نۇرسۇلتان نازارباەۆتىڭ قازاقستان رەسپۋبليكاسىنىڭ پرەزيدەنتى لاۋازىمىنا رەسمي كىرىسۋىنىڭ
سالتاناتتى ءراسىمىن تىكەلەي ەفير ارقىلى تاماشالاعان وتانداستارىمىزدىڭ ورتاق ويى وسى
الماتى ق.ي.ساتباەۆ اتىنداعى قازۇتۋ-دە ستۋدەنتتەر مەن قىزمەتكەرلەر پرەزيدەنتتىڭ سالتاناتتى ۇلىقتاۋ ءراسىمىن تەلەديداردان تاماشالادى. اتاپ وتەر جاعداي, ساياسي ناۋقان كۇنى ۋنيۆەرسيتەت ستۋدەنتتەرى مەن قىزمەتكەرلەرى العاشقىلاردىڭ ءبىرى بولىپ 100 پايىز قاتىسۋمەن بەلسەندىلىك تانىتتى. ولاردىڭ قاتارىندا 1000 ستۋدەنت العاش رەت داۋىس بەردى. ۇلىقتاۋ ءراسىمىن كورگەن قاي ادامنىڭ دا كوڭىلى تولقىدى دەپ بىلەمىز. سەبەبى, بىزدەر تاريحي ءساتتىڭ كۋاسى بولدىق. بىزدەن كەيىنگى تولقىن, كەلەر ۇرپاق تاريحتان وقيتىن ءساتتىڭ ىشىندە بولىپ, سونىڭ اۋاسىمەن تىنىستادىق. «ءبىز ۇرپاققا كوركەيگەن ەلدى, نىعايعان بىرلىكتى, مىزعىماس تۇراقتىلىق پەن ەسەلەنگەن بايلىقتى ميراس ەتەمىز, دامۋدىڭ داڭعىلىنا تىڭ قارقىنمەن اياق باسامىز. بەس حالىقتىق رەفورمانى تابىستى جۇزەگە اسىرىپ, بولاشاعى ءبىرتۇتاس ەلگە اينالامىز», – دەدى ەلباسى. پرەزيدەنتتىڭ رەفورماسىن قولداي وتىرىپ, ۋنيۆەرسيتەتىمىز عىلىمي-يننوۆاتسيالىق قىزمەتى تاراپىنان ەلىمىزدىڭ ستراتەگيالىق ماقساتىن جۇزەگە اسىرۋعا, وتاندىق جانە شەتەلدىك كومپانيالارمەن سەرىكتەستىك قاتىناسىن دامىتۋعا, قازاقستان ەكونوميكاسىنىڭ عىلىمي-تەحنولوگيالىق دامۋىنا باعىتتالعان مىندەتتەردى ورىنداۋعا بار كۇشىن سالادى. ريمما جانباەۆا, قازۇتۋ-دىڭ اقپاراتتىق-تالداۋ ورتالىعىنىڭ باس مامانى. اقتوبە كەشە استاناداعى تاۋەلسىزدىك سارايىندا قازاقستان پرەزيدەنتى نۇرسۇلتان نازارباەۆتى ۇلىقتاۋ ءراسىمىن تەلەديداردان كورىپ, ەگەمەندى ەلىمىزدىڭ ابىرويىن اسقاقتاتار تاعى ءبىر تاريحي ماڭىزدى وقيعاعا كۋا بولدىق. ەلباسىنىڭ قازاقستان حالقىنا انت بەرۋ ءساتى ەلدىكتىڭ سالتاناتىنداي اسەرگە بولەدى. مۇنى جالعىز مەن عانا ەمەس, بارشا قازاقستاندىقتار اسىعا كۇتكەنى شىندىق. ءسويتىپ, ەگەمەن ەلىمىز ەلباسىن ۇلىقتاۋ ءراسىمىن باستان وتكەردى. مۇنىڭ ءوزى قازاقستاننىڭ دەموكراتيالىق جانە ساياسي دامۋدىڭ داڭعىل جولىمەن وركەنيەتتى ەلدەر قاتارىنا ەركىن ەنگەنىنىڭ ايقىن مىسالى. ەلباسى نۇرسۇلتان نازارباەۆتىڭ ۇلىقتاۋ راسىمىندە سويلەگەن ءسوزىن تىڭداپ, بولاشاعىمىز بۇدان دا