وتىرىس بارىسىندا سەناتورلار اتالعان جوسپارعا سايكەس وسى اپتادا وتەتىن ءىس-شارالارعا توقتالدى. اتاپ ايتقاندا, اسكەري ءبىلىم جانە عىلىم, ونىڭ ىشىندە تۇلەكتەردى جۇمىسقا ورنالاستىرۋ, ازاماتتىق اۆياتسيانى دامىتۋ, «الەۋمەتتىك ءاميان» مەحانيزمىن ەنگىزۋ جانە مەملەكەت باسشىسىنىڭ تاپسىرمالارىن ىسكە اسىرۋ اياسىندا الەۋمەتتىك از قامتىلعان ساناتتاعى ازاماتتاردى قولداۋ جۇيەسىن جەتىلدىرۋ ماسەلەلەرىنە ارنالعان ءىس-شارالار وتكىزىلەدى.
بەكىتىلگەن كۇن تارتىبىنە سايكەس الداعى بەيسەنبىدە سەنات دەپۋتاتتارى «ەۋرازيالىق ەكونوميكالىق وداق شەڭبەرىندە اۋىل شارۋاشىلىعى ونىمىنە ارنالعان قويمالىق كۋالىكتەردى شىعارۋ (بەرۋ), ولاردىڭ اينالىسى جانە وتەلۋ قاعيدالارى تۋرالى كەلىسىمدى راتيفيكاتسيالاۋ تۋرالى» زاڭدى قارايدى. كەلىسىم ەۋرازيالىق ەكونوميكالىق وداق شەڭبەرىندە اۋىل شارۋاشىلىعى جانە اۋىل شارۋاشىلىعى ونىمدەرىنىڭ ءوزارا ساۋداسى سالاسىنداعى ىنتىماقتاستىقتى دامىتۋعا ارنالعان. سونداي-اق اگرارلىق سالانىڭ تابىسىن ارتتىرۋعا جانە اۋىل شارۋاشىلىعى تاۋارلارىنىڭ ەلەكتروندىق ساۋداسىن دامىتۋعا مۇمكىندىك بەرەدى.
سونىمەن قاتار بيۋرودا بۇعان دەيىن پارلامەنت ماجىلىسىندە قابىلدانعان زاڭدار جۇمىس ءۇشىن سەناتتىڭ تۇراقتى كوميتەتتەرىنە ءبولىنىپ بەرىلدى.
