فوتو: altainews.kz
«قالامىزدىڭ وركەندەۋىنىڭ نەگىزى – تۇراقتىلىق, قوعامدىق كەلىسىم, بەيبىتشىلىك جانە ءتارتىپ. ءبىز قيىن ساتتەردى بىرگە ەڭسەرىپ, ولاردىڭ شەشىمىن تابۋدا بىرلەسىپ ارەكەت ەتتىك. مەملەكەت باسشىسىنىڭ قولداۋىن ۇنەمى سەزىپ كەلەمىز. ريددەر جىلۋ ەلەكتر ورتالىعىن قايتا قالىپقا كەلتىرۋ ءۇشىن اتقارىلعان جۇمىستاردىڭ اۋقىمىن كورىپ وتىرمىز. قالپىنا كەلتىرۋ جۇمىستارىنا 16 ميلليارد تەڭگەدەن استام قاراجات ءبولىندى. 20 شاقىرىمنان استام جىلۋ جەلىلەرى جوندەلدى», دەلىنگەن ۇندەۋدە.
ريددەر تۇرعىندارى كوپسالالى اۋرۋحانا كەشەنىنىڭ قۇرىلىسىن اياقتاۋعا 28 ميلليارد تەڭگە ءبولۋ تۋرالى بۇگىنگى شەشىمدى ەرەكشە ىقىلاسپەن قابىلدادى.
سونىمەن قاتار, ۇندەۋدە ەلىمىزدە بىرىڭعاي ۋاقىت بەلدەۋىن ەنگىزۋ ماسەلەسى دە قوزعالدى.
«شىعىس جۇرتى ارقاشان مەملەكەت باستامالارىن العاشقىلاردىڭ ءبىرى بولىپ قولدايدى. بۇل جولى دا ءدال سولاي. جاڭا ۋاقىت بەلدەۋىنە كوشۋ – ەلىمىزدىڭ ءتيىمدى جۇمىس ىستەۋ مۇددەسىنە ساي ۇكىمەت قابىلداعان ستراتەگيالىق شەشىمى. ءبىز بۇل ماسەلەنىڭ قوعامدا الاۋىزدىق تۋدىرۋىنا جول بەرمەيمىز جانە بارلىق قازاقستاندىقتاردى بۇل وزگەرىستەرگە تۇسىنىستىكپەن ءارى وپتيميستىك كوزقاراسپەن قاراۋعا شاقىرامىز», دەيدى ريددەرلىكتەر.
ۇندەۋدىڭ سوڭىندا ريددەر قالاسىنىڭ قوعامدىق كەڭەسى مەن قالالىق ءماسليحات دەپۋتاتتارى ماڭىزدى الەۋمەتتىك جانە ەكونوميكالىق ماسەلەلەردى شەشۋ ءۇشىن بارلىق قازاقستان حالقىن جۇمىلا قيمىلداۋعا شاقىردى.
