فوتو: ۇكىمەتتىڭ ءباسپاسوز قىزمەتى
كەزدەسۋ بارىسىندا الەمدىك تەحنولوگيالار نارىعىن دامىتۋدىڭ زاماناۋي ترەندتەرى جانە جاڭا بىرلەسكەن بيزنەس-شەشىمدەردى, زەرتتەۋ باستامالاردى, ونىڭ ىشىندە ۇلتتىق جاساندى ينتەللەكت ورتالىعىندا جاساندى ينتەللەكت زەرتحاناسىن اشۋ شەڭبەرىندە ازىرلەۋ پەرسپەكتيۆاسى قاراستىرىلدى.
ايتا كەتەيىك, EPAM Systems – باعدارلامالىق قامتاماسىز ەتۋدى ازىرلەۋ جانە كونسالتينگ سالاسىنداعى الەمدىك كوشباسشى. بۇگىنگى تاڭدا EPAM كومپانياسى قازاقستاننىڭ 17-دەن استام قالاسىندا تانىستىرىلعان جانە 1000-عا جۋىق قىزمەتكەرى بار, 2024 جىلى Astana Hub-قا قاتىسۋ شەڭبەرىندە $40 ملن استام سوماعا قىزمەتتەر ەكسپورتتالدى.
تاراپتار IT-ءبىلىم بەرۋدى دامىتۋ باعىتىندا 5 مىڭنان استام ماماندى وقىتقان EPAM Kazakhstan وقۋ ورتالىعىنىڭ ماڭىزىن اتاپ ءوتتى. Tech Orda باعدارلاماسى ارقىلى كومپانيا 700-دەن استام ستۋدەنتكە Java, Python جانە Data Engineering سياقتى نەگىزگى باعىتتار بويىنشا IT داعدىلارىن ۇيرەتتى. بيىل وقۋ ءۇشىن تاعى 300 ستۋدەنت تاڭدالعان.
«پرەزيدەنت قاسىم-جومارت توقاەۆ ستراتەگيالىق مىندەت قويدى. قازاقستان جاپپاي تسيفرلاندىرۋ جانە جاساندى ينتەللەكتىنى جەدەل دامىتۋ اۋماعىنا اينالۋعا ءتيىس. ءبىز وسى باعىتتا جۇمىس جۇرگىزىپ جاتىرمىز. 5 جىل ىشىندە IT-قىزمەتتەر ەكسپورتىنىڭ كولەمى $30 ملن-نان $600 ملن-عا دەيىن ءوستى. دەگەنمەن, بۇل جەتكىلىكسىز, بىزدە ۇلكەن الەۋەت بار. قازاقستاندىق ماماندار دارىندى ءارى باسەكەگە قابىلەتتى. الەمدىك الپاۋىتتارمەن ىنتىماقتاستىق بىزگە تيىمدىلىكتى ارتتىرۋعا جانە وزىق قارقىنمەن دامۋدى قامتاماسىز ەتۋگە مۇمكىندىك بەرەدى»,دەدى ولجاس بەكتەنوۆ.
ءوز كەزەگىندە اركادي دوبكين قازاقستانداعى قولايلى ينۆەستيتسيالىق احۋالدى اتاپ ءوتىپ, تسيفرلاندىرۋ جانە ەكونوميكانىڭ ناقتى سەكتورلارىنا جاڭا تەحنولوگيالاردى ەنگىزۋ سالاسىنداعى ودان ءارى ىنتىماقتاستىق ءۇشىن بىرقاتار ۇسىنىستاردى ايتتى.
كەزدەسۋ قورىتىندىسى بويىنشا تسيفرلىق دامۋ, يننوۆاتسيالار جانە اەروعارىش ونەركاسىبى مينيسترىنە قاجەتتى كومەكتى قامتاماسىز ەتە وتىرىپ, جوبالاردى سۇيەمەلدەۋدى كۇشەيتۋ تاپسىرىلدى.