نۇرلى بولاتىنىنا سەنىمىمىز نىعايا ءتۇستى. مەملەكەت باسشىسى سايلاۋدىڭ بىرلىگىمىزدىڭ قۋاتىن پاش ەتكەنىنە توقتالا كەلىپ, ەلدىڭ ءارى قاراي دامۋىنىڭ توڭىرەگىندەگى بىرقاتار سىرتقى ىقپالداردى دا اتاپ ءوتتى. «ماڭگىلىك ەل» ۇلتتىق يدەياسىن, «قازاقستان-2050» ستراتەگياسىن, «نۇرلى جول» باعدارلاماسىن, بەس حالىقتىق رەفورمانى جۇزەگە اسىرۋدى جالعاستىرا وتىرىپ, جاڭا بەلەستەردى باعىندىرۋعا باعىت ۇستالىپ وتىرعانىنا كوزىمىز جەتتى. ۇلىقتاۋ راسىمىنەن وركەندەگەنىمىزدى, وسكەنىمىزدى اڭعاردىق. مەن ءوزىم ازەربايجانمىن, زايىبىم قازاق قىزى. ءبىزدىڭ وتباسىنىڭ وزىنەن ەلىمىزدەگى ۇلتتار مەن ۇلىستار اراسىنداعى دوستىق اڭعارىلادى. ال, رەسپۋبليكامىزدا 130-دان استام ۇلتتاردىڭ وكىلدەرى تۇرىپ جاتىر. ەلباسى مەن ەل بىرلىگىنىڭ مەرەيلى ءساتى ءبىزدىڭ ارقايسىمىزدىڭ كوڭىلىمىزدە ماڭگىلىك ورنىعىپ قالارى ءسوزسىز. بۇل – ءبىزدىڭ ورتاق قۋانىشىمىز, بولاشاعىمىزدىڭ باستاۋ بۇلاعى. ەرتەڭىنە ەركىن قادام باسقان قازاقستاننىڭ شىعار بيىگى, الار اسۋى الاسارماسىن. قازاقستاندى اسا دامىعان 30 ەلدىڭ قاتارىنا ەنگىزۋگە قۇلشىنا كىرىسكەن ەلباسى نۇرسۇلتان نازارباەۆتىڭ قادامىنا ساتتىلىك تىلەيىك. شاحباز جامالوۆ, «ازەربايجاندار قوعامداستىعى» رەسپۋبليكالىق قوعامدىق بىرلەستىگى اقتوبە قالاسىنداعى فيليالىنىڭ توراعاسى.
كوكشەتاۋ
كوپۇلتتى حالقىمىز استاناداعى تاۋەلسىزدىك سارايىندا قازاقستان پرەزيدەنتى نۇرسۇلتان نازارباەۆتى ۇلىقتاۋ ءراسىمىن ەلىمىزدەگى ۇلىق وقيعا رەتىندە قابىلداعانىنا شەك كەلتىرمەيمىن. ويتكەنى, بۇل جاي عانا مەرەكەلىك ءراسىم ەمەس, بارشامىزدىڭ ۇكىلى ۇمىتتەرىمىز بەن اسىل مۇراتتارىمىزدى تاعى ءبىر جاڭا بەلەسكە كوتەرگەن قادام بولدى.
تاۋەلسىز ەلدىڭ تۇڭعىش پرەزيدەنتى ءوز حالقى الدىنداعى انتىنا ادالدىعىن مۇلتىكسىز ورىنداعان تۇلعا رەتىندە ەلىمىزدىڭ ابىرويىن اسقاقتاتۋدا. وسى جولى دا حالقىمىزعا ادالدىقتان تايماۋعا, زاڭدارىمىزدى قاتاڭ ساقتاۋعا, بارشامىزدىڭ قۇقىقتارىمىز بەن بوستاندىقتارىمىزعا كەپىلدىك بەرۋگە سالتاناتتى تۇردە انت بەرگەندە اسا زور قۇرمەت سەزىمىندە بولدىم. كوڭىلىم جايلانىپ, كوكجيەگىم كەڭەيە ءتۇستى. ءبىز بولاشاعىمىزعا سەنىمدىمىز جانە ەلباسىمىزدىڭ كورەگەندىگى ارقاسىندا سول بولاشاقتى ءوزىمىز جاساپ, ۇرپاقتارىمىزعا اماناتتايتىنىمىز انىق.
