اۋقىمدى جوبانى ىسكە اسىرۋىنا مۇرىندىق بولىپ وتىر.
ء«بىزدىڭ ءبىرىنشى كەزەكتە قازاقستاندى تاڭداۋىمىزدىڭ ءوز سەبەبى بار. قازاقستان تاراپى بىزگە بارلىق جاعىنان قولداۋ كورسەتىپ وتىرعان الەۋەتتى ارىپتەستەرمەن قىزىقتىردى. ەل ۇكىمەتىنىڭ وكىلدەرى دە جوبامىزدى بىردەن ماقۇلدادى. «سامۇرىق-قازىنا» قورىنىڭ باسشىلارىمەن دە جاقسى بايلانىس ورناتقانبىز.
جوبامىزعا مۇمكىندىگىنشە قولداۋ بىلدىرگەن بارلىق ازاماتقا, جەرگىلىكتى اتقارۋشى بيلىك وكىلدەرىنە العىسىم شەكسىز. جۇمىلعان جۇدىرىقتاي بىرلەسە اتقارعان جۇمىسىمىز كوڭىل كونشىتەرلىكتەي ناتيجەلى بولادى دەگەن ءۇمىت بار.
جاڭادان بوي كوتەرەتىن زاۋىت ەل ەكونوميكاسىنىڭ دامۋىنا ايتارلىقتاي ىقپال ەتەدى. بىرلەسىپ قولعا العان باستامامىز باياندى بولۋى ءۇشىن بار كۇشىمىزدى سالىپ ەڭبەك ەتۋگە ءازىرمىز. ءبىزدىڭ كومپانيا وندىرەتىن جاڭا تەحنولوگيا قازاقستاندا «جاسىل ەنەرگيا» ۇلەسىنىڭ ارتۋىنا ىقپال ەتەتىنىنە سەنىمىم زور. ورتالىق ازياداعى ىرگەلى جوباعا اينالاتىن زاۋىتتى ءبىرىنشى بولىپ قازاقستاندا سالۋىمىزدىڭ ءوز ءمانى بار. مۇندا جۇمىس ىستەۋگە جايلى ورتا قاراستىرىلعان», دەدى ول ءوز ويىمەن ءبولىسىپ.
قالاي دەسەك تە, «SANY Renewable Energy» الەمدەگى جەل گەنەراتورلارىن شىعاراتىن ءىرى زاۋىت ەكەنى ءمالىم. دەرەككە جۇگىنسەك, كومپانيانىڭ اكتسيالارى شانحاي قور بيرجاسىندا ساۋدالانادى. ال كومپانيانىڭ نارىقتىق كاپيتالى 5,3 ملرد دوللارعا تەڭ. زياتكەرلىك ءوندىرىس سالاسى بويىنشا قىتايداعى كوشباسشى كاسىپورىنعا اينالعان كومپانيامەن بىرلەسە اتقارعان جۇمىس كوپ كۇتتىرمەي وڭ ناتيجە بەرەدى دەگەن سەنىم زور.
جامبىل وبلىسى,
شۋ اۋدانى
