فوتو: وقۋ-اعارتۋ مينيسترلىگى
ۇكىمەت باسشىسىنىڭ تاپسىرماسىنا سايكەس وقۋ-اعارتۋ مينيسترلىگى دەنساۋلىق ساقتاۋ مينيسترلىگىمەن بىرلەسىپ ەلىمىزدەگى مەكتەپ اسحانالارىنىڭ سانيتاريالىق-ەپيدەميولوگيالىق تالاپتارعا سايكەستىگىنە مونيتورينگ جۇرگىزدى. رەسپۋبليكالىق مونيتورينگتىڭ قورىتىندىلارى تۋرالى عاني بەيسەمباەۆ باياندادى.
وقۋ-اعارتۋ ءمينيسترى رەسپۋبليكالىق مونيتورينگ قورىتىندىسىندا مەكتەپتەگى تاماقتاندىرۋدىڭ ۇيىمداستىرىلۋ ساپاسىنا قاتىستى سۇراقتاردىڭ تۋىنداۋى اتقارۋشى ورگاندار تاراپىنان ءالى دە بولسا باقىلاۋدىڭ جەتكىلىكسىزدىگىن كورسەتكەنىن, سونداي-اق مۇنى زاڭناما تالاپتارىنىڭ بۇزىلۋ فاكتىلەرىنەن دە انىق اڭعارۋعا بولاتىنىن اتاپ ءوتتى. مونيتورينگ توبى زاڭ تالاپتارىن بۇزىلۋى بويىنشا 771 فاكتىنى انىقتاعان.
سونداي-اق مينيسترلىك مەكتەپتە تاماقتاندىرۋدى ۇيىمداستىرۋ بويىنشا كەشەندى باعالاۋ جۇرگىزدى. باعالاۋ كەزىندە تاماقتاندىرۋ ساپاسىنا جۇرگىزىلگەن مونيتورينگ ناتيجەلەرى, اسحانالاردىڭ قاجەتتى ماتەريالدىق-تەحنيكالىق جابدىقتالۋى, 1 وقۋشىعا شاققانداعى وڭىرلەردەگى تاماقتانۋ قۇنى, اتا-انالار اراسىندا جۇرگىزىلگەن ساۋالناما ناتيجەلەرى ەسكەرىلدى. ونىڭ ناتيجەسىندە جامبىل, ماڭعىستاۋ, الماتى, اتىراۋ وبلىستارىنىڭ جانە شىمكەنت قالاسى اكىمدىكتەرىنىڭ تاراپىنان مەكتەپتەردە ساپالى تاماقتانۋدى ۇيىمداستىرۋعا ءتيىستى دەڭگەيدە كوڭىل بولىنبەي وتىرعاندىعى انىقتالدى.
«قازىرگى تاڭدا مينيسترلىك مەكتەپتە تاماقتاندىرۋ قىزمەتتەرىن ساتىپ الۋ كەزىندە ءونىم بەرۋشىلەردى ىرىكتەۋ تالاپتارىن بۇزعانى ءۇشىن لاۋازىمدى تۇلعالارعا اكىمشىلىك جاۋاپكەرشىلىك ەنگىزۋ ماسەلەسىن پىسىقتاۋدا», دەپ قورىتىندىلادى عاني بەيسەمباەۆ.
ەستەرىڭىزگە سالا كەتەيىك, بۇعان دەيىن مينيسترلىك تالاپتاردى كۇشەيتىپ, ءبىلىم بەرۋ ۇيىمدارىندا تاماقتاندىرۋدى ۇيىمداستىرۋعا قاتىستى 7 ءنورماتيۆتى-قۇقىقتىق اكتىنى قايتا قاراعان بولاتىن.