قازاق ەلى بيىل اسا مارتەبەلى مەرەكەلەر قۇشاعىندا كۇن كەشۋدە. ەلباسى قۇرعان اسسامبلەيا مەن حالقىمىزدى توپتاستىرعان كونستيتۋتسيامىز 20 جىلدىعىن, قازاق حاندىعىنىڭ 550 جىلدىعىن, ۇلى وتان سوعىسىنداعى جەڭىستىڭ 70 جىلدىعىن اتاپ ءوتۋ سالتاناتىمىزعا قادىرلى پرەزيدەنتىمىزدىڭ سايلانۋ تويى مەرەي قوسا ءتۇستى. ءبىز ەندى جاڭا جىگەرمەن العا باساتىن بولامىز.
ۆالەري سيمچۋك,
قازاقستان حالقى اسسامبلەياسىنىڭ مۇشەسى, اقمولا وبلىستىق ءماسليحاتىنىڭ دەپۋتاتى.
ايقىن تاڭداۋ اداستىرمايدى
استاناداعى پرەزيدەنتتى ۇلىقتاۋ ءراسىمى قىزىلجار وڭىرىندە سالتاناتتى جاعدايدا كەڭىنەن اتاپ ءوتىلدى. م.قوزىباەۆ اتىنداعى سولتۇستىك قازاقستان مەملەكەتتىك ۋنيۆەرسيتەتىنە جينالعان ەتنومادەني بىرلەستىكتەر, ستۋدەنت-جاستار, ۇكىمەتتىك ەمەس ۇيىمدار وكىلدەرى سالتاناتتى ءراسىمدى تىكەلەي ەفير ارقىلى تاماشالاعاننان كەيىن فلەشموب ۇيىمداستىردى. وندا شىڭعىس قۇربانوۆ, ماريا چەرنىشوۆا, الەكساندر پلوتكو, تاعى باسقا سپيكەرلەر ءسوز الىپ, قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆتىڭ يناۋگۋراتسيا بارىسىندا انت بەرۋى وسكەلەڭ ۇرپاقتىڭ بويىنا وتانشىلدىق سەزىمدەرىن قالىپتاستىرۋمەن قاتار, ەرەن جاۋاپكەرشىلىك جۇكتەيتىنىن جەتكىزدى. – جاستار! سەندەر جاڭا عانا مەملەكەت باسشىسىنىڭ سوزدەرىن تەبىرەنە تىڭدادىڭدار. مەن ءبارىڭدى ەلباسىمىز سەكىلدى حالىققا ادال قىزمەت ەتىپ, ەل مەن ۇلت مۇددەسىن الدىڭعى ورىنعا قويۋعا شاقىرامىن. بۇگىندە قازاقستاندى الەمدىك قوعامداستىق جاقسى تانيدى, دەموكراتيالىق ەل رەتىندە مويىندايدى, – دەدى سپيكەرلەردىڭ ءبىرى, جەرگىلىكتى كۇرد قوعامدىق ۇيىمىنىڭ جەتەكشىسى راشيد ناديروۆ. «دوسلۋك» تاتار-باشقۇرت ءمادەني قوعامىنىڭ توراعاسى ءامىر بايازيتوۆتىڭ سوزدەرى دە جارقىن شىقتى. ول ەلباسىنىڭ ۇلىقتاۋ ءراسىمىندە بەلگىلەپ بەرگەن مىندەتتەرىنە توقتالىپ, تاريحتىڭ جاڭا بەتى اشىلعانىن مالىمدەدى. سونداي-اق, كەيىنگى ۇرپاققا قازاقستاندى تابىستاۋ بارشامىزعا ورتاق پارىز, حالىقتىڭ زور سەنىمىن ارقالاۋ ەڭ بيىك مارتەبە, جاڭا عاسىردىڭ سىن-قاتەرلەرىنە توتەپ بەرىپ, وركەنيەتتى ەلدەر قاتارىنا قوسىلۋ – باستى جاۋاپكەرشىلىك, دەگەن ەلباسى تالاپتارى جينالعاندار تاراپىنان قىزۋ قولداۋ تاۋىپ, جىگەرلى ۇران سوزدەرمەن جاۋاپ بەرىلدى. تەك بەيبىتشىلىك, ىنتىماق, كەلىسىم ارقىلى عانا قۋاتتى مەملەكەت بولىپ قالىپتاسامىز, ول ءۇشىن قاجىماي-تالماي ەڭبەك ەتۋ كەرەك, دەگەن وي ءتۇيىلدى جيىندا. ءومىر ەسقالي, «ەگەمەن قازاقستان». سولتۇستىك قازاقستان وبلىسى. سۋرەتتى تۇسىرگەن امانگەلدى بەكمۇراتوۆ.
