وبلىستا ونەركاسىپ ءوندىرىسىنىڭ كولەمى 2,8 ترلن تەڭگەگە نەمەسە 3,6%-عا جەتىپ, ال وڭدەۋ سەكتورى 8,2%-عا وسكەن. بيىل وڭىرگە 815 ملرد تەڭگەگە جۋىق ينۆەستيتسيا تارتىلىپتى. بۇل وتكەن جىلعى كورسەتكىشتەن 30% جوعارى. وبلىس جالپى ينۆەستيتسيا تارتۋ جونىنەن رەسپۋبليكادا 2-ورىندا بولعانىمەن, اگرارلىق سەكتورعا سالىنعان ينۆەستيتسيا كولەمىنە كوز سالساق, وڭىرلەر اراسىندا كوش باستاپ تۇر. وندا 88%-ى جەكە كومپانيالاردىڭ ينۆەستيتسياسى. بۇل ايماقتا قولايلى ينۆەستيتسيالىق كليماتتىڭ قالىپتاسقانىن كورسەتەدى. جالپى, 2,8 ترلن تەڭگەگە 140 ينۆەستيتسيالىق جوبانىڭ پۋلى بار. ول 10 مىڭنان استام جاڭا جۇمىس ورنىن قۇرۋعا مۇمكىندىك بەردى. ايتسە دە, ونەركاسىپتىڭ ءوسۋى وڭىردەگى ەكولوگيالىق جاعدايعا قىسىم جاساپ جاتقانى ءمالىم. سوندىقتان وبلىس باسشىلىعى يندۋستريالاندىرۋ سەرپىنىن ساقتاي وتىرىپ, شىعارىندىلاردى تەجەۋ جانە كەزەڭ-كەزەڭىمەن ازايتۋ مىندەتىن العا قويعان. جۇمىس ىستەپ تۇرعان بارلىق ءىرى ونەركاسىپتىك كاسىپورىندا كەشەندى ەكولوگيالىق شەشىم ەنگىزۋ ارقىلى سالىنىپ جاتقان نەمەسە جوسپارلانعان زاۋىتتاردا سوڭعى ecofriendly تەحنولوگيالارىن قولدانۋدى قاتاڭ تالاپ ەتىپ وتىر.
ەكولوگيانى ساقتاۋداعى ماڭىزدى باعىت – كوممۋنالدىق قالدىقتاردى باسقارۋ جۇمىسى. بۇل ماقساتقا جەتۋگە پلاستيك, مەتالل, قاعاز جانە شىنى شىعاراتىن العاشقى زاماناۋي قوقىس سۇرىپتاۋ كەشەنىنىڭ قۇرىلىسى كومەكتەسەدى.
«بۇگىندە ءبىزدىڭ ءوڭىر اگرارلىق سالاعا تارتىلعان ينۆەستيتسيا كولەمى بويىنشا ەلىمىزدە كوش باستادى. قاڭتار ايىنان باستاپ اگروبيزنەسكە 190 ملرد تەڭگەدەن اسا ينۆەستيتسيا سالىندى. بۇل وتكەن جىل كورسەتكىشىنەن ەكى ەسەگە جوعارى», دەدى ورتالىق كوممۋنيكاتسيالار قىزمەتىندە وتكەن بريفينگتە پاۆلودار وبلىسىنىڭ اكىمى اسايىن بايحانوۆ.
بيىل وڭىردە ەلدى مەكەندەردىڭ كوشەلەرىن جوندەۋدى قوسا العاندا, رەسپۋبليكالىق ماڭىزى بار 46,5 شاقىرىم جانە جەرگىلىكتى ماڭىزى بار 616 كم جول جوندەلدى. وبلىس ورتالىعىندا ەرتىس وزەنى ارقىلى وتەتىن جاڭا كوپىردىڭ قۇرىلىسى باستالدى. جوبانى 2027 جىلى اياقتاۋ جوسپارلانعان. كەلەسى جىلى 16,5 ملرد تەڭگەگە 325 شاقىرىم جەرگىلىكتى ماڭىزى بار جولدار مەن ەلدى مەكەندەردىڭ كوشەلەرىن جوندەۋ, ونىڭ قاتارىندا توپىراق جامىلعىسى بار 31 اۋىلدىڭ كىرمە جولدارىن سالۋ مىندەتى تۇر.
