كەلىسىم بەس جىل مەرزىمگە جاسالدى
«قازاقستان رەسپۋبليكاسىنىڭ ۇكىمەتى مەن قاتار مەملەكەتىنىڭ ۇكىمەتى اراسىنداعى اسكەري ىنتىماقتاستىق تۋرالى كەلىسىمدى راتيفيكاتسيالاۋ تۋرالى» زاڭ اسكەري ءبىلىم بەرۋ جانە اسكەري قىزمەتشىلەردى دايارلاۋ, اسكەري مەديتسينا, اسكەري عىلىم, مادەني جانە سپورتتىق ءىس-شارالار, بەيبىتشىلىكتى قولداۋ جونىندەگى وپەراتسيالارعا, جاۋىنگەرلىك دايارلىققا جانە وزگە دە سالالارعا بايلانىستى ماسەلەلەرگە كونسۋلتاتسيالار سالاسىنداعى ىنتىماقتاستىقتى دامىتۋعا جانە نىعايتۋعا باعىتتالعان.
سونىمەن قاتار كەلىسىم اسكەري ىنتىماقتاستىق سالاسى مەن نىساندارىن ايقىنداۋدى, تاراپتاردىڭ اسكەري ىنتىماقتاستىعىن ۇيلەستىرۋ جونىندەگى ءوزارا ءىس-قيمىل تەتىگىن بەلگىلەۋدى, اسكەري م ۇلىك ءترانزيتى, ماتەريالدىق-تەحنيكالىق قامتاماسىز ەتۋ جانە قارجىلاندىرۋ, اۋە كەڭىستىگى مەن اسكەري پوليگونداردى پايدالانۋ, تىلدىك دايارلىقتى جۇرگىزۋ ماسەلەلەرىن رەتتەۋدى كوزدەيدى. اتالعان زاڭ اياسىندا ۋاكىلەتتى ورگاندار تاراپتاردىڭ قىزمەتىن ايقىنداۋعا, ۇيىمداستىرۋعا جانە ۇيلەستىرۋگە ۋاكىلەتتىك بەرىلگەن وكىلدەردەن تۇراتىن بىرلەسكەن جۇمىس توبىن قۇراتىنىن دا اتاپ وتكەن ءجون.
– كەلىسىم اياسىندا قاتار مەملەكەتىمەن اسكەري سالاداعى ىنتىماقتاستىقتى ارتتىرۋعا ارنالعان بىرلەسكەن شارالار قاراستىرىلدى. بۇل شارالار ەكى ەلدىڭ قاۋىپسىزدىگىن كۇشەيتۋگە ارنالىپ وتىر. ماقۇلدانعان زاڭ الداعى ۋاقىتتا مەملەكەتتەرىمىز اراسىنداعى سەرىكتەستىكتى نىعايتۋعا جانە اۋماقتارىمىزدىڭ تۇراقتىلىعى پەن قاۋىپسىزدىگىن قامتاماسىز ەتۋگە ءوز سەپتىگىن تيگىزەدى دەپ سەنەمىز, – دەدى ماۋلەن اشىمباەۆ.
ايتا كەتەيىك, كەلىسىم بەس جىل مەرزىمگە جاسالدى جانە كەلەسى بەسجىلدىققا اۆتوماتتى تۇردە ۇزارتىلادى. ەگەر تاراپتاردىڭ ءبىرى ۇزارتۋ شارتتارىمەن كەلىسپەسە, وندا ول اعىمداعى مەرزىم اياقتالعانعا دەيىن التى ايدان كەشىكتىرمەي ەكىنشى تاراپتى حاباردار ەتۋى قاجەت.