جاستار قاشاندا ەلباسىمەن بىرگە
كەشە شىمكەنتتەگى «كورمە» ورتالىعىندا ەلباسى نۇرسۇلتان نازارباەۆتىڭ ۇلىقتاۋ ءراسىمىن قولداعان مىڭداعان جاستار فلەشموب ۇيىمداستىردى. قازاقستان سەكىلدى الىپ مەملەكەتكە كىرپىش بولىپ قالانىپ ءجۇرگەن جاستاردىڭ مەملەكەت باسشىسىن ءاردايىم قولداپ, قۇرمەت كورسەتۋى, ۇيىمشىلدىق تانىتۋى ولاردىڭ دەڭگەيىن كورسەتەدى. ەلدىڭ جاقسىلىعىنا, باعىندىرعان بيىگىنە نيەتى تازا, حالقىنا جۇرەگى شىن اشيتىن جاندار عانا قۋانا الادى. – بۇگىن وڭتۇستىكتىڭ 700 مىڭنان استام جاستارى اتىنان فلەشموب ۇيىمداستىرىپ وتىرمىز. جەڭىسكە جەتكەن ەلباسىمىزدى ءبىز – جاستار قولدايمىز, قۋاتتايمىز. ەلباسىمىزدىڭ ەتكەن ەڭبەگى, سارابدال ساياساتى قاشاندا قىز-جىگىتتەر نازارىنان تىس قالعان ەمەس. سوندىقتان دا نۇرلى جولعا, نۇرلى بولاشاققا بىرگە قادام جاسايىق! ەلباسىن قولدايىق! – دەدى «شىمكەنت جاستارى» قوعامدىق بىرلەستىگىنىڭ مۇشەسى جاندوس وسەرباەۆ. باقتيار تايجان, «ەگەمەن قازاقستان». شىمكەنت. سۋرەتتى تۇسىرگەن قايسار شەرىم.
قاراعاندى
ماعان قازىر الىستاعى تاريحي وتانداستارىمنان ەلىمىزدە كەزەكتەن تىس وتكەن پرەزيدەنتتىك سايلاۋعا بايلانىستى وي-پىكىرىمدى ءبىلۋ ءۇشىن حابارلاسۋشىلار كوپ. شىنىن ايتقاندا, ولاردى داۋىس بەرۋشىلەردىڭ سايلاۋعا جاپپاي قاتىسۋى جانە نۇرسۇلتان نازارباەۆتىڭ اسا جوعارى دەڭگەيدە داۋىس جيناۋى تاڭعالدىرعانى سەزىلەدى. ارينە, قازاقستانداعى ىشكى قوعامدىق جاعدايدى سىرتتاي ەستىگەندەرىنەن, جەتە بىلمەۋلەرىنەن بە دەپ ويلايمىن مۇنى. ال بىزگە ەش تاڭدانارلىعى جوقتىعىنا ءومىردىڭ وزىنەن كۋامىز. ەتنوسارالىق دوستىق پەن تاتۋلىق ارقاسىندا ءبارىمىزدى ورتاق ماقساتقا ۇيىستىرعان مەملەكەتتىك سارابدال ساياسات, كەلەشەگىمىزگە بەرىك سەنىمدىلىك وسىنداي ءاۋىزبىرشىلىككە تىعىز توپتاستىرا ءتۇسۋىن ماقتانىش تۇتاتىنىمىزدى ايتامىن.
