الاش بايتاعىنىڭ اق مارجانى – اقتاۋ قالاسى 2025 جىلى تۇركى الەمىنىڭ مادەني استاناسى رەتىندە ىسكە كىرىسەدى. تۇرىكمەنستانداعى تاريحي قالا اناۋ بيىل تۇركى مادەنيەتىنىڭ استاناسى رەتىندە جىل بويى تۇركىتىلدەس باۋىرلاردى وزدەرىندە قابىلداپ, ءتۇرلى مادەني ءىس-شارالار ۇيىمداستىرعان بولاتىن. مادەني استانا بولعانداعى نەگىزگى ماقسات-مىندەت تە سول – باۋىر ەلدەردى رۋحاني-مادەني تۇرعىدا بىرىكتىرىپ, مادەني-تاريحي قۇندىلىقتاردى ناسيحاتتاۋ.
«اقتاۋ – تۇركى الەمىنىڭ مادەني استاناسى» مەرەيلى جىلى اياسىندا 2025 جىلدىڭ ناۋرىز ايىنان باستاپ اقتاۋ قالاسىندا اتالعان ءىس-شارانىڭ سالتاناتتى اشىلۋى بولادى. سونىمەن قاتار تۇركىتىلدەس ۇلتتار اراسىنداعى باۋىرلاستىق قارىم-قاتىناس پەن دوستىقتى, ورتاق مادەنيەت پەن ونەردى ۇرپاقتان-ۇرپاققا جەتكىزىپ, ونى الەمگە تانىتۋ ماقساتىندا تۇركىتىلدەس مەملەكەتتەر ونەرپازدارىنىڭ قاتىسۋىمەن تەاتر وپەرا, بي, ءداستۇرلى ونەر جانە باسقا دا كوپتەگەن بايقاۋ مەن فەستيۆال ۇيىمداستىرىلادى. اقىندار ايتىسى, تۇركى الەمى سۋرەتشىلەرىنىڭ سيمپوزيۋمى, قولونەر شەبەرلەرىنىڭ فەستيۆالى, تاريحي-عىلىمي كونفەرەنتسيالار, اقىن-جازۋشىلارمەن كەزدەسۋلەر, تۇركى الەمىنىڭ ۇلى عۇلامالارىنىڭ ءومىرى مەن ەڭبەكتەرىنە ارنالعان جيىندار وتكىزىلىپ, وزگە دە ماعىنالى, تاعىلىمدى ءىس-شارالار دا نازاردان تىس قالمايدى.
ماڭعىستاۋلىق ونەرپازدار اناۋ قالاسىنداعى جابىلۋ سالتاناتىنا بارىپ, ەستافەتانى اقتاۋعا جەتكىزدى. ماڭعىستاۋلىق ونەرپازداردى ارىپتەستەرى اۋەزدى انمەن قۋانا قارسى الدى. «جورعا» بي ءانسامبلىنىڭ كوركەمدىك جەتەكشىسى سەرىك ساريەۆتىڭ ايتۋىنشا, حالىقارالىق دەڭگەيدەگى شارادا دوستىق جانە ىنتىماقتاستىق اتموسفەراسى قاتتى سەزىلگەن.
«ونەرپازدارمەن بىرگە تاريحي ءساتتىڭ كۋاسى بولدىق. جالپى, ءىس-شارا اياسىندا قازاقستان, وزبەكستان, قىرعىزستان, تۇركيا جانە تۇرىكمەنستاننىڭ تۇكپىر-تۇكپىرىنەن كەلگەن اسپاپشىلار مەن انشىلەردىڭ شەرۋى ۇيىمداستىرىلدى. حالىقارالىق دەڭگەيدەگى شارادا دوستىق جانە ىنتىماقتاستىق اتموسفەراسىنىڭ جىلى لەبى ەسىپ تۇردى. ءبىز بۇل شاراعا ۇلكەن دايىندىقپەن 20 ونەرپاز بولىپ باردىق. ونىڭ ىشىندە «اقشاعىل» ەتنوفولكلورلىق ءانسامبلدىڭ 2 ونەرپازى بىرنەشە اسپاپتا ويناۋ ارقىلى قويىلىمدى ەرەكشەلەندىردى. ماقتانىشىمىز ايگۇل قوسانوۆا مەن «جورعا» بي ءانسامبلىنىڭ كورەرمەندەرگە بىرىككەن قويىلىمدى پاش ەتتى. سونداي-اق شارادا ماڭعىستاۋ ءوڭىرى تۋرالى بەس مينۋتتىق فيلم كورسەتىلدى», دەدى «جورعا» بي ءانسامبلىنىڭ كوركەمدىك جەتەكشىسى سەرىك ساريەۆ.
ماڭعىستاۋ وبلىسى