ءالسىز ونەركاسىپ – ەكونوميكامىزعا تۇساۋ
سەناتور قايرات تاستەكەەۆ ءوزىنىڭ دەپۋتاتتىق ساۋالىندا ونەركاسىپ ءوندىرىسىن دامىتۋ جانە وتاندىق تاۋار وندىرۋشىلەردى قولداۋ ماسەلەلەرىن كوتەردى. ول وڭدەۋشى سەكتوردىڭ دامۋىنا كەدەرگى كەلتىرەتىن ماسەلەلەرى اتاپ ءوتتى. بۇل رەتتە شاعىن جانە ورتا بيزنەستىڭ ۇلەسى دە جەتكىلىكسىز ەكەنى ايتىلدى. وسىعان بايلانىستى دەپۋتات ماسەلەنى شەشۋگە ىقپال ەتەتىن بىرقاتار شارا ۇسىندى. ولاردىڭ قاتارىندا ونەركاسىپتىك دامۋدىڭ ۇزاق مەرزىمدى باعدارلاماسىن ازىرلەۋ, كادرلاردىڭ بىلىكتىلىگىن ارتتىرۋ جانە نارىقتى ادىلەتسىز باسەكەلەستىكتەن قورعاۋ جونىندەگى باستامالار بار.
– ەلىمىزدىڭ الدىندا تۇرعان قازىرگى ەكونوميكالىق سىن-قاتەرلەر جاعدايىندا ونەركاسىپتىك ءوندىرىستى دامىتۋ مەن وتاندىق تاۋار وندىرۋشىلەردى قولداۋ ەرەكشە ماڭىزعا يە. الەمدەگى ەڭ ءىرى ەكونوميكالاردىڭ دامۋ تاريحى ولاردىڭ ەكونوميكالىق كۇش-قۋاتىنىڭ نەگىزى بولاتىن ونەركاسىپ سالالارى ەكەنىن كورسەتەدى. بەلسەندى قولداۋ مەن ماقساتتى ونەركاسىپتىك ساياساتسىز تۇراقتى ەكونوميكا قۇرۋ مۇمكىن ەمەس, – دەدى ق.تاستەكەەۆ.
سونداي-اق سەناتور ونەركاسىپ سالاسىنداعى بىرقاتار ماسەلەنى العا تارتىپ, شاعىن جانە ورتا بيزنەس ۇلەسىنىڭ جەتكىلىكسىزدىگى تۋرالى دا ايتتى. ستاتيستيكاعا سايكەس, ولاردىڭ ەكونوميكاداعى ۇلەسى 36,4 پايىزدى قۇرايدى, الايدا جىلدىق اينالىمدى ەسكەرمەگەندە بۇل كورسەتكىش ايتارلىقتاي تومەن. وتاندىق تاۋار وندىرۋشىلەردى ساتىپ الۋدا قولداۋ كورسەتۋ دە كۇشەيتۋدى قاجەت ەتەدى, سەبەبى التى جىل ىشىندە ىشكى ساتىپ الۋدىڭ قۇنى نەبارى 1,2 پايىزعا وسكەن. دەپۋتاتتىڭ مالىمەتىنشە, «دامۋ» قورىنىڭ سۋبسيديالانعان جوبالارىنىڭ 37 پايىزدان استامى ساۋداعا تيەسىلى. بۇل ونىڭ ەكونوميكاداعى ۇستەمدىگىن كۇشەيتەدى.
– ونەركاسىپتىك دامۋدىڭ ۇزاق مەرزىمدى باعدارلاماسىن ازىرلەۋدى, ينۆەستيتسيالاردى تارتۋعا مۇمكىندىك بەرەتىن قارجىلاندىرۋدىڭ جەڭىلدەتىلگەن جاعدايلارىن جاساۋدى, ىشكى نارىقتى جوسىقسىز باسەكەلەستىكتەن قورعاۋ جونىندە شارالار قابىلداۋدى, ونەركاسىپتىك ءوندىرىس سالاسىنداعى عىلىمي-زەرتتەۋ ازىرلەمەلەرى ءۇشىن گرانتتار مەن سۋبسيديالاردىڭ ءتيىمدى جۇيەسىن ەنگىزۋدى, قايتا دايارلاۋ مەن بىلىكتىلىكتى ارتتىرۋ باعدارلامالارىن ۇيىمداستىرىپ, ونەركاسىپ سالاسىندا كاسىبي كادرلاردى دامىتۋ ءۇشىن جاعدايلار جاساۋدى ۇسىنامىن. ۇسىنىلعان شارالار ۇلتتىق ەكونوميكاعا وڭ اسەرىن تيگىزەدى. وتاندىق ءوندىرىستى قولداۋعا ۋاقتىلى شارالار قابىلدانادى دەپ سەنەمىز, – دەپ ۇسىنىس جاسادى دەپۋتات.
