اعايىندى اسەمبەك پەن الەمبەك سارباز اتانىپ, ساپقا تۇرعانىن ماقتان ەتەدى. اسەمبەك ومىرگە ءوز سىڭارىنان 10 مينۋت ەرتە كەلگەن. جارىق دۇنيەگە وزىنەن بىرەر مينۋت قانا كەيىن كەلگەن باۋىرىنا ءاردايىم قامقورلىق كورسەتىپ, ۇلگى بولىپ كەلەدى. بولاشاق ساربازدار قاراعاندىداعى №45 گيمنازيادا ءبىلىم الىپ, كەيىن استانا قالاسىنداعى يندۋستريالدى تەحنيكالىق كوللەدجىنە وقۋعا تۇسەدى. اسەمبەك كولىك سلەسارى, ال الەمبەك توكار ماماندىعىن تاڭدايدى. ەگىزدەر وقۋمەن بىرگە سپورتتى دا قاتار الىپ جۇرەدى. ماسەلەن, اسەمبەك كيكبوكسپەن, ال الەمبەك مما-مەن اينالىسقان. جاسى ون سەگىزگە كەلگەن كۇنى ەكەۋى دە اسكەري قىزمەتكە ءوز ەركىمەن كەلىپ, وتانعا ادال قىزمەت ەتۋدى ماقسات تۇتقان ەدى. بۇگىندە ەگىز ۇلدار ۇلتتىق ۇلان قاتارىندا ەلدىڭ تىنىشتىعىن قورعاپ, قاۋىپسىزدىگىن قورعاۋدا قىراعىلىق تانىتىپ كەلەدى.
اسكەري بولىمشەدە اسەمبەك پەن الەمبەكتەن باسقا, قوستاناي وبلىسىنان كەلگەن نۇرسۇلتان مەن ەرسۇلتان اتتى اعايىندىلار دا بار ەكەن. ولار دا اسكەر قاتارىندا قىزمەت ەتۋدى زور ماقتانىش دەپ بىلەدى. ەكەۋى دە ى.التىنسارين اتىنداعى مەكتەپتەن تۇلەپ شىعىپ, يندۋستريالدىق پەداگوگيكالىق كوللەدجىندە ءبىلىم الادى. وقۋدى ءساتتى اياقتاعان سوڭ تىنىشتىق ساقشىسى اتانىپ, ەل قاۋىپسىزدىگىن قورعاۋعا وزدەرى سۇرانىپ كەلگەن.
– قارالى قاڭتاردان كەيىن اسكەرگە بارۋدى ءجون سانادىق. باسىندا اتا-انامىزدىڭ قارسى بولعانى راس. بىراق اكەمىز بەن اعامىز تاڭداۋىمىزدى قولداپ, باتاسىن بەردى. ءبىزدىڭ ماقسات – وتانىمىزدى قورعاۋ جانە ازاماتتىق بورىشىمىزدى اتقارىپ, ۇلكەن ابىرويمەن ۇيگە ورالۋ. اتا-انامىزدىڭ, ەلدىڭ ماقتانىشى بولۋدى ارماندايمىز, دەيدى اعايىندى ساربازدار.
مەرزىمدى قىزمەتىن وتەۋگە بار ىنتا-جىگەرىمەن كەلگەن اعايىندىلار تۋعان جەردىڭ تىنىشتىعىن ساقتاۋ جولىندا ءبىر-بىرىنە قولداۋ كورسەتىپ, كەدەرگىلەردى بىرگە ەڭسەرۋگە سەرت بەرگەن. وزدەرى ايتپاقشى, ۇلتجاندىلىقتىڭ ۇلگىسى بولىپ, ەل بولاشاعىنا قالتقىسىز قىزمەت ەتۋ, بولاشاق ۇرپاقتىڭ الاڭسىز ۇيقىسى ءۇشىن ۇلەس قوسۋدان اسقان باقىت جوق.