پرەزيدەنتىمىزدى ۇلىقتاۋ ءراسىمىن تەلەديدار ارقىلى كورىپ, كوڭىلىمىز ماقتانىشقا بولەندى. بۇل سالتاناتقا وبلىستاعى ەتنومادەني بىرلەستىكتەر وكىلدەرى قاتىسۋى بارىمىزگە ورتاق مەرەي بولدى. ەلباسىن بارشا قازاقستاندىقتار ءوز جۇرەك قالاۋىمەن تاڭدادى. حالقىمىزدىڭ پرەزيدەنت نۇرسۇلتان نازارباەۆتى قولداپ, ءبىراۋىزدان ەلىمىزدىڭ العا دامۋىنا, سول ۇلى مۇراتقا بەلسەندىلىكپەن اتسالىسۋعا نيەتتىلىك تانىتۋى ەلدىكتىڭ, وتانشىلدىقتىڭ جەڭىسى بولىپ تابىلاتىندىعى تالاسسىز.
مىزعىماس بىرلىك پەن بۇلجىماس تاتۋلىقتى تۋ ەتكەن وتانىمىزدىڭ ودان ءارى ءوسىپ-وركەندەۋىنە جاڭا جول اشىلۋىنا قۋانىشتىمىز. قازاقستانىمىزبەن, نازارباەۆپەن بىرگەمىز.
ۆيكتور كيست,
«ۆيدەرگەبۋرت» نەمىس ورتالىعى» وبلىستىق قوعامىنىڭ جەتەكشىسى.
«ءبىز ەلباسىن ۇدايى قولدايمىز»
ەلباسى نۇرسۇلتان نازارباەۆتىڭ اتىراۋعا ىقىلاسى ەرەكشە بولسا, مۇنايلى ءوڭىر تۇرعىندارى دا مەملەكەتتىڭ ساياساتىنا ۇدايى قولداۋ ءبىلدىرىپ كەلەدى. سونىڭ جالعاسى سەكىلدى جاس بۋىن وكىلدەرى ەلباسى ساياساتىنا فلەشموب وتكىزۋ ارقىلى قولداۋ ءبىلدىردى. بەيبارىس سۇلتان الاڭىنا جينالعان جاستار پاتريوتتىق اندەر سازىنا بيلەدى. تاۋەلسىز ەلدىڭ كوك بايراعىن بەينەلەدى. – ءبىز, جاس بۋىن وكىلدەرى ەلباسى ساياساتىنىڭ جەمىسىن كورىپ كەلەمىز. ەلىمىز تىنىش, ەكونوميكامىز ءوركەن جايدى. الاڭسىز ءبىلىم الدىق. جۇمىسىمىز بار, جالاقىمىزدى تۇراقتى الىپ تۇرامىز. كەلەشەككە سەنىمىمىز مول, تۋعان وتانىمىز – قازاقستان بارىنەن قىمبات. وتانىڭا, تۋعان جەرگە جەتەر ەل دە, جەر دە جوق. ونى ەشبىر ەلمەن ايىرباستاعىم كەلمەيدى. الەم ەلدەرى بىزدەگى تۇراقتىلىق پەن بىرلىككە, ەكونوميكالىق وركەندەۋ مەن جاڭعىرۋعا قىزىعىپ تا, قىزعانىپ تا قارايدى. مۇنىڭ بارىنە ەلباسىمىز نۇرسۇلتان نازارباەۆتىڭ ەرەن ەڭبەگى ارقىلى قول جەتكىزدىك. ەلباسى – بىزدەگى تۇراقتىلىق پەن دامۋدىڭ كەپىلى. سول سەبەپتەن, ءبىز ەلباسىمىزدى ءاردايىم قولدايمىز, – دەدى قازاقشانى ەركىن مەڭگەرگەن بەلسەندى جاس سۆەتلانا ليۋبينا. جولداسبەك شوپەعۇل, «ەگەمەن قازاقستان». اتىراۋ. سۋرەتتى تۇسىرگەن راحىم قويلىباەۆ.فلەشموب: كوك تۋ, بۇركىت جانە كۇن
الماتى جاستارى استاناداعى ەلباسىن ۇلىقتاۋ سالتاناتىنا وراي, تۇڭعىش پرەزيدەنت ساياباعىندا فلەشموب وتكىزدى. يگىلىكتى باستامانىڭ العى شەبىندە تۇرعان جالىن جۇرەك, جاس جىگەر ەلباسىنىڭ ارقاشان دا وزدەرىنە يىق سۇيەيتىنىن ماقتانىشپەن اتاپ ءوتتى. قىزدار پەداگوگيكالىق ۋنيۆەرسيتەتىنىڭ 3-كۋرس ستۋدەنتى تولعاناي بەكمۇقا پرەزيدەنتتىك سايلاۋ كەزىندە ۋنيۆەرسيتەتتەگى بارلىق زامانداستارىنىڭ ۇيىمشىلدىقپەن داۋىس بەرىپ, زور بەلسەندىلىك تانىتقانى تۋرالى اڭگىمەلەدى.
