فوتولار: ت.تانىباەۆ.
ءماجىلىس عيماراتىندا وتكەن جيىنعا مادەنيەت جانە اقپارات, ەڭبەك جانە حالىقتى الەۋمەتتىك قورعاۋ, عىلىم جانە جوعارى ءبىلىم, وقۋ-اعارتۋ, ادىلەت, ۇلتتىق ەكونوميكا مينيسترلىكتەرىنىڭ باسشىلارى جانە تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىگىنىڭ وكىلدەرى, سونداي-اق كرەاتيۆتى يندۋستريا سالاسىنىڭ ساراپشىلارى قاتىستى.
ءماجىلىستىڭ ءباسپاسوز قىزمەتىنىڭ ءمالىم ەتۋىنشە وتىرىستى اشقان اسحات ايماعامبەتوۆ كرەاتيۆتى ەكونوميكانىڭ جان-جاقتى دامۋىنا مەملەكەت باسشىسىنىڭ ەرەكشە كوڭىل ءبولىپ وتىرعانىن اتاپ ءوتتى.
«كرەاتيۆتى يندۋستريالاردى دامىتۋدىڭ 2021–2025 جىلدارعا ارنالعان تۇجىرىمداماسى بەكىتىلدى. دەگەنمەن «كرەاتيۆتى يندۋسترياعا نە جاتادى؟» دەگەن سۇراق ءالى كۇنگە دەيىن تولىق شەشىمىن تاپپاعان. ءار مامان بۇل تۋرالى ءارتۇرلى پىكىر ايتادى. ءبىرى كرەاتيۆتى حاب قۇرۋ جەتكىلىكتى دەسە, ەندى ءبىرى قارجىلاي قولداۋ نەمەسە سالىقتىق جەڭىلدىكتەر قاجەت دەپ سانايدى. كەيبىرى «بىزگە كەدەرگى جاساماساڭىزدار بولدى» دەيدى. سوندىقتان بۇل ماسەلەنى كەشەندى تۇردە قاراستىرۋىمىز كەرەك», دەدى ا.ايماعامبەتوۆ.
ءماجىلىس دەپۋتاتى نارتاي سارسەنعاليەۆ بايانداماسىندا كرەاتيۆتى يندۋستريانىڭ الەۋەتى زور ەكەنىن ايتىپ, ەلىمىزدە بۇل سالانىڭ تولىققاندى دامىماۋ سەبەپتەرىنە توقتالدى.
«بۇۇ كرەاتيۆتى يندۋسترياعا ديزاين, ءسان, ونەر, كينو, مۋزىكا, مەديا, كومپيۋتەرلىك گرافيكا جانە باسقا دا سالالاردى جاتقىزادى. بۇل باعىتتار بيۋدجەتكە ايتارلىقتاي تابىس اكەلۋى مۇمكىن. بىراق قازاقستاندا 2015 جىلدان بەرى سالادا ايتارلىقتاي ىلگەرىلەۋ بايقالماي وتىر. ءبىز الەمدە كرەاتيۆتى يندۋستريا بويىنشا 84-ورىندا قالىپ وتىرمىز. سالانى نەگىزىنەن تالانتتى جەكە تۇلعالار ۇستاپ تۇر», دەدى ول.
Bravetalents مەدياكومپانياسىنىڭ نەگىزىن قالاۋشى الماس ءجالي جەكە كينو وندىرۋشىلەردىڭ سالىقتىق جانە شىعىن ماسەلەلەرىنە توقتالىپ, كرەاتيۆتى يندۋستريانى استانا حابىنا قوسۋ تۋرالى ۇسىنىس جاسادى. سونداي-اق سالاعا سالىقتىق جەڭىلدىكتەر ەنگىزۋدى ۇسىندى.
دەپۋتات ەرلان ستامبەكوۆ اۆتورلىق قۇقىقتى مەملەكەتتىك تىركەۋ ماسەلەسىن كوتەرسە, جۇلدىز سۇلەيمەنوۆا زياتكەرلىك مەنشىك پەن اۆتورلىق قۇقىق تۋرالى زاڭنامانى جەتىلدىرۋ, گرانتتار ءبولۋ جانە قارجىلاي قولداۋ شارالارىن ناقتىلاۋ قاجەتتىگىن ايتتى.
وتىرىس بارىسىندا ايتىلعان ۇسىنىستار مەن پىكىرلەر ءماجىلىس دەپۋتاتى نارتاي سارسەنعاليەۆ جەتەكشىلىك ەتەتىن جۇمىس توبىندا تالقىلاناتىن بولادى.
