بۇگىندە ەلىمىزدىڭ تۇكپىر-تۇكپىرىندە جاس عالىمداردىڭ تىڭ باستامالارى ارقىلى ۇلتتىق مادەنيەتىمىز بەن تاريحىمىزدىڭ ماڭىزدى قىرلارى زەرتتەلىپ جاتىر. سونىڭ ىشىندە ماڭعىستاۋ ءوڭىرىنىڭ رۋحاني مۇراسىن جاڭاشا قىرىنان تانىتىپ جۇرگەن جاس زەرتتەۋشى, اقشۇقىر مەكتەپ-ليتسەيىنىڭ 11-سىنىپ وقۋشىسى شىنار امانبايدىڭ جوباسى ەرەكشە كوزگە ءتۇستى.
شىنار بيىل رەسپۋبليكالىق عىلىمي جوبالار كونكۋرسىندا «ماڭعىستاۋداعى رۋنا جازۋىنىڭ زەرتتەلۋى» تاقىرىبىن قورعاپ, ءبىرىنشى ورىن يەلەنگەن. ونىڭ عىلىمعا دەگەن قۇشتارلىعىن وياتقان جەتەكشىسى مەيرامگۇل جاڭابەرگەنوۆا. ەكەۋى تۇركىتانۋشى بايدۋللا ايداروۆتىڭ مۇراسىن تەرەڭىرەك زەرتتەۋگە بەل بۋعان. زەرتتەۋ بارىسىندا شىنار وڭىردەگى رۋنا جازۋلارىنىڭ بارلىعىن جيناقتاۋ ماقساتىندا ارنايى «Tanba.Kz» اتتى ءموبيلدى قوسىمشا جاساپ شىققان. بۇل قوسىمشا ارقىلى وڭىردەگى ءاربىر تاڭبانىڭ تسيفرلىق بازاسىن قۇرۋ قولعا الىنعان. مۇنداي جوبا تەك زەرتتەۋ جۇمىسى عانا ەمەس, مادەني مۇرالاردى ساقتاۋعا ارنالعان يننوۆاتسيالىق قادام دەۋگە بولادى. شىناردىڭ جۇمىسى تەك تەوريالىق زەرتتەۋمەن شەكتەلمەيدى. ول تاۋشىق ماڭىنداعى تاڭبالى ساي جەرىنە بارىپ, تاڭبالاردى سۋرەتكە ءتۇسىرىپ, بەينەماتەريالدار ازىرلەگەن. سونداي-اق ولكەتانۋشىلارمەن, تاڭباتانۋشىلارمەن سۇحباتتاسىپ, مول مالىمەت جيناعان.
«مەنىڭ عىلىمعا قادام باسۋىما جەتەكشىم مەيرامگۇل جاڭابەرگەنوۆا اپاي سەبەپكەر بولدى. ول كىسىنىڭ بىلىمگە دەگەن ەرەكشە كوزقاراسى مەنى قاناتتاندىرىپ, بايدۋللا ايداروۆ مۇراسىن زەرتتەۋگە جەتەلەدى. وسى زەرتتەۋ اياسىندا جەتەكشىم ەكەۋمىز ماڭعىستاۋ وبلىسىنداعى بۇكىل تاڭبالاردى جيناقتاۋ ماقساتىندا «تاڭبا Kizet» اتتى ءموبيلدى قوسىمشا ويلاپ تاپتىق. بۇل – مەنىڭ العاشقى عىلىمي جوبام, بىراق توقتاپ قالماي, عىلىم جولىمدى جالعاستىرعىم كەلەدى», دەيدى ول.
جوبا ارقىلى جاس زەرتتەۋشى قازاق تاريحىنىڭ كونە كەزەڭدەرىنەن سىر شەرتەتىن رۋنا جازۋلارىن تەك زەرتتەپ قويماي, ولاردىڭ ءمان-ماڭىزىن كەڭ اۋديتورياعا جەتكىزۋدى ماقسات ەتىپ وتىر. شىناردىڭ ايتۋىنشا, بۇل جەڭىس – عىلىم جولىنداعى العاشقى باسپالداعى عانا.