پرەزيدەنتتى ۇلىقتاۋ سالتاناتىن تەلەديداردان تاماشالاپ بولىسىمەن, جاستار فلەشموبىنا كەلگەن تولعانايدىڭ قۇربىلارى ايدىنگۇل ايتۋعان مەن ايگەرىم بوستان: «ءبىز پرەزيدەنتكە سەنەمىز, پرەزيدەنت بىزگە, جاستارعا سەنەدى», دەدى ءبىراۋىزدان.
جاستار قاۋىمىنىڭ جىلدام باسقوسۋى سالتاناتىنا 1000-نان استام الماتى جاستارى جينالدى. ولاردىڭ ىشىندە ستۋدەنتتەر, مەملەكەتتىك ەمەس ۇيىمداردىڭ وكىلدەرى, قازاقستان حالقى اسسامبلەياسىنىڭ مۇشەلەرى بار. ەلباسىن ۇلىقتاۋ سالتاناتىن قولداپ, ازاماتتىق ۇستانىم تانىتقان الماتىلىق جاستار, سازدى مۋزىكا ىرعاعىمەن الاڭدا جۇگىرە ءجۇرىپ, ەلدىڭ كوك تۋىن, بۇركىت پەن كۇننىڭ كەسكىنىن ورنەكتەپ سالىپ, حالىق بىرلىگىن دارىپتەدى.
تالعات ءسۇيىنباي,
«ەگەمەن قازاقستان».
الماتى.
سۋرەتتەردى تۇسىرگەن
ايتجان مۇرزانوۆ.
قوستاناي
استاناداعى ۇلىقتاۋ ءراسىمى باسشىسىن جاڭىلماي تاڭداعان مەملەكەتتەگى ەلدىكتىڭ سالتاناتى دەسە بولادى. تەلەديداردان قاراپ, كوڭىلىمىزدى ماقتانىش كەرنەپ وتىردى. وسىنداي ەلدە, كەڭ-بايتاق جەردە ومىرگە كەلىپ, ازامات اتانعانىما تاۋبە دەيمىن. تۇركى تىلدەس ءتۇبى ءبىر قازاق پەن تاتار قاشاننان بىرگە كەلەدى. رۋحاني جاعىنان دا ءبىرىن-ءبىرى تولىقتىرعان قوس حالىقتى تۋىستىق جاعىنان دا ەشكىم بولە المايدى. ءبىزدىڭ ءبىرىنشى بايلىعىمىز – ىنتىماق, بىرلىك, سودان كەيىن ەلدى بولاشاققا اداستىرماس تۋرا جولمەن باستاعان ەلباسىمىز ەكەنىن بىلەمىز. شۇكىرشىلىك ەتەمىز. ءبىزدىڭ مەملەكەتتىڭ تىزگىنى تاعى دا سەنىمدى قولعا تاپسىرىلعانىنا قۋاندىق.
قازاقستان بۇگىندە الەمگە تانىلدى. تاۋەلسىز جاس مەملەكەت حالىقارالىق كوپتەگەن ماسەلە بويىنشا ۇلگى كورسەتىپ كەلەدى. اتوم قارۋىنان ءوز ەركىمەن باس تارتۋى, ءتۇرلى ءدىني كونفەسسيالاردىڭ, ءتۇرلى ۇلتتاردىڭ بىرلىكتە ءومىر ءسۇرۋىنىڭ قازاقستاندىق ۇلگىسىن پاش ەتتى. ءسويتىپ, قازاقستاندا بارلىق ۇلت وكىلدەرىنىڭ بىرلىگى مەن دوستىعى سالتانات قۇرىپ كەلەدى. ءبىزدى ۋاقىت وسى قالپىمىزدان ايىرماسىن دەپ تىلەيمىن.