ينفوگرافيكانى جاساعان – امانگەلدى قياس, «ەQ»
ايماق بيىلعى جيىن-تەرىم ناۋقانىندا استىقتىڭ رەكوردتىق كولەمىن جينادى. ديقاندار 1,1 ملن تونناعا جۋىق استىق باستىردى, بۇل وتكەن جىلعى ونىمنەن 3 ەسە كوپ. كەشەندى مەملەكەتتىك قولداۋدىڭ ارقاسىندا سۋارمالى ەگىس القاپتارى 12,7 مىڭ گا ۇلعايىپ, 179 مىڭ گا جەتكەن. سۋارمالى القاپتارعا 100% ىلعال ۇنەمدەيتىن تەحنولوگيالار, ياعني ديسپەرسيالىق سۋارۋ ءتاسىلى نەمەسە جاڭبىرلاتىپ سۋارۋ ءادىسى قولدانىلادى.
سوڭعى مالىمەتتەرگە زەر سالساق, وڭىردەگى ازىق-ت ۇلىك تاۋارلارىنىڭ باعاسى 16 ۇستانىمدا ورتاشا رەسپۋبليكالىق ماننەن تومەن. ال 8 ۇستانىمدا وبلىس ەڭ تومەن باعامەن توپ-5 ءوڭىردىڭ قاتارىندا تۇر. سونداي-اق وبلىس جۇمىسسىزدىقتىڭ سالىستىرمالى تومەن دەڭگەيىن, ياعني 4,7%-دان اسپايتىن كورسەتكىشىن ۇستاپ تۇرا الدى. وعان 26,2 مىڭ جاڭا جۇمىس ورنىن قۇرۋ ىقپال ەتتى. ونىڭ 73,6%-ى تۇراقتى جۇمىس ورىندارى.
پرەزيدەنتتىڭ دەنساۋلىقتى ساقتاۋ مەن الەۋمەتتىك سالانى قارجىلاندىرۋ تاسىلدەرىن قايتا قاراۋ تاپسىرماسىنا سايكەس وڭىردە وبلىستىق بيۋدجەتتىڭ 52%-ى الەۋمەتتىك سالاعا باعىتتالعان.
«وڭىردە بالالاردىڭ قوسىمشا ءبىلىم الۋىنا جانە ولاردىڭ بوس ۋاقىتىن ۇيىمداستىرۋعا كوپ كوڭىل بولىنەدى. جاقىندا 2 جاڭا بالالار شىعارماشىلىق ورتالىعى اشىلدى. سونداي-اق تاعى ءبىر «سامعاۋ» بالالار شىعارماشىلىق ورتالىعى ەكىباستۇز قالاسىندا اشىلادى. جاڭا الەۋمەتتىك نىسانداردى سالا وتىرىپ, جۇمىس ىستەپ تۇرعان مەكەمەلەردىڭ جۇمىسقا قابىلەتتىلىگىن ساقتاۋ ماسەلەسىن ۇمىتقان جوقپىز. 11,5 ملرد تەڭگەگە 73 الەۋمەتتىك نىساندى جوندەۋدەن وتكىزدىك جانە 4,9 ملرد تەڭگەگە 35 جاڭا الەۋمەتتىك نىسان سالىنىپ جاتىر», دەدى وبلىس اكىمى.
پاۆلوداردا وقۋشى ورىنى تاپشىلىعىن ازايتۋ ءۇشىن 1 200 جانە 600 ورىندىق ەكى «جايلى» مەكتەپتىڭ قۇرىلىسى جۇرگىزىلىپ جاتىر. ولاردىڭ قۇرىلىسىن كەلەسى جىلدىڭ ناۋرىز ايىندا اياقتاۋ جوسپارلانعان.
وبلىستاعى ينجەنەرلىك ينفراقۇرىلىمدار ايتارلىقتاي توزعانى بەلگىلى. بۇل ماسەلەنى شەشۋ, جەلىلەردى جاڭارتۋ مەن ەنەرگيا كوزدەرىن دامىتۋ جوبالارى سالا ماماندارىنىڭ كۇندەلىكتى جۇمىسى. جىلداعى جوندەۋ ناۋقانى 3 قالانىڭ تاۋەلسىز جىلۋ-تەحنيكالىق ءاۋديتىنىڭ قورىتىندىسى جانە جۇرگىزىلىپ جاتقان گيدراۆليكالىق سىناقتاردىڭ نەگىزىندە ۇيىمداستىرىلادى.
