بۇگىن وسى مەرەيتويلىق كۇنگە وراي ۇيىمداستىرىلعان «مەملەكەتتىك باسقارۋ جانە مەملەكەتتىك قىزمەت: بۇگىنى مەن بولاشاعى» تاقىرىبىندا حالىقارالىق عىلىمي-پراكتيكالىق كونفەرەنتسيا ءوتتى. ونىڭ ماقساتى – مەملەكەتتىك قىزمەت جۇيەسىندەگى ادام رەسۋرستارىن باسقارۋعا قاتىستى تىڭ يدەيالار مەن ءادىس-تاسىلدەردى تالقىلاۋ جانە ءتيىمدى پراكتيكالىق شەشىمدەردى ىزدەۋ.
كونفەرەنتسيا ەل پرەزيدەنتى قاسىم-جومارت كەمەل ۇلى توقاەۆتىڭ قۇتتىقتاۋ سوزىمەن اشىلدى. مەملەكەت باسشىسىنىڭ قۇتتىقتاۋىندا «30 جىل ۋاقىت ارالىعىندا اكادەميا ەلىمىزدىڭ ءبىلىم جۇيەسىندەگى بەدەلدى وقۋ ورىندارىنىڭ بىرىنە اينالدى. مەملەكەتتىك قىزمەتشىلەردىڭ بىلىكتىلىگىن شىڭداۋ ءىسىن جەتىلدىرىپ, ونى جاڭا دەڭگەيگە كوتەردى. وزىق ويلى, وتانشىل ءارى كاسىبي ماماندار دايارلاۋدىڭ وزىندىك ءداستۇرىن قالىپتاستىردى. ەل مۇددەسىن بارىنەن بيىك قويىپ, ادىلەتتى قازاقستاندى قۇرۋعا اتسالىسۋ – ءاربىر مەملەكەتتىك قىزمەتشىنىڭ مىندەتى. ولاردىڭ ادال, جاڭاشىل ءارى جاسامپاز بولۋى اسا ماڭىزدى. اكادەميا وسى اسىل قاسيەتتەردى ءار تۇلەكتىڭ بويىنا ءسىڭىرىپ, مەملەكەتشىل مامانداردىڭ جاڭا بۋىنىن تاربيەلەۋگە زور ۇلەس قوسىپ كەلەدى. مۇنىڭ ءبارى وقىتۋشىلار قاۋىمىنىڭ ەسەلى ەڭبەگىنىڭ ناتيجەسى ەكەنى ءسوزسىز. ءبىلىم ورداسىنىڭ ۇجىمى الداعى ۋاقىتتا دا ەل يگىلىگىنە قىزمەت ەتە بەرەدى دەپ سەنەمىن» دەلىنگەن.
كونفەرەنتسياعا قازاقستان رەسپۋبليكاسى پرەزيدەنتى اكىمشىلىگىنىڭ جاۋاپتى قىزمەتكەرلەرى, پارلامەنت دەپۋتاتتارى, مەملەكەتتىك ورگانداردىڭ باسشىلارى, , مەملەكەت جانە قوعام قايراتكەرلەرى, استانا مەملەكەتتىك قىزمەت حابى باسقارۋشى كوميتەتىنىڭ, شەتەلدەردەن كەلگەن عالىمدار مەن مەملەكەتتىك سەكتور وكىلدەرى, سونداي-اق ءبىلىم بەرۋ ۇيىمدارىنىڭ باسشىلارى مەن حالىقارالىق ساراپشىلار, مەملەكەتتىك قىزمەتشىلەر مەن ازاماتتىق قوعام وكىلدەرى قاتىستى.
ءىس-شارا بارىسىندا مەملەكەتتىك قىزمەت ىستەرى اگەنتتىگىنىڭ توراعاسى دارحان جازىقباي پرەزيدەنت جانىنداعى اكادەميا ءوزىنىڭ 30 جىلدىق تاريحىندا عىلىمي بازاسى قالىپتاسقان, مەملەكەتتىك باسقارۋ سالاسىنا قاجەتتى ماماندار دايارلايتىن تولىققاندى وقۋ ورداسىنا اينالعانىن اتاپ ءوتتى.
