كەسكىندەمە جانرىنىڭ اككى شەبەرى قۇداش داۋلەتحان ۇلى ۇلكەن نارىن اۋدانى, ۇشتوبە اۋىلىندا تۋعان. بالا جاستان ونەرگە قۇمار ول سەمەي مەملەكەتتىك پەداگوگيكالىق ۋنيۆەرسيتەتىنىڭ كوركەمسۋرەت-گرافيكا فاكۋلتەتىن ءتامامداپ, ۇستازدىق جولعا تۇسكەن. شاكىرت تاربيەلەي ءجۇرىپ, ءوزىنىڭ شەبەرلىگىن دە شىڭداعان. الىس-جاقىن شەتەلدەردە وتەتىن سيمپوزيۋمداردان دا قالماۋعا تىرىسادى. سوناۋ جىلداردان قولىنان قىلقالامىن تاستاماي, وسى ۋاقىتقا دەيىن ءتۇرلى جانردا جۇزدەگەن كارتينا جازىپتى. ىرىكتەلگەن جۇمىستارىن توپتاستىرىپ, بۇعان دەيىن دە بىرنەشە رەت جەكە كورمەسىن ۇيىمداستىرعان. ال مىنا كورمەسى تىپتەن ەرەكشە. شىعارمالارى ءارتۇرلى جانردا. التايدىڭ تۇمسا تابيعاتى دا, تۇرمىسى دا قامتىلعان. پورترەتتەر دە بارشىلىق. «قۇدىرەت» دەسە, قۇدىرەت. قىلقالام ۇشىمەن مىناۋ دۇنيەدەگى بار سۇلۋلىقتى سەزىندىرەدى. سۇلۋلىققا قۇمار ۇستازدىڭ شاكىرت ىنىلەرى دە كورمەدەگى تىڭ تۋىندىلارعا ىنتا قويا قاراپ, پىكىرلەسىپ جاتتى.
– شىعىستا سۋرەتشىلەردىڭ باسىن قوسىپ, باعىت-باعدار بەرىپ جۇرەتىن قۇداش داۋلەتقان ۇلىن ۇستاز سانايمىز. ءوزى ۇنەمى ىزدەنىس ۇستىندە جۇرەدى. قۇداش اعانىڭ سالعان كارتينالارىن دا جازباي تانيمىز. بوياۋ جاعۋ ءستيلى ەرەكشە. ەڭبەكقورلىعىنا باسىمىزدى يەمىز, – دەيدى ءىزىن باسىپ كەلە جاتقان شاكىرتى ءمادي قايىرحان ۇلى.
«ۇستازدىق ەتكەن جالىقپاس, ۇيرەتۋدەن بالاعا» دەمەكشى, قۇداش نۇرسادىقوۆ سۋرەت ستۋدياسىن اشىپ, كىشكەنتاي شاكىرتتەردى دە ونەرگە باۋلىپ ءجۇر. ولاردىڭ ىشىندە جەكە كورمەسىن وتكىزىپ, رەسپۋبليكالىق بايقاۋلاردان جۇلدە العاندارى دا جوق ەمەس.
وسكەمەن
