تۇرعىن ۇيلەر مەن پاتەرلەردەگى تۇرمىستىق ورتتەردىڭ نەگىزگى سەبەپتەرى – جىلىتۋ جۇيەلەرى مەن قوندىرعىلارىن پايدالانۋ كەزىندە ءورت قاۋىپسىزدىگى ەرەجەلەرىن ورەسكەل بۇزۋ, پەشپەن جىلىتۋ, ەلەكتر جەلىسىن شامادان تىس جۇكتەۋ, سونداي-اق قاراپايىم نەمقۇرايلىلىق. وتكەن دەمالىس كۇندەرى توتەنشە جاعدايلار مينيسترلىگىنىڭ (تجم) قۇتقارۋشىلارى ەلوردادا جانە وعان ىرگەلەس ورنالاسقان اقمولا وبلىسىنىڭ ەلدى مەكەندەرىندە جاپپاي پروفيلاكتيكالىق رەيد ۇيىمداستىردى. بۇل ءىس-شارا ء«بىز قاۋىپسىزدىك ءۇشىن» دەگەن اۋقىمدى باعدارلامانىڭ ءبىر بولىگى رەتىندە جۇرگىزىلدى. نەگىزگى ماقسات – ءورت قاۋىپسىزدىگىنىڭ الدىن الۋ, ادام شىعىنىن ازايتۋ, توتەنشە جاعدايلاردى بولعىزباۋ. جىلىتۋ باستالعالى بەرى ەلىمىزدە 913 ءورت تىركەلگەن. سالدارىنان 41 ادام قازا تاۋىپ, 28 ادام جاراقات العان.
تجم ورتكە قارسى قىزمەت كوميتەتى توراعاسىنىڭ ورىنباسارى ەرلان تورەگەلديەۆ رەيد جۇرگىزۋدىڭ ماڭىزدى ءىس-شارا ەكەنىن ايتىپ بەردى.
«ەلوردا جانە وعان ىرگەلەس ورنالاسقان ەلدى مەكەندەردەگى ءورت جاعدايىنان ساقتاندىرۋ ماقساتىندا جاپپاي پروفيلاكتيكالىق رەيد جۇرگىزۋ – وتە ماڭىزدى جۇمىس. اسىرەسە جەكە ۇيلەردى جىلىتۋ كەزىندە ەلەكتر اسپاپتارىن پايدالانۋ ەرەجەلەرىن دۇرىس ساقتاماۋ سالدارىنان قاۋىپتى ايماقتىڭ بىرىنە اينالدىق», دەدى ول.
رەيد بارىسىندا پەشپەن جىلىتىلاتىن ۇيلەرگە ەرەكشە نازار اۋدارىلدى. قۇتقارۋشىلاردىڭ ايتۋىنشا, ءورت وقيعالارىنىڭ باسىم بولىگى وسى جەكە ۇيلەردە ورىن الادى. پەشتەر جارامدى كۇيدە بولۋى, ءورت قاۋىپسىزدىگىنىڭ بارلىق تالابىن ساقتاۋدى ەسكەرە وتىرىپ جابدىقتالۋعا ءتيىس. پەشتەردى پايدالانۋ كەزىندە ءتۇتىن جولدارى مەن پەشتەردى كۇيەدەن تازارتۋ, جانعىش شاتىردىڭ ۇستىندەگى ءتۇتىن قۇبىرلارىندا ۇشقىش ۇستاعىش مەتالل تورلاردىڭ بولۋى, وتىندى, باسقا دا جانعىش زاتتار مەن ماتەريالداردى وتتىقتا ورنالاستىرۋ, جانىپ جاتقان پەشتى قاراۋسىز قالدىرماۋ سىندى قاراپايىم تالاپتاردى ساقتاۋ كەرەك. وسىنداي ءىس-شارالار ءورتتىڭ الدىن الۋعا مۇمكىندىك بەرەدى.
قۇتقارۋشىلار مەن ۆولونتەرلەر تۇرعىن ۇيلەردى ارالاپ, ءتۇسىندىرۋ جۇمىستارىن جۇرگىزدى. ءاربىر ءۇيدىڭ تۇرعىندارىنا جىلىتۋ قۇرىلعىلارىن دۇرىس قولدانۋ, ەلەكتر سىمدارىن تەكسەرۋ, ءورت ءسوندىرۋ قۇرالدارىن تولىقتىرۋ سەكىلدى ءىس-ارەكەتتەردىڭ ءتارتىبى ءتۇسىندىرىلدى. ءۇش بالانىڭ اناسى ايجان جۇماباەۆا ادام قاۋىپسىزدىگىن قامتاماسىز ەتۋدى قولعا العان مامانداردىڭ جۇمىسىنا العىسىن ءبىلدىردى.
ء«بىز ەلەكتر قۇرىلعىلارىن قالاي دۇرىس پايدالانۋ كەرەك ەكەنىن تولىق ۇعىندىق. قۇتقارۋشىلار ۇيگە كەلىپ, پەشتىڭ ءتۇتىن شىعاراتىن بولىگىن تەكسەرىپ بەردى. ەندى بالالارىمنىڭ قاۋىپسىزدىگىنە سەنىمدىمىن», دەدى ول.
رەيد بارىسىندا قۇتقارۋشىلار الەۋمەتتىك وسال توپتاعى تۇرعىنداردىڭ ۇيلەرىنە ءتۇتىن مەن ۋلى گازدى انىقتايتىن اقىلدى قۇرىلعى ورناتىپ بەردى. بۇل قاۋىپتى جاعدايدى ەرتە انىقتاپ, دىبىستىق دابىل قاعۋ ارقىلى تۇرعىندارعا قاۋىپتىڭ الدىن الۋعا كومەكتەسەدى.
«استاناداعى ءورت وقيعالارىنىڭ سانى جىل سايىن ارتىپ بارادى. بيىلدىڭ وزىندە 635 ءورت تىركەلدى. جەكە تۇرعىن ۇيلەردەگى جىلىتۋ قۇرىلعىلارى مەن ەلەكتر جابدىقتارىن دۇرىس پايدالانباۋ, قاۋىپسىزدىك ەرەجەلەرىن ساقتاماۋ – قايعىلى وقيعالاردىڭ باستى سەبەپتەرى بولىپ تۇر», دەيدى قۇتقارۋشىلار.
رەيد ءورتتىڭ الدىن الۋعا باعىتتالعان اۋقىمدى جۇمىستىڭ ءبىر بولىگى عانا. مۇنداي يگى شارالار توتەنشە جاعدايلاردىڭ سانىن ازايتىپ قانا قويماي, حالىقتىڭ قاۋىپسىزدىك دەڭگەيىن ارتتىرۋعا مۇمكىندىك بەرەدى. قۇتقارۋشىلار الداعى ۋاقىتتا بۇل تاجىريبەنى باسقا وڭىرلەردە دە قولدانۋدى جوسپارلاپ وتىر.
