فوتو: Kazakh Tourism
بايقاۋعا قاتىسۋعا وتىنىمدەر بيىلعى 30 جەلتوقسانعا دەيىن قابىلدانادى. وعان وبلىس اكىمدىكتەرى 3 اۋىلدى ۇسىنا الادى.
Kazakh Tourism ۇلتتىق كومپانياسىنىڭ باسشىسى قايرات سادۋاقاسوۆتىڭ ايتۋىنشا سوڭعى جىلدارى وسىنداي ساياحاتقا قىزىعۋشىلىق ارتىپ كەلەدى.
«مادەنيەت پەن داستۇرگە باي جانە قولونەردى ساقتاعان ءارى بىرەگەي تابيعي لاندشافتتارى بار اۋىلدىق اۋماقتاردى انىقتاۋعا جانە ىلگەرىلەتۋگە نيەتتىمىز. ولار جاڭا باعىتتار مەن اۋتەنتيكالىق ءتۋريزمدى تاڭداعان تۋريستەر ءۇشىن تارتىمدى بولۋى مۇمكىن», دەدى ول.
بايقاۋعا قاتىسۋشىلاردى تۋريزم جانە وعان ساباقتاس سالالارداعى ساراپشىلاردان تۇراتىن تاۋەلسىز كەڭەس باعالايدى. ۇلتتىق كەزەڭنىڭ جەڭىمپازدارى بۇۇ دۇنيەجۇزىلىك تۋريستىك ۇيىمى (UN Tourism) وتكىزەتىن UN Tourism Best Tourism Village حالىقارالىق بايقاۋىندا قازاقستاندى تانىستىرادى.
ايتا كەتسەك, 2023 جىلى الماتى وبلىسىنىڭ ساتى اۋىلى بەدەلدى «BEST Tourism Villages by UNWTO 2023» سىيلىعىمەن ماراپاتتالعان ەدى.
