فوتو: اشىق دەرەككوز
نىسان حالىقارالىق اۋەجاي ماڭايىنداعى 16,84 گا اۋماقتا ورنالاسادى. دەپو LRT جۇيەسىنە تەحنيكالىق قىزمەت كورسەتۋ مەن باسقارۋدىڭ ماڭىزدى ورتالىعىنا اينالادى.
«دەپو عيماراتتارىنىڭ جالپى اۋدانى شامامەن 80 مىڭ شارشى مەتردى قۇرايدى. وندا جىلجىمالى قۇرامعا تولىققاندى تەحنيكالىق قىزمەت كورسەتۋ جانە جوندەۋ ءۇشىن قاجەتتى بارلىق نىسان ورنالاستىرىلادى. كەشەن ۆاگونداردى جۋ عيماراتىنان, قوسالقى بولشەكتەر مەن جابدىقتار قويمالارىنان, جولداردى جوندەۋگە ارنالعان ارنايى تەحنيكا, سونداي-اق قىزمەتكەرلەردى وقىتۋ جانە بىلىكتىلىگىن ارتتىرۋعا ارنالعان اكىمشىلىك عيماراتتاردان تۇرادى», دەلىنگەن اكىمدىك حابارلاماسىندا.
سونىمەن قاتار دەپو اۋماعىندا پيلوتسىز پويىزداردى باسقارۋ ورتالىعى قۇرىلادى. اۆتوماتتاندىرىلعان باسقارۋ جۇيەسى قاۋىپسىزدىك پەن تيىمدىلىكتى ەداۋىر ارتتىرۋعا مۇمكىندىك بەرەدى, سونداي-اق ىسكە قوسۋ, تەجەۋ جانە ستانتسيالاردا توقتاۋ سياقتى پروتسەستەردى اۆتوماتتاندىرىپ, ادامي فاكتوردىڭ اسەرىن بارىنشا ازايتادى.
«قۇرىلىس تەحنولوگياسىنا سايكەس ەستاكاداداعى نەگىزگى قۇرىلىس جۇمىستارىنىڭ اياقتالۋىنا بايلانىستى قىسقى كەزەڭدە LRT جوباسى بويىنشا جۇمىستار دەپو قۇرىلىسىنا شوعىرلاناتىن بولادى», دەلىنگەن حابارلامادا.
