سۋرەت: informburo.kz
جوبادا جاسالعان جۇمىستىڭ ناتيجەسى ەلوردادا وتكەن فورۋم اياسىندا ايتىلدى. ءىس-شارانى مادەنيەت جانە اقپارات مينيسترلىگى جانە قارجىلىق مونيتورينگ اگەنتتىگىنىڭ قولداۋىمەن «مەديتسينا جاستارى» رقب ۇيىمداستىردى. فورۋمعا قۇقىق قورعاۋ ورگاندارى, بانك سەكتورى, قوعامدىق ۇيىمدار وكىلدەرى مەن «اlayaq.net» قوزعالىسى ەرىكتىلەرىن قوسا باس اياعى 20 مىڭ ادام قاتىستى. ەلدەگى جوعارى وقۋ ورىندارىنىڭ ستۋدەنتتەرى, ارمەنيا, ازەربايجان, بەلارۋس, قىرعىزستان, وزبەكستاننان سالىقتىق (قارجىلىق) تەرگەۋ ورگاندارىنىڭ وكىلدەرى ونلاين رەجىمدە قوسىلدى.
– مەملەكەت باسشىسى قاسىم-جومارت توقاەۆ ءوزىنىڭ بيىلعى جولداۋىندا ۇكىمەتكە ينتەرنەت الاياقتىققا قارسى ءىس-قيمىل شارالارىن كۇشەيتۋدى تاپسىردى. «Alayaq.net» جوباسى وسى مىندەتتىڭ ورىندالۋىن قامتاماسىز ەتۋدىڭ جارقىن ۇلگىسى بولدى. بۇل باستاما ينتەرنەت-الاياقتىقپەن, قارجى پيراميدالارىمەن, دروپپەرلەرمەن كۇرەسۋدىڭ وزەكتى ماسەلەلەرىن تالقىلاۋعا, انىقتاۋعا, سونداي-اق جاستار اراسىندا قارجىلىق ساۋاتتى ارتتىرۋعا باعىتتالدى, – دەدى مادەنيەت جانە اقپارات ۆيتسە-ءمينيسترى ەۆگەني كوچەتوۆ.
جيىندا قاتىسۋشىلار جوبا ناتيجەلەرىن تالقىلاپ, تاجىريبە الماستى. كيبەرالاياقتىقتان قورعانۋدىڭ جاڭا ءادىس-تاسىلدەرىن دە مەڭگەردى.
«اlayaq.net» جوباسىنىڭ نەگىزىن قالاۋشى ابىلايحان ءابدىراشتىڭ ايتۋىنشا, قوزعالىس بەلسەندىلەرى وڭىرلەردە 125 مىڭنان اسا ادامدى قامتيتىن قارجىلىق ساۋات جونىندەگى مارافونداردى وتكىزگەن. قارجىلىق مونيتورينگ اگەنتتىگى, پوليتسيا جانە باسقا دا ۆەدومستۆولاردىڭ قولداۋىمەن جوبا 28 مەملەكەتتىك جانە قوعامدىق ۇيىمدارمەن ىنتىماقتاستىق ورناتقان.
– مادەنيەت جانە اقپارات مينيسترلىگى, ازاماتتىق باستامالاردى قولداۋ ورتالىعى, سونداي-اق جاستاردىڭ نيەت بىلدىرۋىمەن ارنايى گرانت ءبولىندى. جوبا 2022 جىلى باستالدى. وسى ۋاقىتقا دەيىن 17 وبلىس پەن 3 قالانىڭ بارلىعىن تولىق قامتىدىق, – دەدى ا.ءابدىراش.
ال جوبا جەتەكشىسى نۇرسۇلتان ورىنبەكوۆ 10 مىڭنان اسا ادامعا تەگىن قارجىلىق ونلاين كۋرس وتكىزىلگەنىن ايتتى. كۋرس بارىسىندا بازالىق ەكونوميكالىق قارجىلىق ءبىلىمى قالىپتاستىرۋعا كوپ كوڭىل بولىنگەن. قازىرگى تاڭدا الەۋمەتتىك جەلىلەردەگى اقپاراتتىق جۇمىستار 150 ملن-نان اسا قارالىم جينادى. ەكى جىل ىشىندە نەشە ءتۇرلى الاياقتىق سحەما اشكەرەلەندى. ونىڭ لوگيكالىق تىزبەگى قانداي بولادى, الەۋمەتتىك-پسيحولوگيالىق تۇرعىدان قانداي ادامدار ءجيى الدانادى دەگەن سەكىلدى ءتۇرلى كەيس زەرتتەلدى. جوبا اياسىندا «Alayaq.net» سايتى دا ىسكە قوسىلدى. ونىڭ كومەگىمەن پايدالانۋشىلار الاياقتىق وقيعالارى تۋرالى حابارلاپ, قارجىلىق ساۋاتىن ارتتىرا الادى. فورۋم سوڭىندا «Alayaq.net» جوباسىنىڭ ۇزدىك ەرىكتىلەرى ماراپاتتالدى.
