سولتۇستىك قازاقستاندا ۇرلانعان مالدار يەلەرىنە قايتارىلدى

پەتروپاۆل. 30 قاڭتار. سولتۇستىك قازاقستان وبلىسىندا «بارىمتاشى» جەدەل الدىن الۋ پروفيلاكتيكالىق ءىس-شارالارىن وتكىزۋ بارىسىندا قولدى بولعان 20 باس مال يەلەرىنە قايتارىلدى. بۇل تۋرالى وبلىستىق ىشكى ىستەر دەپارتامەنتىنىڭ ءباسپاسوز قىزمەتى حابارلادى. كريمينالدىق پوليتسيا قىزمەتكەرلەرى ءۇش كۇننىڭ ىشىندە 178 ساۋدا ورىندارىن تەكسەرىپ, مالدى قۇجاتسىز تاسىمالداۋدىڭ 6, سونداي-اق, ەت ونىمدەرىنىڭ زاڭسىز اكەلىنگەن 40-تان استام فاكتىلەرىن انىقتادى. وبلىس اۋماعى بويىنشا 7 مال ۇرلىعى اشكەرەلەندى. اتالمىش قىلمىستارعا قاتىسى بار دەگەن كۇدىكپەن 23 كۇدىكتى قاماۋعا الىندى. «ەت ساۋداسىمەن اينالىساتىن رەسەي فەدەراتسياسىنىڭ ازاماتى كۇدىك تۋدىرىپ, پەتروپاۆل قالاسىنا كىرە بەرىس جول بەكەتىندە توقتاتىلدى. قۇجاتتاردى تەكسەرۋ بارىسىندا ونىڭ كولىگىنەن 169 كيلو ەت تابىلىپ, ۆەتەرينارلىق سەرتيفيكات جوق بولىپ شىقتى. كاسىپكەرگە قاتىستى اكىمشىلىك حاتتاما تولتىرىلىپ, 10 ايلىق ەسەپتىك كورسەتكىش كولەمىندە ايىپپۇل سالىندى. ۇرلىق-قارلىقتىڭ الدىن الۋ جانە جۇرتشىلىققا ءتۇسىندىرۋ شارالارى بىرنەشە باعىتتا جۇرگىزىلىپ, 46 جەدەل توپتى قامتىپ وتىر», دەيدى كريمينالدىق پوليتسيا باسقارماسىنىڭ اعا جەدەل ۋاكىلى, پوليتسيا مايورى شالقار راحماتۋللين. ءومىر ەسقالي. دەرەك: سولتۇستىك قازاقستان وبلىستىق ىشكى ىستەر دەپارتامەنتىنىڭ ءباسپاسوز قىزمەتى. سۋرەت: gazetا.kz.