ول الماتى وبلىسى تالعار قالاسىندا تۋعان. لەنينگراد مەملەكەتتىك ۋنيۆەرسيتەتىن بىتىرگەن.
1963-1989 جىلدارى قازاق كسر عىلىم اكادەمياسى ش. ءۋاليحانوۆ اتىنداعى تاريح, ارحەولوگيا جانە ەتنوگرافيا ينستيتۋتىنىڭ اسپيرانتى, عىلىمي قىزمەتكەرى, اعا عىلىمي قىزمەتكەرى, ءبولىم مەڭگەرۋشىسى, ديرەكتوردىڭ ورىنباسارى بولدى. 1989-1991 جىلدارى قازاق كسر عىلىم اكادەمياسى شوقان ءۋاليحانوۆ اتىنداعى تاريح, ارحەولوگيا جانە ەتنوگرافيا ينستيتۋتى ارحەولوگيالىق ورتالىعىنىڭ جەتەكشىسى قىزمەتتەرىن اتقارادى. 1991-2010 جىلدارى الكەي مارعۇلان اتىنداعى ارحەولوگيا ينستيتۋتىنىڭ ديرەكتورى قىزمەتىن اتقاردى. 2011-2016 جىلدارى «قازاقستان ارحەولوگيا قوعامى» قب توراعاسى بولىپ جۇمىس ىستەدى.
2016-2017 جىلدارى مادەنيەتتەردى جاقىنداستىرۋ ورتالىعى ديرەكتورىنىڭ مىندەتىن اتقارۋشى, 2017-2018 جىلدارى ءا. مارعۇلان اتىنداعى ارحەولوگيا ينستيتۋتى ۋربانيزاتسيا جانە نوماديزم ءبولىمىنىڭ مەڭگەرۋشىسى بولدى. قازاقستاننىڭ ورتا عاسىرلىق تاريحىن, قالا مەن دالا اراسىنداعى بايلانىستى زەرتتەپ, عىلىمدا جاڭا باعىتتى دامىتتى.
40-تان اسا مونوگرافيا, ارحەولوگياعا بايلانىستى 4 وقۋ قۇرالى, 4 مەكتەپ وقۋلىعى, 12 البوم جانە 500-دەن استام عىلىمي ماقالالاردىڭ اۆتورى. بىرنەشە حالىقارالىق كونفەرەنتسيالارعا قاتىسىپ, يۋنەسكو ۇيىمداستىرعان «جىبەك جولى» حالىقارالىق ەكسپەديتسياسىنا قازاقستان تاراپىنان جەتەكشىلىك ەتتى. يۋنەسكو-نىڭ ورتا ازيا تاريحىمەن اينالىساتىن حالىقارالىق عىلىمي كوميتەتى مەن « ۇلى جىبەك جولى» قازاقستان ۇلتتىق كوميتەتىنىڭ مۇشەسى, ش. ءۋاليحانوۆ اتىنداعى سىيلىقتىڭ لاۋرەاتى. «پاراسات» وردەنىمەن جانە مەدالدارمەن ماراپاتتالعان.
