پرەزيدەنت ءىس باسقارماسىنا قاراستى پرەزيدەنتتىك ورتالىقتا اشىلعان كورمەنىڭ ماقساتى – تاريحي تۇلعالاردىڭ رۋحاني مۇراسىن كەڭىنەن ناسيحاتتاۋ. ول ءۇشىن ۇلتتىق ارحيۆتەن, ساكەن سەيفۋللين مۋزەيىنەن, جەتىسۋ وبلىسىنىڭ مۇحامەدجان تىنىشباەۆ اتىنداعى تاريحي-ولكەتانۋ مۋزەيىنەن, تۇرار رىسقۇلوۆ اتىنداعى تۇلكىباس اۋداندىق تاريحي-ولكەتانۋ مۋزەيىنەن, جامبىل وبلىستىق تاريحي-ولكەتانۋ مۋزەيلەرىنىڭ قورلارىنان فوتوسۋرەتتەر مەن قۇجاتتار الىنعان.
– بۇل – بولاشاق ۇرپاق ءۇشىن وتە ماڭىزدى. ركفسر حالىق كوميسسارلارى كەڭەسى توراعاسىنىڭ ورىنباسارى بولىپ 11 جىل قىزمەت ىستەگەن, تۇرار رىسقۇلوۆتىڭ ەڭبەگى ۇشان-تەڭىز. XX عاسىردىڭ 30-جىلدارى بۇكىلوداقتىق كوممۋنيستىك پارتيانىڭ ورتالىق كوميتەتىنە بۇرىن-سوڭدى بولماعان اشتىققا ۇشىراعان قازاق حالقىنىڭ تاعدىرى تۋرالى ۇندەۋلەردىڭ ەسەبىنەن قازاقستانعا ازىق-ت ۇلىك كومەگىن كورسەتۋ ماسەلەسى شەشىلگەنىن ەرەكشە اتاپ ءوتۋ كەرەك, – دەدى ت.رىسقۇلوۆتىڭ نەمەرەسى ادەل رىسقۇلوۆا.
ۇيىمداستىرۋ اياسىندا جۇرگىزىلگەن ىزدەستىرۋ-جيناقتاۋ جۇمىستارىنىڭ ناتيجەسىندە الىنعان م.شوقايدىڭ 1920–1930 جىلدارى قولدانعان جازۋ ماشىڭكەسى, «ياش تۇركىستان» جۋرنالىن شىعارۋ بارىسىندا پايدالانعان مورلەرى, تۇرار رىسقۇلوۆتىڭ رەداكتسياسىمەن جارىق كورگەن «ۆوسستانيە 1916 گودا ۆ كيرگيزستانە» كىتابى, «الجير» تۇتقىنى ءازيزا رىسقۇلوۆانىڭ ساندىعى, «حاشيا راديا مۇحتار» كىتابى, سيا ساۋىت, كۇرسى سىندى تۇپنۇسقا جادىگەرلەر كورەرمەندەردىڭ ەرەكشە قىزىعۋشىلىعىن تۋدىردى.
– 1991 جىلى قول جەتكىزگەن تاۋەلسىزدىك – ەلىمىزدىڭ ءوز بوستاندىعى, ار-نامىسى, ابىرويى, بىرلىگى مەن تۋعان جەرىنىڭ تۇتاستىعى ءۇشىن سان عاسىرلىق كۇرەسىنىڭ قيسىندى ناتيجەسى. بيىل مەرەيتويلارىن اتاپ وتەتىن قازاق حالقىنىڭ ءبىرتۋار پەرزەنتتەرى – م.تىنىشباەۆ, م.شوقاي, س.سەيفۋللين, ت.رىسقۇلوۆتىڭ قىزمەتى دە وسى شەجىرەنىڭ داڭقتى پاراعىنا اينالدى. حالقىمىزدىڭ ەگەمەندىككە جەتۋ جولىنداعى باستى بەلەستەردى ەسكە سالا وتىرىپ, مەملەكەتتىگىمىزدىڭ قالىپتاسۋى مەن دامۋىندا ەلەۋلى ءرول اتقارعان الاش جانە تۇركىستان اۆتونوميالارىن ەسكە الۋ, كەيىنگى ۇرپاققا ناسيحاتتاۋ بۇگىنگى ءبىزدىڭ پارىزىمىز, – دەدى پرەزيدەنتتىك ورتالىق ديرەكتورى باقىتجان تەمىربولات.
ايتا كەتەيىك پرەزيدەنتتىك ورتالىقتىڭ كىتاپحانا جانە مۋزەي قورلارىنان ەكسپوناتتار مەن كىتاپتار, مەملەكەت قايراتكەرلەرى تۋرالى تاريحي قۇجاتتار قويىلدى. بارلىعى 170-كە جۋىق ماتەريال ورنالاستىرىلدى.