بيىلعى جىلۋ بەرۋ ماۋسىمىنا دايىندىق ءۇشىن 25 ملرد تەڭگەگە 31 شاقىرىمنان استام جىلۋ جەلىلەرىن سالۋ, قايتا قۇرۋ جانە جوندەۋ بويىنشا جۇمىس جۇرگىزىلدى. ۇزاقتىعى 9 كم بولاتىن 4 جاڭا جىلۋ ماگيسترالى سالىندى. وعان قوسا 19,3 شاقىرىم جەلى جوندەۋدەن ءوتتى.
«سۋمەن جابدىقتاۋ جانە سۋ بۇرۋ جۇيەلەرىنىڭ قۇرىلىسىن بەلسەندى جۇرگىزىپ جاتىرمىز. بۇل سالادا 16,4 ملرد تەڭگەگە 18 جوبا ىسكە اسىرىلدى. ال بىزدەگى قالالار جايلىلىعىنىڭ نەگىزگى فاكتورىنىڭ ءبىرى – قوعامدىق كولىك جۇيەسىنىڭ دامۋى. قازىردىڭ وزىندە وسى سالادا بەلگىلى ءبىر ناتيجەگە قول جەتتى. ونى قالا تۇرعىندارى وڭ باعالادى. تاياۋدا ەۋروپالىق قايتا قۇرۋ جانە دامۋ بانكىمەن 25 جاڭا ترامۆاي ۆاگونىن ساتىپ الۋ تۋرالى باس كەلىسىمگە قول قويىلدى. ولاردىڭ العاشقى لەگى كەلەسى جىلدىڭ ءبىرىنشى جارتىجىلدىعىندا كەلەدى», دەدى ا.بايحانوۆ.
سونىمەن قاتار ەل پرەزيدەنتىنىڭ باستاماسىمەن وبلىستا جۇزەگە اسىرىلىپ جاتقان «اۋىل – ەل بەسىگى» جوباسىنىڭ ارقاسىندا اۋىلدىق ينفراقۇرىلىمدى جاڭارتۋ بويىنشا ۇلكەن جۇمىس جۇرگىزىلىپ جاتىر. 18 مىڭعا جۋىق تۇرعىنى بار 15 اۋىل جاڭعىرتىلىپ 57 نىساندى جاڭارتۋعا 9,2 ملرد تەڭگە باعىتتالدى.
وسى جىلدىڭ 10 ايىندا 296 مىڭ شارشى مەتردەن استام تۇرعىن ءۇي پايدالانۋعا بەرىلدى. مۇنى وتكەن جىلمەن سالىستىرعاندا 27%-عا ارتىق. الداعى جەلتوقسان ايىندا حالىقتىڭ الەۋمەتتىك وسال توپتارى ساناتىندا كەزەكتە تۇرعاندار ءۇشىن 331 پاتەردى جالعا بەرىلەتىن تۇرعىن ءۇي تۇرىندە ساتىپ الۋ جوسپارلانعان. سونداي-اق ءۇش قالادا 146, جالپى وبلىستىڭ 10 اۋدانىندا 185 پاتەردىڭ كىلتى يەسىنە بەرىلەدى. ءوزىن-ءوزى جۇمىسپەن قامتۋدى ورىستەتۋ ماقساتىندا حالىقتىڭ الەۋمەتتىك وسال توبىنان شىققان وكىلدەرگە 653 ملن تەڭگە سوماسىنا 442 گرانت بەرىلدى.
ءوڭىر باسشىسى قوعامدىق كولىك جۇيەسىنىڭ دامۋى تۋرالى ەگجەي-تەگجەيلى باياندادى. كەيىنگى ەكى جىلدا وڭىردە 218 اۆتوبۋس جاڭارىپتى. بۇگىندە پاۆلودار, ەكىباستۇز قالالارى 75% زاماناۋي جوعارى كلاستى اۆتوبۋستارعا يە كورىنەدى. جىل سوڭىنا دەيىن جاڭا اۆتوبۋستاردىڭ سانى 250-گە دەيىن جەتكىزىلەدى. ال وتكەن قىركۇيەك ايىندا پاۆلودار اۋەجايىنىڭ ۇشۋ-قونۋ جولاعىن قايتا جاڭارتۋ جۇمىسى باستالدى. ول قۇرىلىس كەلەسى جىلدىڭ قازان ايىندا اياقتالادى. دەمەۋشىلىك قاراجات ەسەبىنەن پاۆلودار تەمىرجول ۆوكزالى دا جاڭارتىلىپ جاتىر. ال ەكىباستۇز ۆوكزالىن جاڭعىرتۋ جۇمىسى الداعى كوكتەمنىڭ العاشقى ايىندا اياقتالادى.
