وسكەمەن. 30 قاڭتار. 2012-2014 جىلدار ارالىعىندا شىعىس قازاقستان وبلىسىندا 71 ءبىلىم بەرۋ نىسانى ىسكە قوسىلدى. بۇل تۋرالى egemen.kz ءتىلشىسى حابارلادى.
وبلىستىق ءبىلىم باسقارماسىنىڭ باسشىسى اسقار نۇرعازيەۆ القا وتىرىسىندا سوڭعى ەكى جىلدا ءبىلىم نىساندارىنىڭ قۇرىلىسىنا 25 ملرد. تەڭگە باعىتتالعانىن, وتكەن جىلدىڭ وزىندە 11,2 ملرد. تەڭگە بولىنگەنىن اتاپ ءوتتى.
«وسىلايشا, 2012-2014 جىلدارى شىعىس وڭىرىندە 43 مەكتەپ, 9 بالاباقشا, 8 جاناما قۇرىلىس جانە 10 قايتا جوندەۋ جۇمىستارى جۇرگىزىلدى», – دەدى ءبىلىم باسقارماسىنىڭ جەتەكشىسى.
سونداي-اق ا.نۇرعازيەۆ ءوڭىردىڭ ۇبت كورسەتكىشتەرى بويىنشا قول جەتكىزگەن جەتىستىكتەرىن اتاپ ءوتتى. ونىڭ ايتۋىنشا, بىلتىر وبلىس رەسپۋبليكالىق رەيتينگتە 13-ورىننان 8-ورىنعا كوتەرىلگەن. الدىڭعى وقۋ جىلىمەن سالىستىرعاندا ورتاشا بالل كولەمى 5,64 پايىزعا ءوسىپ ءوسىپ, 78,04 بالدى قۇرادى. ودان وزگە, التى مەكتەپ «رەسپۋبليكاداعى ۇزدىك 100 مەكتەپ» رەيتينگىنە ەندى.
اتالعان جيىنعا وبلىس اكىمىنىڭ ورىنباسارى جاقسىلىق ومار, ءبىلىم سالاسىنىڭ ارداگەر ۇستازدارى, ءبىلىم باسقارماسىنىڭ قوعامدىق كەڭەس مۇشەلەرى, جوعارى وقۋ ورىندارىنىڭ رەكتورلارى, ءبىلىم بولىمدەرىنىڭ باسشىلارى جانە باسقا دا ورتا تەحنيكالىق جانە كاسىپتىك ءبىلىم بەرۋ جۇيەسى ۇيىمدارىنىڭ جەتەكشىلەرى قاتىستى.
دۋمان اناش.
دەرەك: egemen.kz
سۋرەت: شىعىس قازاقستان وبلىسىنىڭ ءبىلىم باسقارماسى.
