اتىراۋ سوتتارىندا 27 175 ءىس قارالدى

اتىراۋ. 30 قاڭتار. اتىراۋ وبلىسى سوتتارىنىڭ سۋديالارىمەن 27175 ءىستى قارالدى. بۇل تۋرالى وبلىستىق سوت حابارلادى. سوت ورگاندارىنىڭ جەتىستىكتەرى مەن جىبەرىلگەن كەمشىلىكتەرى تالدانعان القا وتىرىسىندا وبلىستىق سوت توراعاسى مۇحتار سماعۇلوۆ سۋديالار كورپۋسى ءۇشىن سوت تورەلىگىن جۇزەگە اسىرۋدىڭ ساپاسىن جاقسارتۋ, سوت وتىرىستارىنىڭ جاريالىلىعى مەن قول جەتىمدىلىگىن قامتاماسىز ەتۋ, سوت جۇيەسىنىڭ ءيميدجىن كوتەرۋدى كەڭىنەن ناسيحاتتاۋ, جەمقورلىققا قارسى باتىل كۇرەس جۇرگىزۋ, سۋديالار قاتارىن كاسىبي شەبەرلىگى تومەن, ادامگەرشىلىك-مورالدىق بەينەسى كۇماندى ادامداردان ارىلتۋ جونىندە كەڭىنەن توقتالدى. توراعانىڭ ءمالىم ەتۋىنشە, بىلتىر ءوڭىر سوتتارىندا 27 175 ءىس قارالدى. ونىڭ ىشىندە 1995-تەن استامى ازاماتتىق, 1 507 قىلمىستىق, 23 673-تەن استام اكىمشىلىك قۇقىق بۇزۋشىلىق تۋرالى ىستەر بار. سۋديا مەدياتورلاردىڭ قاراۋىنا 706 ءىس بەرىلگەن. سوت شەشىمدەرىن شىعارعان كەزدە باس بوستاندىعىنان ايىرماي جازا تاعايىنداۋدىڭ ۇلەس سالماعى كوبەيە تۇسۋدە. توعىز ادامعا قاتىستى اقتاۋ ۇكىمى شىعارىلدى. «سونىمەن بىرگە, بىلتىرعى جىلدىڭ شىلدەسىنەن بەرى قولدارىندا تسيفرلى ەلەكتروندى قولتاڭبالارى بار ازاماتتارعا «سوت كابينەتى» ارقىلى تالاپ ارىزدارىن, سوت وتىرىستارىنىڭ حاتتامالارى مەن حاتتامالارعا ەسكەرتۋلەردى, ۇسىنىستارىن جىبەرۋگە, ەلەكتروندى كوشىرمەلەرىن الۋعا مۇمكىندىك تۋدى. وسى جوبا اياسىندا, ياعني, «سوت كابينەتى» ارقىلى 2442 ەلەكتروندى تالاپ ارىز, 9 حاتتاماعا ەسكەرتۋ, 902 حاتتامانىڭ كوشىرمەسىن الۋعا ءوتىنىش, 56 ەلەكتروندى شاعىم, بارلىعى 30409 ءوتىنىش كەلىپ ءتۇستى», دەدى وبلىستىق سوتتىڭ توراعاسى مۇحتار سماعۇلوۆ. جولداسبەك شوپەعۇل. دەرەك, سۋرەت: اتىراۋ وبلىستىق سوتى.