سۋرەت: abai.kz
قازاقستان – رەسەي ساراپشىلارى كەڭەسىن وتكىزدىك. بۇل – ديپلوماتيانىڭ ەكىنشى ءبىر تارماعى دەپ ەسەپتەلەدى. وسى ورايدا جيىندا قازاقستاننىڭ ستراتەگيالىق زەرتتەۋلەر ينستيتۋتى رەسەي عىلىم اكادەمياسىنىڭ الەمدىك ەكونوميكا جانە حالىقارالىق قاتىناستار ينستيتۋتىنىڭ وكىلدەرىمەن ارىپتەستىكتى بەكەمدەپ, ونى جاڭا دارەجەگە كوتەرۋ جاعىن تالقىلادىق.
كۇن تارتىبىنە سايكەس, ساۋدا-ساتتىق, ەكونوميكالىق بايلانىس, لوگيستيكا مەن ەنەرگەتيكا, قورشاعان ورتانى قورعاۋ مەن كليماتتىڭ وزگەرۋىنە قارسى تۇرۋ سىندى ماسەلەلەر قارالدى.
ەكى ەل ساراپشىلارىنىڭ ورتاق ديالوگ الاڭىن قۇرعانىنا 20 جىلدان استى. بايقاپ وتىرساق, قازىرگى تاڭدا مەملەكەتتەر اراسىندا 143 بىرلەسكەن باستاما بار. مىنە, وسى جوبالاردىڭ جۇيەلى جۇزەگە اسىرىلۋى ءۇشىن قارىم-قاتىناسقا قاتىستى كەز كەلگەن شەشىم ساراپشىلاردىڭ ەلەگىنەن, تالقىلاۋىنان وتسە, ساپالى بولاتىنى ءسوزسىز.
قازاقستان مەن رەسەيدىڭ قارىم-قاتىناسى ەل شەكاراسىندا ورنالاسقان اۋىل-ايماقتار مەن قالا تۇرعىندارىنىڭ ءومىر سۇرۋىنە اسەر ەتەتىنى تاعى بار. بۇل رەتتە ەكى مەملەكەتتىڭ بايلانىسى, اسىرەسە شەكارالىق ايماقتا تۇراتىن حالىقتىڭ جاعدايىنا وڭ اسەر ەتەتىندەي ارگۋمەنتتەردى قاراستىرىپ, تالداۋىمىز قاجەت. ەڭ ءبىرىنشى جايت – ەكونوميكاداعى شيكىزاتتىق ەمەس سەكتوردى دامىتۋ.
پرەزيدەنت قاسىم-جومارت توقاەۆ جولداۋلارىندا اتاپ وتكەندەي, قازىر ءبىز ەكونوميكاداعى شيكىزاتتىق ەمەس سەكتوردى دامىتۋعا كۇش سالۋىمىز قاجەت. سوندىقتان شەت مەملەكەتتەردەن ينۆەستيتسيا تارتۋ – باستى ماقسات. بۇل رەتتە مەملەكەتتەر اراسىنداعى مۇمكىندىكتەردى, كەدەرگىلەردى سارالاۋدا ساراپشىلاردىڭ ورنى ەرەك.
الۋا جولدىبالينا,
پرەزيدەنت جانىنداعى قسزي ديرەكتورىنىڭ ورىنباسارى
