كۇدايبەرگەننىڭ عىلىمعا قىزىعۋشىلىعى مەكتەپ كەزىندە باستالعان. اقتوبەدەگى قازاق-تۇرىك ليتسەيىندە وقىپ جۇرگەندە ول ايزەك ءازىموۆتىڭ روبوتتار تۋرالى اڭگىمەلەرىنە اۋەستەنىپ, بولاشاعىن روبوتتەحنيكامەن بايلانىستىرادى. وسىدان كەيىن يننوۆاتسيالىق جوبالار جاساۋدى ارماندايدى. ينجەنەردىڭ ارمانى نازارباەۆ ۋنيۆەرسيتەتىندە وقىپ جۇرگەندە ورىندالادى. ول ءوزى سەكىلدى ستۋدەنت جاستارمەن بىرىگىپ العاشقى جوباسىن جۇزەگە اسىرادى.
«العاشقى ستارتاپ ستۋدەنتتىك كەزىمدە پايدا بولدى. 2018 جىلى كۋرستاستارىممەن بىرگە رەنتگەن سۋرەتتەرى ارقىلى 14 ءتۇرلى اۋرۋدى انىقتايتىن راديولوگيالىق جاساندى ينتەللەكت جوباسىن جاساپ شىعاردىق. «IEEE EMBC» اتتى بيومەديتسينالىق كونفەرەنتسيادا جوبانى تانىستىرىپ, ونى كوممەرتسيالاندىرۋدى جوسپارلادىق. بىراق ستارتاپتى ۋاقىتشا توقتاتۋعا تۋرا كەلدى, سەبەبى مەديتسينالىق تەحنولوگيالار سالاسىن دامىتۋعا كوبىرەك تاجىريبە قاجەت بولدى, ال ەلىمىزدە بۇل سالا جەتكىلىكتى دەڭگەيدە دامىماعان. سوندىقتان شەتەلدەگى «MedTech» سالاسىنداعى بيزنەستىڭ قالاي جۇرگىزىلەتىنىن كورگىم كەلدى», دەيدى ول.
شەتەلگە بارىپ, ءبىلىمىن جەتىلدىرۋگە شەشىم قابىلداعان قۇدايبەرگەن «Erasmus Mundus Joint Master’s Degree» باعدارلاماسىنا قاتىسۋعا ءوتىنىش بەرىپ, فرانتسيا, يتاليا, يسپانيا ەلدەرىندە وقيدى. بۇل ىزدەنىس وعان مەديتسينالىق سۋرەتتەردى وڭدەۋ سالاسىندا تەرەڭ ءبىلىم الۋعا مۇمكىندىك بەرگەن. ونىڭ ايتۋىنشا, باعدارلامانىڭ ارتىقشىلىعى دا كوپ.
«وسىنداي وقۋ باعدارلامالارى تاجىريبە جيناۋعا كوپ كومەكتەسەدى. سوندىقتان ىزدەنىس جولىندا جۇرگەن جاندارعا مۇمكىندىكتى پايدالانۋعا كەڭەس بەرەمىن. جاساندى ينتەللەكتىدەن باستاپ دەرەكتى فيلم تۇسىرۋگە دەيىن ءارتۇرلى ماماندىقتى يگەرۋگە بولادى. ەڭ باستىسى, بۇل ءبىلىم تەگىن, ۋنيۆەرسيتەت ۇشۋ شىعىندارىن دا وتەپ بەرەدى, ستيپەندياسى دا جوعارى. قويىلاتىن نەگىزگى تالاپتار – باكالاۆر دارەجەسىنىڭ بولۋى مەن اعىلشىن ءتىلىن جاقسى مەڭگەرۋ» دەيدى ينجەنەر.
وقۋدى تامامداعاننان كەيىن قۇدايبەرگەن ەۋروپاداعى ءىرى كومپانيالاردا جۇمىس ىستەيدى. ماگيستراتۋرادا وقىپ جۇرگەن كەزىندە كۇدايبەرگەن تاجىريبەدەن ءوتۋ ءۇشىن ميۋنحەندەگى «iThera Medical» كومپانياسىنا قابىلدانادى. مۇندا ول ۋلترادىبىستىق سۋرەتتەردى قاجەتسىز شۋدان تازارتۋ الگوريتمىن جاساۋمەن اينالىسقان. كەيىن «لەيپتسيگتەگى Raylytic» كومپانياسىنان شاقىرتۋ الىپ, رەنتگەن سۋرەتتەرىنەن ومىرتقانىڭ سپيندىك پارامەترلەرىن ەسەپتەيتىن الگوريتم جاساپ, وسى تاقىرىپتا عىلىمي ماقالا جاريالايدى.
«وقۋ سوڭىندا ۋنيۆەرسيتەت تاجىريبە وتەتىن كومپانيالار ءتىزىمىن ۇسىندى. بىراق مەن جوبامدى جەتىلدىرۋگە قاتىستى تاجىريبە جيناعىم كەلدى. لايىق ورىندى ابدەن ىزدەپ, «ميۋنحەندەگى iThera Medical» كومپانياسىنا قابىلداندىم. وندا ۋدز سۋرەتتەرىنەن قاجەتسىز شۋدى تازارتاتىن جاساندى ينتەللەكت الگوريتمىن جازۋمەن اينالىستىم. كەيىن كومپانيا «software engineer» رەتىندە قالۋدى ۇسىندى. الايدا جاساندى ينتەللەكت سالاسىندا جۇمىسىمدى جالعاستىرۋدى تاڭدادىم. سوندىقتان باسقا جۇمىس ىزدەدىم. 70-كە جۋىق كومپانياعا ءوتىنىش بەرىپ, ءبىر اي بويى سۇحباتتارعا قاتىستىم. ناتيجەسىندە, گەرمانيانىڭ لەيپتسيگ قالاسىنداعى «Raylytic» كومپانياسىنان ۇسىنىس الدىم. مۇندا رەنتگەن سۋرەتتەرىندەگى ومىرتقا پارامەترلەرىن ەسەپتەيتىن الگوريتم جاساۋمەن اينالىستىم», دەيدى قۇدايبەرگەن ورىنباەۆ.
