سۋرەت: kaztbu.edu.kz
وبلىستىق دەنساۋلىق ساقتاۋ باسقارماسى باسشىسىنىڭ ورىنباسارى الماگۇل ءابىلوۆانىڭ مالىمەتىنشە, مەديتسينا سالاسىن تاڭداعان تۇلەكتەرگە قولداۋ جاسالىپ وتىر. كەيىنگى 7 جىلدا ادام دەنساۋلىعىنا اراشاشى بولۋدى ماقسات ەتكەن جاس ورەندەرگە 616 گرانت بولىنگەن. ال 2018 جىلدان رەزيدەنتۋرا باعدارلاماسىمەن ءبىلىم العىسى كەلگەن ماماندارعا گرانت قاراستىرىلىپتى.
«اتىراۋ قالاسىنداعى ەمدەۋ مەكەمەلەرىندە جۇمىس ىستەۋگە نيەتتى ماماندارعا 5 ملن تەڭگە, اۋدان ورتالىعىنا بارعان دارىگەرلەرگە 8,5 ملن تەڭگە ءبىر رەتتىك جاردەماقى بەرىلەدى. ال شالعايدا ورنالاسقان ەلدى مەكەندەردە جۇمىس ىستەيتىن دارىگەرلەرگە بەرىلەتىن جاردەماقىنىڭ مولشەرى 10 ملن تەڭگەگە جەتتى», دەيدى ا.ءابىلوۆا.
بيىل دارىگەر بولۋدى قالاعان 113 جاسقا وبلىس اكىمىنىڭ گرانتى بەرىلگەن. قازىر 82 تۇلەك مەديتسينا ۋنيۆەرسيتەتتەرىنىڭ باكالاۆرياتىندا, ال 31 جاس رەزيدەنتۋرادا وقىپ ءجۇر. وبلىس اكىمىنىڭ گرانتىمەن رەزيدەنتۋرانى بىتىرگەن جاس ماماننىڭ ءبىرى – قۋانىش قۇبايدوللا ۇلى. ول وبلىستىق كارديولوگيا ورتالىعىنا جۇمىسقا ورنالاسقان.
«ماماندىق تاڭدار كەزدە مەديتسينا سالاسىنا اڭسارىم اۋدى. ءسويتىپ, 2021 جىلى وبلىس اكىمىنىڭ گرانتىنا يە بولعان ەدىم. ءبىلىمىمدى اقتوبە قالاسىنداعى م.وسپانوۆ اتىنداعى باتىس قازاقستان مەديتسينا ۋنيۆەرسيتەتىندە رەانيماتولوگ ماماندىعى بويىنشا رەزيدەنتۋرادا جالعاستىردىم. قازىر وبلىستىق كارديولوگيا ورتالىعىندا دارىگەر- انەستەزيولوگ-رەانيماتولوگ بولىپ جۇمىس ىستەيمىن. جەرگىلىكتى اتقارۋشى ورگان تاراپىنان جاستاردىڭ جوعارى ءبىلىم الۋىنا وسىنداي قولداۋ كوبىرەك كورسەتىلسە, كادر تاپشىلىعى ماسەلەسى شەشىمىن تابادى», دەيدى قۋانىش قۇبايدوللا ۇلى.
دارىگەردىڭ ايتۋىنا قاراعاندا, كارديولوگيا ورتالىعىندا جۇرەككە كۇردەلى وپەراتسيالار جاسالا باستاعان. ورتالىق دارىگەرلەرى كۇن سايىن 3-4 وپەراتسيا جاسايدى.
باسقارما باسشىسى قايسار ابداليەۆتىڭ ايتۋىنشا, كەيىنگى ەكى جىلدان بەرى مۇنايلى ءوڭىر تاراپىنان مەديتسينا سالاسىنىڭ قىزمەتكەرلەرىن باسپانامەن قامتۋعا نازار اۋدارىلىپ كەلەدى. وسى ماقساتتا ارنايى وڭىرلىك باعدارلاما ىسكە قوسىلدى. باعدارلاماعا سايكەس دارىگەرلەردىڭ باستاپقى جارنا تولەمەي, جىلدىق مولشەرلەمەسى 5 پايىزبەن نەسيە الۋىنا بولادى. بۇل باعدارلاماعا «وتباسى بانك» اق قولداۋ ءبىلدىردى. مۇنداي تومەن پايىزبەن 25 ميلليون تەڭگەگە دەيىن نەسيە 19 جىلعا بەرىلەدى.
«اتالعان باعدارلاما مەديتسينالىق مەكەمەلەردە جۇمىس ىستەيتىن ارىپتەستەرىمنىڭ قىزىعۋشىلىعىن تۋدىردى. كەيىنگى ەكى جىلدا 100-گە جۋىق دارىگەر وسى تۇرعىن ءۇي باعدارلاماسى ارقىلى باسپانا الۋعا ءوتىنىش ءبىلدىردى. ارنايى كوميسسيا باعدارلاما تالاپتارىنا سايكەس ءوتىنىش يەلەرىن بالدىق جۇيە ارقىلى باعالاپ, قورىتىندى شىعاردى. وسىلايشا, بۇل باعدارلاما 42 بىلىكتى دارىگەرلەردىڭ تۇرعىن ءۇي ماسەلەسىن شەشۋگە مۇمكىندىك بەردى», دەيدى ق.ابداليەۆ.
اتىراۋ وبلىسى
