«ارنايى وپەراتسيالار كۇشتەرى ۇلتتىق قاۋىپسىزدىكتى قامتاماسىز ەتۋ جۇيەسىن جەتىلدىرۋ ءۇشىن قۇرىلعان. وندا ۇزدىك ماماندار قىزمەت اتقارادى, بولىمشەلەر تەحنيكا مەن قارۋ-جاراقتىڭ زاماناۋي ۇلگىلەرىمەن جابدىقتالعان. ءبىز وقۋ-ماتەريالدىق بازانى نىعايتۋ ءۇشىن ۇنەمى شارالار قابىلدايمىز. سىزدەردىڭ جۇكتەلگەن تاپسىرمالاردى جوعارى تيىمدىلىك كوەففيتسيەنتىمەن ورىنداي الاتىندارىڭىزعا سەنىمدىمىن», دەپ اتاپ ءوتتى گەنەرال-پولكوۆنيك رۋسلان جاقسىلىقوۆ.
قورعانىس ءمينيسترى جاۋىنگەرلىك الەۋەتتى ودان ءارى ارتتىرۋ, ماتەريالدىق-تەحنيكالىق بازانى جەتىلدىرۋ, اسكەري ءتارتىپ پەن اسكەري قىزمەت قاۋىپسىزدىگىن نىعايتۋ جانە وقۋ ورتالىقتارى مەن اسكەري بولىمدەردىڭ ينفراقۇرىلىمىن دامىتۋ بويىنشا بىرقاتار مىندەتتەر قويدى. قورعانىس ۆەدومستۆوسىنىڭ باسشىسى جاۋىنگەرلىك جانە ارنايى دايىندىق ناتيجەلەرىنە دە نازار اۋداردى.
ەستەرىڭىزگە سالا كەتەيىك, قازاقستان رەسپۋبليكاسى قارۋلى كۇشتەرىنىڭ ارنايى وپەراتسيالار كۇشتەرى مەملەكەت باسشىسىنىڭ جارلىعىمەن 2022 جىلدىڭ قاڭتارىندا قۇرىلعان ەدى. وتكەن ەكى جىلدا ارنايى وپەراتسيالار كۇشتەرى بولىمشەلەرى ءوز شەبەرلىكتەرىن شىڭداي وتىرىپ, بىرنەشە رەت اۋقىمدى رەسپۋبليكالىق جانە حالىقارالىق وقۋ-جاتتىعۋلارعا قاتىستى. 2023 جىلدىڭ قىركۇيەگىندە «باتىل تويتارىس» ستراتەگيالىق كوماندالىق-شتابتىق وقۋ-جاتتىعۋىندا قازاقستان پرەزيدەنتى – قازاقستان رەسپۋبليكاسى قارۋلى كۇشتەرىنىڭ جوعارعى باس قولباسشىسى قاسىم-جومارت توقاەۆ ارنايى وپەراتسيالار كۇشتەرىنىڭ قولباسشىلىعىنا جاۋىنگەرلىك تۋ تابىس ەتتى.