تاجىريبە جيناعاننان كەيىن قۇدايبەرگەن جەكە ستارتاپىن قۇرۋعا بەل بۋعان. ول پاريجدە «Entrepreneur First» باعدارلاماسىنا قاتىسىپ, سەرىكتەسىمەن بىرگە مەديتسينالىق تەحنولوگيالار سالاسىندا ءونىم ازىرلەۋگە تالپىنىپ تا كورگەن. الايدا ەۋروپالىق «MedTech» نارىعىنىڭ كۇردەلى ءارى ۇزاقمەرزىمدى ۇدەرىستەرىنىڭ كوپ بولۋىنان جوبا توقتاپ قالعان. بۇل ساتسىزدىككە قاراماستان, قۇدايبەرگەننىڭ ستارتاپقا دەگەن قىزىعۋشىلىعى ارتا تۇسەدى. تاباندى ەڭبەگى مەن تالپىنىسىنىڭ ارقاسىندا قازىر ول پاريجدە ورنالاسقان جاڭا ستارتاپتىڭ تەڭ قۇرىلتايشىسى. كومپانيا سپورتتىق ءىس-شارالاردى تۇسىرۋگە ارنالعان اۆتونومدى روبوتتاندىرىلعان كامەرا ازىرلەۋمەن اينالىسادى. بۇل كامەرا جاساندى ينتەللەكتىنىڭ كومەگىمەن فۋتبول ماتچتارىن اۆتوماتتى تۇردە تۇسىرەدى.
ء«بىر جىل جۇمىس ىستەگەن سوڭ ءوز جوبامدى جاساۋعا دايىن ەكەنىمدى ءتۇسىندىم. پاريجدەگى «Entrepreneur First» باعدارلاماسىنا قاتىسىپ, سەرىكتەس تاۋىپ, ويلارىمدى جۇزەگە اسىرۋعا مۇمكىندىك الدىم. فرانتسۋز سەرىكتەسىممەن بىرگە ەندومەتريوزدى انىقتايتىن ءونىم جاسادىق. بىراق «MedTech» نارىعىنا شىعۋ وتە قيىن ۇدەرىس بولدى. ناتيجەسىندە, جوبانى توقتاتۋعا تۋرا كەلدى. قازىر پاريجدىك ستارتاپ اياسىندا ەكىنشى جانە ءۇشىنشى ليگاداعى فۋتبول ماتچتارىن تۇسىرۋگە ارنالعان اۆتونومدى كامەرا جاساپ جاتىرمىز. قازىرگى ۋاقىتتا 80 مىڭ ەۋرو ينۆەستيتسيا تارتتىق. وسى جىلدىڭ قازان ايىندا مارراكەشتە العاشقى رەسمي ماتچتى تۇسىردىك», دەيدى ونەرتاپقىش.
قۇدايبەرگەن بولاشاقتا جيناعان ءبىلىمىن وتانداستىرىمىزبەن ءبولىسىپ, جاستارعا جاڭا مۇمكىندىكتەر جاساۋعا نيەتتى. قازىردىڭ ءوزىن دە ينجەنەر «Aqtobe Hub» الاڭىندا ءدارىس وقىپ, جەرلەستەرىنە ءوز تاجىريبەسىن ءبولىسىپ وتىرادى ەكەن.
«جاقىندا «Aqtobe Hub»-تا ەۋروپاداعى مەدتەح كاسىپكەرلىك تۋرالى ءدارىس وقىدىم. بولاشاقتا دا ءوز ءبىلىمىمدى ءبولىسىپ, وتانداستىرىمىزعا ەۋروپادا ءبىلىم الۋ نەمەسە جۇمىس ىستەۋ مۇمكىندىگىنە يە بولۋىنا كومەكتەسكىم كەلەدى. پاريج – جاساندى ينتەللەكت سالاسىنداعى ماڭىزدى ورتالىقتاردىڭ ءبىرى. وتاندىق ستارتاپتار ەۋروپا نارىعىنا شىعۋدى قالاسا, نەتۆوركينككە ەرەكشە كوڭىل ءبولۋى كەرەك», دەيدى ق.ورىنباەۆ.
جاس ينجەنەردىڭ تاجىريبەسى ەلىمىزدەگى عىلىم مەن تەحنولوگيا سالاسىنىڭ شەتەلدىك ەكوجۇيەمەن بايلانىسىن نىعايتۋدىڭ ماڭىزدى ەكەنىن ايقىندايدى. ول ەلىمىزدەگى ماماندارعا باسەكەگە قابىلەتتى ءبىلىم مەن تاجىريبە جيناقتاۋ قاجەتتىلىگىن كورسەتىپ, حالىقارالىق دەڭگەيگە شىعۋ مۇمكىندىكتەرىن كەڭەيتۋگە ۇلەس قوسىپ وتىر.