مەن – تاتار حالقىنىڭ ۇلىمىن. ءوزىم قوستانايداعى اۋليەكول اۋدانىندا تۋىپ, قازاقتىڭ ءان-كۇيىنە ەلتىپ ءوستىم. قازاق دالاسىنىڭ ەركە سامالىنداي اندەگى: «قۇبىلا سوققان جەلدەن, تىلەگىن ءتاڭىر بەرگەن, قاسيەت قونعان ەلدەن, ەلى ءۇشىن تۋعان ەردەن, اينالايىن!» دەگەن جولدار ءار قازاقستاندىقتىڭ جۇرەگىنەن توگىلىپ تۇرعانداي ەستىلەدى.
رەنات بەكتەمىروۆ,
تاتار-باشقۇرت ەتنومادەني بىرلەستىگىنىڭ توراعاسى.
وسكەمەن
شىعىس ءوڭىرىنىڭ جۇرتشىلىعى ەلباسىن ۇلىقتاۋ ءراسىمىن زور قۋانىشپەن تاماشالادى. ءبىز, وبلىستىق دوستىق ۇيىندە قازاقستان حالقى اسسامبلەياسىنىڭ مۇشەلەرى مەن ەتنومادەني بىرلەستىكتەر جەتەكشىلەرى جانە اسسامبلەيا جانىنداعى عىلىمي-ساراپتامالىق توپ وكىلدەرى باس قوسىپ, تەلەديداردان تىكەلەي ەفير ارقىلى پرەزيدەنتتى ۇلىقتاۋ ءراسىمىن كوردىك. بيىلعى سايلاۋدا قازاقستاندىقتار وزدەرىنىڭ ءبىر ماقساتقا جەتۋ جولىنداعى ارمان-مۇددەسىن ىسكە اسىرۋدا ءبىر تۋدىڭ استىنا توپتاسا الاتىنىن بايقاتتى.
ەلباسىنىڭ جەڭىسى – بارشا حالىقتىڭ جەڭىسى. يناۋگۋراتسيا ەلىمىزدىڭ زاڭناماسىنا سايكەس سالتاناتتى جاعدايدا ءوتتى. پرەزيدەنت اتا زاڭىمىزعا قولىن قويىپ, قازاقستان حالقى الدىندا وتانعا قىزمەت ەتۋگە انت بەردى. ەلىمىزدىڭ كوك بايراعىن ءسۇيدى. ارينە, مۇنىڭ ءبارى بارلىق وتانداستارىمىز ءۇشىن جان تولقىتارلىق كورىنىستەر. ەلباسى اتاپ وتكەندەي, قازىرگىدەي الماعايىپ دۇنيەدە ەلدىگىمىزدىڭ ايناسى ىسپەتتى وسىنداي مەملەكەتتىك سالتاناتتى شارالار تاريحىمىزعا التىن ارىپتەرمەن جازىلىپ جاتىر. بۇل – بۇگىنگى قازاقستان ازاماتتارى مەن كەلەشەگىمىز ءۇشىن تاعىلىمدى, وتان الدىنداعى رۋحتى وياتاتىن ماڭىزدى وقيعا دەپ بىلەمىز. ەندى بارشا قازاقستاندىقتار مەملەكەت باسشىسىمەن بىرگە جاھاندىق سىن-قاتەرلەرگە قارسى قابىلداناتىن ءىس-شارالارعا, بەس حالىقتىق رەفورمانى جۇزەگە اسىرۋعا جۇمىلا كىرىسەدى دەگەن سەنىمدەمىز.
الەكساندر الەكسەەنكو,
تاريح عىلىمدارىنىڭ دوكتورى, پروفەسسور.
تالدىقورعان
ءبىز كۇللى قازاقستاندىقتاردىڭ اق تىلەۋى مەن اق نيەتى ناتيجەسى ەلباسىن ۇلىقتاۋ ءراسىمىن كوگىلدىر ەكراننان كوردىك. وتە رازى بولىپ, كوڭىلىمىز شالقىدى. الماتى وبلىسىندا تۇراتىن 103 ەتنوس وكىلدەرى تاتۋ-ءتاتتى ىنتىماعى جاراسا وتىرىپ, ەل بىرلىگىنىڭ بىرەگەيلىگىن پاش ەتتى.
قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆ قالىڭ ەلدىڭ الدىندا سالتاناتتى جاعدايدا انت قابىلداۋىن الەمدىك دەڭگەيدەگى اسا ءىرى ساياسي ءسات بولدى دەپ تۇسىنەمىز. قازاقستان حالقى اسسامبلەياسىنىڭ ۇسىنىسىمەن وسى قادامدى جاساپ, ۇلكەن جەڭىسكە جەتكەن ەلباسى شىن مانىندە تەڭدەسسىز تۇلعا ەكەندىگىن دالەلدەدى. وسى ءبىر ساتتە ءبىز شىن جۇرەگىمىزدەن قۋاندىق. ەلىمىزدى وركەنيەتكە باستاي بىلگەن ەلباسى «نۇرلى جول» باعدارلاماسىن ۇسىنىپ, بەس حالىقتىق رەفورما باعىتىن ايقىنداعانىن بۇل كۇنى تاعى ناقتىلاي ءتۇستى. بۇل بەس باعىت قازاقستان رەسپۋبليكاسىن الەۋمەتتىك-ەكونوميكالىق تۇرعىدا دامىتقان ۇستىنە دامىتىپ, ەل بىرلىگىن نىعايتارىنا كامىل سەنىم بار. كورەگەن ساياساتكەر ارعى-بەرگىنى ەكشەپ, باتىل قادام جاساي الاتىندىعىمەن جانە بەيبىتشىلىكتىڭ تىرەگىنە اينالا بىلۋىمەن ەرەكشەلەنەدى.
ەلىمىزدەگى تۇراقتىلىقتىڭ كەپىلى بولا بىلگەن كوشباسشىمىزبەن ءبىز, قازاقستاندىقتار, ماقتانامىز. سوندىقتان دا جالپىحالىقتىق قولداۋمەن نۇرسۇلتان نازارباەۆ جەڭىسكە جەتتى. بۇل ەلدىڭ ۇلكەن قۋانىشىنا اينالىپ, استانادا وتكەن ۇلىقتاۋ ءراسىمى جۇرتشىلىقتى قۋانتىپ وتىر.
تاتيانا كريۆورۋچكو,
الماتى وبلىسىنداعى ۋكراين ەتنومادەني بىرلەستىگىنىڭ تەڭ ءتورايىمى.
شىمكەنت
مەملەكەت باسشىسى نۇرسۇلتان نازارباەۆتىڭ سايلاۋداعى ايقىن جەڭىسى – ەلدەگى جۇرگىزىلىپ وتىرعان مەملەكەتتىك ساياساتتى حالىقتىڭ ايقىن قولداۋىنىڭ جەمىسى. ونى شەتەلدەن كەلگەن بايقاۋشىلار دا ءوز كوزىمەن كورىپ, ءبىراۋىزدان ايتتى.
ەلباسىنىڭ تاۋەلسىزدىك سارايىندا وتكەن ۇلىقتاۋ ءراسىمىن تەلەديداردان كورىپ, ءسوزىن تىڭدادىق. حالىقتىڭ مەملەكەت باسشىسىنا دەگەن ۇلكەن قۇرمەتىن ەرەكشە سەزىندىك.
حالىق قاشاندا ەلباسىمەن بىرگە. قاي كەزدە دە تىرەۋ بولۋعا, سۇيەۋ بولۋعا جارايدى. بۇگىنگى جەتكەن جەتىستىكتەرگە توقمەيىلسىمەۋ كەرەك. الدا ۇلكەن جۇمىستار بار. قازاقستاندى جاڭا جەڭىستەرگە جەتەلەۋ ءۇشىن اللا تاعالا ەلباسىنا دەنساۋلىق, قۋات, حالىققا سابىر, ىنتىماق بەرسىن دەپ تىلەيمىز.
دارحان سابىرحانوۆ,
م.اۋەزوۆ اتىنداعى وڭتۇستىك قازاقستان مەملەكەتتىك ۋنيۆەرسيتەتىنىڭ پرورەكتورى, تەحنيكا عىلىمدارىنىڭ دوكتورى, پروفەسسور.