«اكادەميا ءوزىنىڭ 30 جىلدىق تاريحىندا مەملەكەتتىك قىزمەتشىلەردىڭ كاسىبي بىلىكتىلىگىن شىڭداپ, مەملەكەتتىك قىزمەتشىلەر اراسىندا جوعارى باسقارۋشىلىق مادەنيەتتىڭ قالىپتاسۋىنا ۇلكەن ۇلەس قوسىپ كەلەدى. الەمدە وزگەرىس قارقىنى كۇشەيىپ, باسەكەلەستىكتىڭ ارتىپ وتىرعانى بارشامىزعا ءمالىم. ۋاقىتتىڭ كوشىمەن بىرگە ءجۇرۋ ءۇشىن عىلىم-بىلىمدەگى وزىق ادىستەرگە ساي ادام كاپيتالىن ۇزدىكسىز دامىتۋ قاجەت. مەملەكەت باسشىسى قاسىم-جومارت كەمەل ۇلى توقاەۆ قازاقستان حالقىنا جولداۋىندا مەملەكەتتىك قىزمەتشىلەردىڭ بىلىكتىلىگىن ارتتىرۋ ماسەلەسى ءالى دە وزەكتىلىگىن اتاپ ءوتتى. مەملەكەت پەن قوعام اراسىنداعى ديالوگتىڭ ساپاسىن ودان ءارى ارتتىرا ءتۇسۋ ءۇشىن ادال ءارى ءادىل بولۋىمىز, تەك زاڭ اياسىندا ارەكەت ەتۋىمىز, بەرگەن ۋادەمىز بەن ءىسىمىز ءۇشىن جاۋاپ بەرە ءبىلۋىمىز كەرەك ەكەنىن العا قويدى. بۇل رەتتە, وقۋ ۇردىسىندە زامان تالابىنا جاۋاپ بەرەتىن يننوۆاتسيالىق بىلىممەن قاتار جوعارى ادامي قۇندىلىقتارعا باستايتىن «ادال ازامات» يدەياسىن مەملەكەتتىك قىزمەتشىلەردىڭ ساناسىنا ورنىقتىرۋ ماڭىزدى», دەدى مقىا توراعاسى.
كونفەرەنتسياعا قاتىسۋشىلار ەلىمىزدە مەملەكەتتىك قىزمەتتى جاڭعىرتۋعا باعىتتالعان وزگەرىستەر جۇزەگە اسىرىلىپ جاتقانىن اتاپ ءوتتى. مەملەكەتتىك قىزمەتتەگى كادرلىق پروتسەسستەر «eQyzmet» جۇيەسىندە تسيفرلاندىرىلدى, كونكۋرستىق ىرىكتەۋلەردىڭ اشىقتىعى مەن ادىلدىگىن قامتاماسىز ەتىلدى, سونىڭ ارقاسىندا بوس لاۋازىمدارعا كونكۋرسقا قاتىسۋشىلار سانىن ەكى ەسەگە ارتتى.
پرەزيدەنت ايقىنداعان «ادام مەملەكەت ءۇشىن ەمەس, مەملەكەت ادام ءۇشىن» قاعيداسىنا ساي كاسىبي ءارى سەرۆيستىك مەملەكەتتىك اپپاراتتى قالىپتاستىرۋعا باعىتتالعان مەملەكەتتىك قىزمەتتى دامىتۋدىڭ 2024-2029 جىلدارعا ارنالعان جاڭا تۇجىرىمداماسى اياسىندا مەملەكەتتىك قىزمەتتىڭ گيبريدتى مودەلىنە كوشۋ بويىنشا شارالار قابىلدانىپ جاتىر.
عىلىمي-پراكتيكالىق كونفەرەنتسيا اياسىندا سەرۆيستىك جانە ادامعا باعدارلانعان مەملەكەتتىك قىزمەتتى قالىپتاستىرۋ, مەملەكەتتىك باسقارۋداعى زاماناۋي ۇردىستەر, كادرلىق پروتسەستەردى تسيفرلاندىرۋ جانە مەملەكەتتىك قىزمەتتەر كورسەتۋ, جاساندى ينتەللەكتتى پايدالانۋ, مەملەكەتتىك قىزمەتتى كاسىبيلەندىرۋ ماسەلەلەرىن تالقىلاۋ بويىنشا سەكتسيالىق وتىرىستار ۇيىمداستىرىلىپ, وزگە مەملەكەتتەردىڭ مەملەكەتتىك باسقارۋ اكادەميالارى رەكتورلارىنىڭ كەزدەسۋى جانە تۇلەكتەر فورۋمى ءوتتى.
سەكتسيالاردا بايانداماشىلار مەملەكەتتىك باسقارۋ ماسەلەلەرى بويىنشا ءوز باستامالارى مەن كوزقاراستارىن ورتاعا سالىپ, مەملەكەتتىك قىزمەتتى ودان ءارى دامىتۋ جونىندەگى ويلارىمەن ءبولىستى.
ءىس-شارا اياسىندا مەملەكەتتىك قىزمەتتىڭ كاسىبي بىلىكتىلىگىن ارتتىرۋعا ۇلەس قوسقان مەملەكەتتىك قىزمەتشىلەر مەن اكادەميا قىزمەتكەرلەرى قازاقستان رەسپۋبليكاسى پرەزيدەنتىنىڭ «قۇرمەت» گراموتالارى, «العىس» توسبەلگىلەرى, «العىس» حاتتارىمەن ماراپاتتالدى.
كونفەرەنتسيا سوڭىندا مقىا توراعاسى قاتىسۋشىلارعا مازمۇندى باياندامالارى مەن تۇجىرىمدى ويلارى ءۇشىن العىسىن ءبىلدىرىپ, ولاردىڭ الداعى ۋاقىتتا اگەنتتىك پەن مەملەكەتتىك باسقارۋ اكادەمياسىنىڭ جۇمىسىندا ەسكەرىلەتىندىگىن ايتىپ, اكادەميا ۇجىمىنىڭ الدا اتقارار قىزمەتىنە جەمىستى ناتيجە تىلەدى.
