ماۋلەن اشىمباەۆ ءوز سوزىندە اباي اتىنداعى دارىندى بالالارعا ارنالعان رەسپۋبليكالىق مامانداندىرىلعان مەكتەپ-ينتەرناتىنىڭ جاڭا عيماراتىن سالۋ ۇلتتىق ءبىلىم بەرۋ جۇيەسىن جەتىلدىرۋ جولىنداعى ماڭىزدى قادام ەكەنىن اتاپ ءوتتى. سونداي-اق ول مەملەكەت باسشىسى ەلىمىزدە ءبىلىم ساپاسىن ارتتىرۋعا جانە پەداگوگ مارتەبەسىن نىعايتۋعا ۇنەمى باسا ءمان بەرىپ كەلە جاتقانىن تىلگە تيەك ەتتى.
«قازىرگى تاڭدا ەلىمىزدە وقۋشىلاردىڭ جان-جاقتى دامۋىنا قاجەتتى جاعداي جاساۋ جانە ولاردىڭ ساپالى ءبىلىم الۋىن قامتاماسىز ەتۋ ءۇشىن جۇيەلى جۇمىس جۇرگىزىلىپ كەلەدى. بۇل رەتتە پرەزيدەنتىمىز قاسىم-جومارت كەمەل ۇلى توقاەۆتىڭ باستاماسىمەن ىسكە اسىرىلىپ جاتقان «جايلى مەكتەپ» ۇلتتىق جوباسىن ەرەكشە اتاپ وتكەن ءجون. اۋقىمدى جوبا قالالار مەن بىرگە شالعايداعى اۋىلداردى دا قامتيدى», دەدى ماۋلەن اشىمباەۆ.
سونىمەن قاتار سەنات سپيكەرى اباي اتىنداعى مەكتەپتىڭ جاڭا عيماراتىن سالۋ ورتا ءبىلىمنىڭ ۇلتتىق برەندىن قالىپتاستىرۋعا قوسىلعان ۇلكەن ۇلەس ەكەنىن ايتتى. سونداي-اق پالاتا توراعاسى بۇل قادام قوعامدا ۇلتتىق مۇددەنى بەرىك ورنىقتىرۋ جانە تاريحي ساباقتاستىقتى ساقتاۋ ءۇشىن قاجەت ەكەنىنە نازار اۋداردى.
«اباي مەكتەپ-ينتەرناتىن جاڭعىرتۋ وتاندىق ءبىلىم بەرۋدى ودان ءارى دامىتۋعا جانە وسكەلەڭ ۇرپاققا رۋحاني-ادامگەرشىلىك قۇندىلىقتاردى دارىپتەۋگە تىڭ سەرپىن بەرەدى. جوبانىڭ باستى ماقساتى – ۇلى ابايدىڭ «تولىق ادام» تۇجىرىمداماسىنا تابان تىرەي وتىرىپ, ۇلتقا قىزمەت ەتەتىن پاتريوت ازاماتتاردىڭ جاڭا بۋىنىن تاربيەلەۋ. وسى باعىتتاعى جۇمىستى تاۋەلسىز قازاقستاننىڭ قۇندىلىقتارىمەن جانە وزىق حالىقارالىق تاجىريبەمەن ۇيلەستىرە وتىرىپ جۇرگىزۋ مەملەكەت باسشىسى قاسىم-جومارت كەمەل ۇلى توقاەۆ ۇسىنعان «ادال ازامات» تۇجىرىمداماسىن ىسكە اسىرۋعا جول اشادى», دەپ, ماۋلەن اشىمباەۆ اتالعان جوبانى جۇزەگە اسىرۋعا قولداۋ كورسەتكەن الماتى قالاسىنىڭ اكىمدىگىنە, وقۋ-اعارتۋ مينيسترلىگىنە جانە وسى يگى ىسكە ءۇن قوسقان بارشا بەلسەندى ازاماتقا العىس ءبىلدىردى.
سونداي-اق ساپار بارىسىندا سەناتورلار سانجار اسفەندياروۆ اتىنداعى قازاق ۇلتتىق مەديتسينا ۋنيۆەرسيتەتىنىڭ باسشىلىعىمەن, وقىتۋشىلارىمەن جانە ستۋدەنتتەرىمەن كەزدەسىپ, جوعارى وقۋ ورنىندا وقيتىن بولاشاق دارىگەرلەر تۇرىپ جاتقان جاڭا جاتاقحانالاردىڭ جاعدايىمەن تانىستى.
مەديتسينالىق ۋنيۆەرسيتەتتىڭ رەكتورىمەن كەزدەسۋ كەزىندە مەملەكەت باسشىسى بەلگىلەپ بەرگەن ەلىمىزدىڭ عىلىمي-تەحنولوگيالىق ساياساتىنىڭ باسىم باعىتتارىن ىسكە اسىرۋ مىندەتتەرى تالقىلاندى. كلينيكالىق زەرتتەۋلەردىڭ پەرسپەكتيۆالارى, عىلىمي كادرلار دايارلاۋ جانە ولاردىڭ بىلىكتىلىگىن ارتتىرۋ, زەرتتەۋ جوبالارىنا الەۋمەتتىك جانە قارجىلىق قولداۋ كورسەتۋ, يننوۆاتسيالىق ادىستەمەلەر مەن تەحنولوگيالاردى ەنگىزۋ ماسەلەلەرىنە دە ءمان بەرىلىپ, تىڭ ۇسىنىستار ايتىلدى.
