اقتاۋدا لاڭكەستىكتى ناسيحاتتاعان ايەلگە سوت بولدى

اقتاۋ. 30 قاڭتار. اقتاۋدا WhatsApp جەلىسى ارقىلى لاڭكەستىكتى ناسيحاتتاعان ايەلگە سوت بولدى. بۇل تۋرالى egemen.kz ءتىلشىسى حابارلادى. جەرگىلىكتى 27 جاستاعى تۇرعىن ايەل ەلەكتروندى قۇرالدارمەن WhatsApp جەلىسى ارقىلى «تەرروريزمدى ناسيحاتتادى» دەپ ايىپتالدى. ول 2014 جىلدىڭ 10 ماۋسىمى مەن 9 تامىزى ارالىعىندا وزىمەن ءدىني كوزقاراسى بىردەي ادامدارعا «حالىقارالىق تەررورشىلاردىڭ ارەكەتىن» اقتايتىن يدەيالار مەن پىكىرلەردى تاراتقان. تەرگەۋ, سونداي-اق, كۇدىكتى سيرياداعى لاڭكەستىك ۇيىمدار مۇشەلەرىنىڭ ارەكەتىن اقتايتىن «اۋديوجازبالار» تاراتقان» دەگەن دەرەك كەلتىرەدى. وزىنە تاعىلعان كىنالاردى تولىقتاي مويىنداماعان ايىپتالۋشى ايەلگە اقتاۋ قالالىق سوتى ءتورت جىل باس بوستاندىعىنان ايىرۋ جانە جازانى جالپى رەجيمدەگى تۇزەۋ كولونياسىندا وتەۋگە ۇكىم ەتتى. ۇكىم زاڭدى كۇشىنە ەنگەن جوق. گۇلايىم شىنتەمىرقىزى. دەرەك: egemen.kz. سۋرەت: alashainasy.kz.