بەستاماق وقۋ وشاعىنداعى وزىق تاجىريبە

وڭىر­دە­گى 134 اۋىل مەكتەبىنىڭ باسىنداعى جاعداي ۇقساس: وقۋشى سانى از, ءپان مۇعا­لىم­دەرى جە­تىسپەيدى, وقۋ-ماتەريالدىق بازا ەسكىرگەن, ينتەرنەت بايلانىسى ءالسىز. قالا مەن اۋىل مەك­تەپتەرى اراسىنداعى ءبىلىم دەڭگەيىنىڭ ايىرماشىلىعىن جويۋ ماقساتىندا وقۋ-اعار­تۋ مينيسترلىگى ء«بىلىم بەرۋ سالاسىن تۇراقتى دامى­تۋ قورى» مەن «قازاقستان حال­قىنا» قورىنىڭ قار­جى­لاي قولداۋىمەن بىرنەشە با­عىت­تا جۇمىس باس­تادى.

ەڭ الدىمەن اۋىل مۇعالىمدەرىن وقى­تۋ­دى اقتوبەدەگى نازارباەۆ زياتكەرلىك مەكتەبى قولعا الدى. شاعىن جيناقتى مەكتەپتەردىڭ بىرەگەي ۇلگىسى رەتىندە العا اۋدانىنىڭ بەستاماق ورتا مەكتەبى تاڭدالىپ الىندى. وسى ءبىلىم بەرۋ ۇيىمىنا تولىق جوندەۋ جۇرگىزىلىپ, پاندىك كابينەتتەر جاڭارتىلدى. ودان وزگە روبوتتەحنيكا كابينەتى, تەلەستۋديا, اعاش جانە مەتالل وندەۋ كابينەتتەرى, تىگىن شەبەرحاناسى مەن اعاش وڭدەيتىن ۇستاحانا, ارت-ستۋديا جاساقتالدى. مۇعالىمدەر اقتوبەدەگى NIS-دە سەمينارلارعا قاتىسىپ, ونلاين ءدارىس الدى.

بەستاماق ورتا مەكتەبىنىڭ ديرەكتورى اسەل داۋلەتالينانىڭ ايتۋىنشا, بىرنەشە تەگىن ۇيىرمە بالالاردىڭ قىزىعۋشىلىعىن وياتتى. سونىڭ ناتي­جەسىندە, بەستاماق مەك­تە­بىنىڭ وقۋشىلارى روبوتتەحنيكادان وتكەن سايىستاردا جۇلدەلى ورىنعا قول جەتكىزدى. ءبىر جىل ىشىندە وسى ءبىلىم مەكەمەسىندە وقۋشىلاردىڭ ساباق ۇلگەرىمى 6%-عا ءوسىپ, بىلتىرعى تۇلەكتەر تۇگەل وقۋعا تۇسكەن.

بەستاماق مەكتەبىنىڭ توعىز مۇعالىمى العا اۋدا­نىنداعى بەسقوسپا, تالدىساي جانە ا.بايتۇرسىنوۆ اتىنداعى شاعىن جيناقتى مەكتەپتەردە نەگىزگى پاندەر بويىنشا ونلاين-ساباقتار مەن سەمينارلار وتكىزىپ ءجۇر. بۇل جوباعا قاتىسۋشى تىرەك جانە ماگنيتتىك مەكتەپتەر اراسىندا ينتەرنەت بايلانىسى قاجەت بولعاندىقتان, «KazSat» سپۋتنيك جۇيەسى اقىلى ينتەرنەت جۇرگىزىلدى. «وسى جوبا ءبىلىم بەرۋ ورىندارىنىڭ جاعدايىن جاقسارتىپ قانا قويماي, وقۋشىلاردىڭ بىلىمگە دەگەن قىزىعۋشىلىعىن ارتتىردى. شاعىن جيناقتى مەكتەپتىڭ وقۋشىلارى وبلىستىق جانە حالىقارالىق وليمپيادالارداعى ۇزدىك ناتيجە كورسەتتى. جوباعا قاتىسقان تىرەك جانە ماگنيتتىك مەكتەپتەردە ءبىلىم ساپاسىنىڭ ءوسۋى بايقالادى», دەيدى اقتوبە وبلىستىق ءبىلىم باسقارماسى باسشىسىنىڭ ورىنباسارى نۇرگۇل بەرتىلەۋوۆا.

بۇدان بولەك, وقۋ-اعارتۋ مينيسترلىگىنىڭ تاپسىرماسىمەن اقتوبە وبلىسىندا ون ءبىلىم بەرۋ وكرۋگىن اشۋ جوسپارلانىپ وتىر. 2025 جىلدىڭ باسىندا قۇرىلاتىن بەس وكرۋگتىڭ ەكەۋى وبلىس ورتالىعىندا, ۇشەۋى قاندىاعاش, شالقار جانە حرومتاۋ قالا­لا­رىن­داعى مەكتەپ-گيمنازيالاردا اشىلادى. وكرۋگتىك مەكتەپتەردەگى ناتيجەلى تاربيە ءۇردىسى جانە وزىق وقىتۋ تاسىلدەرى ولارعا بەكىتىلگەن مەكتەپتەرگە ەنگىزىلەدى. ماسەلەن, اقتوبەدەگى د.قوناەۆ اتىنداعى مەكتەپ-گيمنازياسىنا 15 مەكتەپ, ءال-فارابي اتىنداعى № 21 گيمنازياسىنا 24 مەكتەپ بەكىتىلدى.

اقتوبە وبلىسى