قازاق كۇرەسىنەن ەل چەمپيوناتى مارەسىنە جەتتى

«تاراز-ارەنا» سپورت كەشەنىندە استانا, الماتى, شىمكەنت قالالارى جانە 17 وبلىستان كەلگەن 450-دەن استام بالۋان بەلدەستى.

اشىلۋ راسىمىندە تۋريزم جانە سپورت ءمينيسترى ەربول مىرزابوسىنوۆ سوڭعى جىلدارى ءتول كۇرەسىمىزدىڭ سەرپىندى دامىپ كەلە جاتقانىن اتاپ ايتتى.

«مەملەكەت باسشىسىنىڭ قولداۋىمەن ۇلتتىق سپورت تۇرلەرى قارقىندى دامىپ كەلەدى. سونىڭ ىشىندە ۇلتتىق برەندىمىز – قازاق كۇرەسىنىڭ ورنى بولەك. 40-تان استام ەلدە قازاق كۇرەسى فەدەراتسيالارى جۇمىس ىستەيدى. بۇگىندە قازاق كۇرەسىنەن 10 الەم چەمپيوناتى, 12 ازيا چەمپيوناتى, 6 الەم كۋبوگى, 6 ەۋروپا چەمپيوناتى ءوتتى. ال 2023 جىلى ساۋد ارابياسىنىڭ ەر-رياد قالاسىندا وتكەن دۇنيەجۇزىلىك جەكپە-جەك ويىندارى باعدارلاماسىنا ءتول كۇرەسىمىز تۇڭعىش رەت ەندى. بالۋاندارىمىز بيىل استانادا وتكەن 5-ءشى دۇنيەجۇزىلىك كوشپەلىلەر ويىندارىندا ۇزدىك ناتيجە كورسەتىپ, 12 التىن, 1 كۇمىس, 2 قولا مەدال يەلەندى. سپورتشىلارىمىزدىڭ حالىقارالىق دودالاردا توپ جارىپ, ۇلت ابىرويىن اسقاقتاتىپ جۇرگەنى ءبىز ءۇشىن ۇلكەن ماقتانىش!», دەگەن ەربول قۋانتاي ۇلى جارىس قاتىسۋشىلارىنا ساتتىلىك تىلەدى.

بالۋاندار باسەكەسى – كسرو-نىڭ جانە قر-نىڭ ەڭبەك سىڭىرگەن جاتتىقتىرۋشىسى, جامبىل وبلىسىنىڭ قۇرمەتتى ازاماتى جاقىت مارات نۇرمۇحامبەت ۇلىنىڭ 80 جىلدىعىنا ورايلاستىرىلدى. مەرەيتوي يەسىنە مينيستر قۇتتىقتاۋ حاتىن تابىستادى.

ايتا كەتسەك, مارات نۇرمۇحامبەت ۇلى 20 جىل بويى قازاقستاننىڭ, 10 جىل بويى كسرو-نىڭ قۇراماسىن باسقارىپ قازاق سپورتىنا زور ەڭبەك سىڭىرگەن تۇلعا. ول 2 ەڭبەك سىڭىرگەن سپورت شەبەرىن, 25 حالىقارالىق دارەجەدەگى سپورت شەبەرىن, 130 سپورت شەبەرىن تاربيەلەگەن.

اشىلۋ راسىمىندە جامبىل وبلىسى اكىمىنىڭ ورىنباسارى سەرىك سالەموۆ ءوڭىر باسشىسىنىڭ قۇتتىقتاۋىن جەتكىزىپ, مارات جاقىتتىڭ يىعىنا شاپان جاپتى.

ال, Qazaq Kuresi اسسوتسياتسياسىنىڭ باس ديرەكتورى دامير بەكبوسىنوۆ وبلىستا قازاق كۇرەسىن دامىتۋعا ۇلەستەرىن قوسىپ جۇرگەن ءبىر توپ ازاماتتى العىس حاتپەن ماراپاتتادى.

Qazaq Kuresi اسسوتسياتسياسىنىڭ ءباسپاسوز قىزمەتىنەن ءمالىم بولعانداي, قازاقستان رەسپۋبليكاسى چەمپيوناتى 3 كۇنگە سوزىلىپ, بالۋاندار 16 سالماق بويىنشا بەلدەستى. جەڭىس تۇعىرىنىڭ ەڭ بيىگىنە شىققان بالۋاندار:

ەرلەر اراسىندا  ارحات بايمۋرزينوۆ (55 كگ., قوستاناي وبلىسى), نۇرتىلەك قاراكەسەكوۆ (60 كگ., ۇلىتاۋ وبلىسى), نۇرعالي تۇرسىنعازيەۆ (66 كگ., سقو), تىلەك توقتاسىن ۇلى (74 كگ., جەتىسۋ وبلىسى.), اسىلجان كارىم (82 كگ., تۇركىستان وبل.), ايدار بەسكەمپىر (90 كگ., جامبىل وبلىسى), ەرسۇلتان مۇزاپپاروۆ (100 كگ., شىمكەنت قالاسى), قايسار شامشيدينوۆ (+100 كگ., تۇركىستان وبلىسى),  مۇحتار دالەلحانۋلى (تۇيە بالۋان, پاۆلودار وبلىسى).

ايەلدەر اراسىندا ىڭكار قۇرالباي (48 كگ., جامبىل وبلىسى), ساعات بايعاراەۆا (52 كگ., جامبىل وبلىسى), اقنۇر اسىلبەكوۆا (56 كگ., جەتىسۋ وبلىسى.), باكىت قۇساكباەۆا (60 كگ., اقتوبە وبل.), ۇلدانا تاڭجارىقوۆا (65 كگ., جامبىل وبلىسى.), اقبوتا قىدىرالى (70 كگ., تۇركىستان وبلىسى), ارۋجان جاندارباي (77 كگ., اتىراۋ وبلىسى), ارايلىم شەگەنوۆا (+77 كگ., جامبىل وبلىسى).

ال جالپىكوماندالىق ورىندار بويىنشا قورجىندارىنا 5 التىن, 3 كۇمىس, 9 قولا مەدال سالعان جامبىل وبلىسى توپ جاردى. 3 التىن, 1 قولا جۇلدە العان  تۇركىستان وبلىسى ەكىنشى ورىندى يەلەندى. ال 2 التىن, 1 كۇمىس, 2 قولاعا قول جەتكىزگەن جەتىسۋ وبلىسى ۇزدىك ۇشتىكتى تۇيىندەدى.