1571 كومپانيا تىركەلگەن
«Astana Hub» كەيىنگى التى جىل ىشىندە ەلىمىزدىڭ تسيفرلىق ەكونوميكاسىن وركەندەتۋدە ماڭىزدى ءرول اتقاردى. 2018 جىلى مەملەكەت قولداۋىمەن قۇرىلعان تەحنوپارك وڭىردەگى ستارتاپ-ەكوجۇيەنىڭ نەگىزىن قالاپ, IT-يندۋستريانىڭ بەلسەندى دامۋىنا ايتارلىقتاي سەرپىن بەردى. جۇمىسىن باستاعان كەزدەن بەرى ەلدەگى جانە شەتەلدەگى تەحنولوگيالىق كومپانيالار ءۇشىن تارتىمدى پلاتفورماعا اينالدى. تەحنوپارك جۇمىسىنىڭ العاشقى جىلىندا نەبارى 185 كومپانيا تىركەلگەن بولسا, بۇگىنگى كۇنى ولاردىڭ سانى 1 571-گە جەتتى. بۇل كومپانيالاردىڭ 430-دان استامى شەتەلدەرمەن سەرىكتەستىك ورناتىپ, ەلدىڭ تەحنولوگيالىق الەۋەتىن الەمدىك نارىققا شىعارۋ باعىتىندا ايتارلىقتاي ۇلەس قوسىپ وتىر.
تەحنوپارك ءوز قاتىسۋشىلارىنا سالىقتىق جەڭىلدىكتەر, ارنايى ۆيزالىق جانە ەڭبەك رەجىمدەرى, كەڭسە مەن باسپانا ۇسىنۋ سياقتى كەشەندى قولداۋ شارالارىن قامتاماسىز ەتە وتىرىپ, 28 مىڭنان استام جۇمىس ورنىن اشتى. قازىرگى كەزدە تەحنوپارك ينفراقۇرىلىم بازاسىندا «Playrix», «TikTok», «inDrive», «EPAM», «Glovo», «Damumed», «Presight.ai» جانە باسقا دا ءىرى حالىقارالىق كومپانيالاردىڭ كەڭسەلەرى ورنالاسقان.
IT-ينۆەستيتسيا
«Astana Hub» ىسكە قوسىلعان ۋاقىتتان بەرى ونىڭ رەزيدەنتتەرى 1,9 ملرد دوللار تابىس تاپتى. 2019 جىلى بۇل كورسەتكىش 35 ملن دوللاردى قۇراسا, بىلتىر 875 ملن دوللارعا جەتتى, ال بيىل تابىس مولشەرى 1,147 ملن دوللاردى قۇرايدى دەگەن بولجام بار. سونىمەن قاتار IT-قىزمەتتەردىڭ ەكسپورتى جىل سايىن قارقىن الىپ كەلەدى. كەيىنگى ءتورت جىلدا ەكسپورتتىق تابىس 630 ملن دوللاردى قۇراعان بولسا, بيىلدى ەسەپتەگەندە بۇل كورسەتكىش 1 ملرد دوللاردان اسىپ, وتاندىق IT-سەكتوردىڭ حالىقارالىق دەڭگەيدەگى تابىستىلىعىن دالەلدەدى. Astana Hub ستارتاپتاردىڭ حالىقارالىق نارىقتارعا شىعۋىنا بارىنشا قولداۋ كورسەتىپ, التى جىل ىشىندە 665,5 ملن دوللار كولەمىندە ينۆەستيتسيا تارتۋعا مۇمكىندىك جاسادى. بۇل ستارتاپتاردىڭ ىشىندە ەرەكشە قارقىنمەن دامىپ كەلە جاتقاندار قاتارىندا «CerebraAI», «Parqour», «ApartX», «Kwaka», «Zypl.ai», «Alaqan», «Arlan Biotech» سياقتى جوبالار بار. ولاردىڭ كەيبىرى تەك جەرگىلىكتى نارىقتا عانا ەمەس, شەتەلدىك ينۆەستورلاردىڭ قىزىعۋشىلىعىن تۋدىرىپ, الەمدىك دەڭگەيدە مويىندالعان. مىسالى, «CITIX» ستارتاپى اياسىندا الەمگە تانىمال ۆەنچۋرلىق ينۆەستور تيم درەيپەر 1 ملن دوللار كولەمىندە قارجى قۇيدى. مۇنداي جەتىستىكتەر وتاندىق ستارتاپتاردى جاڭا بيىكتەرگە شىعارۋعا مۇمكىندىك بەرىپ, «Astana Hub»-تىڭ حالىقارالىق تەحنولوگيالىق ەكوجۇيەدەگى ءرولىن نىعايتاتىپ وتىر.
