فوتو rail-news.kz
بۇگىنگى تاڭدا ءتيىمدى ترانزيتتىك ترانسقۇرلىقتىق دالىزدەر مەن باعىتتار جەلىسى قۇرىلعان. ەلىمىزدىڭ اۋماعى ارقىلى 13 حالىقارالىق كولىك ءدالىزى وتەدى, ونىڭ 5-ەۋى تەمىرجول جانە 8-ءى اۆتوموبيل دالىزدەرى.
جۇك تاسىمالىنا دەگەن سۇرانىستىڭ ارتۋىن قامتاماسىز ەتۋ ماقساتىندا ينفراقۇرىلىمداعى كەدەرگىلەردى جويۋ بويىنشا شارالار قابىلدانىپ جاتىر. سونىمەن قاتار جاڭا جەتكىزۋ باعىتتارى بەلسەندى زەرتتەلىپ, جۇك تاسىمالىن جىلدامداتۋ ءۇشىن اقپارات الماسۋدى قامتاماسىز ەتەتىن تسيفرلىق شەشىمدەردى ەنگىزۋ ماسەلەسى پىسىقتالىپ جاتىر.
اتاپ ايتقاندا, ترانسكاسپي حالىقارالىق كولىك ءدالىزى باعىتى بويىنشا تاسىمالداۋدىڭ وڭ ديناميكاسى بايقالادى. سونىمەن بىرگە, «سولتۇستىك – وڭتۇستىك» كولىك ءدالىزىنىڭ الەۋەتىن اشۋ بويىنشا جۇمىستار جالعاسىپ جاتىر.
«اتالعان باعىتتى دامىتۋ ءۇشىن اقتاۋدا وتكەن ءبىرىنشى كولىك-ساۋدا-ەكسپورت فورۋمىنىڭ اياسىندا يران, تۇرىكمەنستان جانە رەسەيمەن جول كارتاسىنا قول قويىلدى. ول قۇجاتتى ىسكە اسىرۋ 2030 جىلعا قاراي ءدالىزدىڭ وتكىزۋ قابىلەتىن 20 ملن تونناعا دەيىن ۇلعايتۋعا مۇمكىندىك بەرەدى», دەدى ماقسات قالياقپاروۆ.
ۆيتسە-ءمينيستردىڭ ايتۋىنشا قازىرگى ۋاقىتتا «دوستىق – مويىنتى» تەمىرجول ۋچاسكەسىنىڭ ەكىنشى جولدارىن, الماتى اينالما تەمىر جولىن, «داربازا – ماقتاارال» جانە «باقتى – اياگوز» جاڭا تەمىرجول جەلىلەرىن سالۋ جۇمىستارى باستالدى.
اتالعان جوبالاردى ىسكە اسىرۋ دوستىق ستانساسىنىڭ وتكىزۋ قابىلەتىن جىلىنا 35 ملن تونناعا دەيىن ارتتىرۋعا, الماتى ستانساسى ارقىلى جۇك وتكىزۋ ۋاقىتىن قىسقارتۋعا, سارىاعاش ستانساسىن بوساتۋعا جانە قىتاي باعىتىنا قوسىمشا 20 ملن تونناعا دەيىن جۇك وتكىزۋ قۋاتتىلىعىن قالىپتاستىرۋعا مۇمكىندىك بەرەدى.
تاسىمالداردىڭ ۇزدىكسىزدىگىن جانە ماگيسترالدىق تەمىرجولداردىڭ قۋاتتىلىعىن ارتتىرۋ ءۇشىن مەملەكەت باسشىسىنىڭ تاپسىرماسى شەڭبەرىندە 2029 جىلعا دەيىن 11 مىڭ شاقىرىم تەمىرجول ۋچاسكەلەرىنە جوندەۋ جۇمىستارى جۇرگىزىلمەك, ونىڭ 2800 شاقىرىمىندا ءتيىستى جۇمىستار اياقتالدى.
«قابىلدانىپ جاتقان شارالاردىڭ ناتيجەسىندە تەمىرجول تاسىمالى بويىنشا ەكسپورت 130 ملن تونناعا دەيىن جەتكىزىلەدى, ال يمپورت پەن ترانزيت كولەمى 60% جانە 65%-عا دەيىن سايكەسىنشە ارتادى», دەدى كولىك ۆيتسە-ءمينيسترى.