IT-ءبىلىم
تەحنوپارك تەك ينۆەستيتسيا تارتۋمەن, ينفراقۇرىلىمدىق قولداۋمەن شەكتەلمەي, كادرلىق الەۋەتتى دامىتۋعا دا ەرەكشە نازار اۋدارادى. IT-ءبىلىم بەرۋ باعىتىنداعى «Tech Orda» باعدارلاماسى 9 مىڭنان استام وتانداسىمىزعا تەگىن ءبىلىم الۋعا مۇمكىندىك بەردى. جوبا اۆتورلارى 2025 جىلعا دەيىن بۇل كورسەتكىشتى 20 مىڭ ادامعا جەتكىزۋدى جوسپارلاپ وتىر. ءار ستۋدەنتكە مەملەكەت تاراپىنان 600 مىڭ تەڭگەگە دەيىن ۆاۋچەر ءبولىنۋى IT-مامانداردى دايارلاۋداعى ماڭىزدى قادام. سونىمەن قاتار «Alem School», «Startup School», «Beta Career» سياقتى جوبالار جاس مامانداردىڭ كاسىبي دەڭگەيىن ارتتىرۋعا ىقپال ەتىپ جاتىر. 2024 جىلى ەلىمىزدىڭ 180 مەكتەبىندە باعدارلامالاۋدىڭ نەگىزگى بىلىمدەرىن ۇيرەتۋگە ارنالعان ونلاين-پلاتفورما ىسكە قوسىلىپ, 19 مىڭنان استام جوعارى سىنىپ وقۋشىسىن «No Code, Low Code», «Startup Academy» باعدارلامالارى بويىنشا وقىتۋ باستالدى.
جاساندى ينتەللەكت
«Astana Hub» جاساندى ينتەللەكت تەحنولوگيالارىن دامىتۋعا دا ەرەكشە كوڭىل ءبولىپ وتىر. «AI Movement» باعدارلاماسى اياسىندا ەلدەگى العاشقى جاساندى ينتەللەكت مەكتەبى – «Tomorrow School» اشىلدى. سونداي-اق «Decentrathon» حاكاتونى, «AI People Bootcamp», «جي نەگىزدەرى: ChatGPT» ونلاين كۋرستارى مەن ايماقتاردا ۇيىمداستىرىلعان «Roadshow» سياقتى باستامالار ەلىمىزدەگى جاساندى ينتەللەكت سالاسىنىڭ دامۋىنا جاڭا سەرپىن بەردى. مۇنداي جوبالار 2025 جىلى اشىلاتىن ۇلتتىق جاساندى ينتەللەكت ورتالىعىنىڭ نەگىزىن قالاپ, ەلىمىزدىڭ تەحنولوگيالىق الەۋەتىن كۇشەيتۋگە باعىتتالعان.
بۇگىنگى تاڭدا ەلىمىزدىڭ 17 وڭىرىندە IT-حابتار جۇمىس ىستەپ, جەرگىلىكتى قاۋىمداستىقتاردى دامىتۋعا جانە جاڭا تالانتتاردى انىقتاۋعا دا مۇمكىندىك بەرىپ وتىر. بۇل حابتاردا 1600-دەن استام ءىس-شارا وتكىزىلىپ, جوباعا 48 مىڭنان استام ادام تارتىلىپ, 440 جاڭا ستارتاپ قۇرىلدى. مۇنىڭ بارلىعى وڭىرلىك IT-قاۋىمداستىقتاردىڭ نىعايۋىنا جانە تسيفرلىق الەۋەتتىڭ ارتۋىنا ىقپال ەتتى. «Astana Hub» 2027 جىلعا قاراي IT-قىزمەتتەردىڭ جىلدىق ەكسپورتىن 1 ملرد دوللارعا جەتكىزىپ, وتاندىق يۋنيكورندى قالىپتاستىرۋدى ماقسات ەتىپ وتىر.
