فوتو: ءماجىلىستىڭ ءباسپاسوز قىزمەتى
ايتا كەتسەك, نارتاي سارسەنعاليەۆ پالاتانىڭ وسى ماسەلە بويىنشا جۇمىس توبىنا جەتەكشىلىك ەتەدى.
دەپۋتات اتالعان زاڭ جوباسىنىڭ ناقتى جاڭاشىلدىقتارىن اتادى.
ونىڭ ايتۋىنشا, جوعارى جەتىستىكتەر سپورتىنا كىرەتىن سپورت تۇرلەرىنىڭ ءتىزىمى بەلگىلەندى. ونىڭ ىشىندە «باسىم سپورت تۇرلەرى» دەگەن ۇعىم دا بار. تاعى ءبىر جاڭاشىلدىق - ۇلتتىق سپورت تۇرلەرىن بيۋدجەتتەن قارجىلاندىرۋ. دەپۋتات وسىلايشا سپورت ينفراقۇرىلىمىن دامىتۋ, مەملەكەتتىك سپورت ۇيىمدارىنىڭ جۇمىسىن قارجىلاندىرۋ جانە بۇقارالىق سپورتتى دامىتۋ باعىتتارىنا ايرىقشا نازار اۋدارىلاتىنىن تىلگە تيەك ەتتى.
سونداي-اق نارتاي ارالباي ۇلى ەلىمىزدە ونەر كورسەتەتىن شەتەلدىك سپورتشىلارعا قاتىستى ماڭىزدى نورما بار ەكەنىن ەسكە سالدى. دالىرەك ايتقاندا, قازاقستاننىڭ ازاماتتىعى جوق سپورتشىلارعا بيۋدجەت ەسەبىنەن قاراجات بەرۋگە تولىقتاي تىيىم سالىنادى.
اڭگىمە بارىسىندا ءماجىلىس دەپۋتاتى «سامۇرىق-قازىنا» ارقىلى, وڭىرلىك الەۋمەتتىك كورپوراتسيالار ارقىلى اۋدارىلاتىن قاراجاتتى لەگيونەر ۇستاۋعا جۇمساۋ ماسەلەسى قالاي شەشىلەتىنىن ءتۇسىندىردى.
«كۆازيمەملەكەتتىك سەكتوردىڭ قاراجاتى ەسەبىنەن دە قازاقستان ازاماتتىعى جوق سپورتشىلارعا قارجى بولۋگە تىيىم سالىنادى. بۇل نورما ۇكىمەتتىڭ ءتيىستى قورىتىندىسىن الدى. ءبىز وسى زاڭ شەڭبەرىندە مۇمكىندىگى شەكتەۋلى ازاماتتارعا جاعداي جاساۋدى قاراستىردىق. ويتكەنى كەيىنگى وليمپيادالار مەن حالىقارالىق جارىستاردا ءبىزدىڭ پاراليمپياداشىلار وتە جاقسى جەتىستىكتەرگە جەتىپ جۇرگەنى ءمالىم. ماجىلىستەگى ارىپتەستەرىمىزبەن بىرگە ءبىرىنشى توپتاعى مۇگەدەكتەرگە ارنالعان نورما ۇسىندىق. مىسالى, قازىر ءبىرىنشى توپتاعى مۇگەدەكتىگى بار 10 سپورتشى جارىسقا بارسا, ەڭ كوپ دەگەندە ولاردىڭ جانىندا 3 ادام جۇرەدى. ال ەرەكشە ازاماتتارعا 24 ساعات بويى كومەكشى كەرەك. سول ءۇشىن ءبىز «سپورتشىنى الىپ جۇرەتىن ادام» دەگەن ۇعىمدى ەنگىزدىك», دەپ ناقتىلادى ول.
سۇحبات بارىسىندا بالالار سپورتى توڭىرەگىندە اڭگىمە ءوربىدى. دەپۋتات بۇعان دەيىن سپورتتىق سايىستارعا, سپورت تۇرلەرىنە قابىلداۋدا ەشقانداي جاس شەكتەۋى بولماعانىن ايتتى. سالدارىنان جارىس بارىسىندا بالالاردىڭ كوز جۇمۋ فاكتىلەرى تىركەلدى. سوندىقتان, بۇدان بىلاي سپورت سايىستارىنا قاتىساتىن بالالاردىڭ جاسى ەسەپكە الىنادى.
دەپۋتاتتىڭ ايتۋىنشا, ءبىر-بىرىنە ۇقساس بىرنەشە سپورت ءتۇرىن ءبىر فەدەراتسياعا بىرىكتىرۋ تاجىريبەسى قولعا الىنادى. زاڭدا فەدەراتسيالارعا ناقتى تالاپ قويىلادى. وسى زاڭ كۇشىنە ەنگەننەن كەيىن ءبىر فەدەراتسيانىڭ ءبىر عانا سپورت تۇرىنە يەلىك ەتەتىن مۇمكىندىگى بولادى.
نارتاي سارسەنعاليەۆ زاڭ جوباسىندا سپورتتاعى لەگيونەر ۇعىمىنا قانداي تۇسىنىكتەمە بەرىلەتىنىن دە ايتتى.
«جاڭا زاڭ قابىلدانسا, لەگيونەرلەرگە بيۋدجەت قاراجاتى بەرىلمەيدى. دەسەك تە قازاقستان ازاماتتىعىن راسىمدەپ العان ازاماتتارعا ونداي تىيىم جوق. بۇل ماسەلەنى مەملەكەت باسشىسى دا وليمپياداعا قاتىسقان سپورتشىلارمەن كەزدەسكەندە ايتتى. سوندىقتان سپورتشىلار قازاقستان ازاماتتىعىن جالپىعا بىردەي تارتىپپەن الۋ كەرەك», دەدى سپيكەر.
جاڭا زاڭ جوباسى قابىلدانىپ جاتسا, سپورت سالاسىنا بولىنەتىن قاراجات ۇنەمدەلە مە؟ دەپۋتات بۇل سۇراققا دا جاۋاپ بەردى.
«بيۋدجەتتى مينيسترلىكتىڭ ءوزى جاساقتايدى. سودان كەيىن بىزگە كىرگىزەدى. مەملەكەت ەسەبىنەن قارجىلاندىرىلاتىن سپورت تۇرلەرىنىڭ ازايۋىنان ۇنەمدەلگەن قاراجات بولسا, بالالار سپورتىنا, بۇقارالىق سپورتقا باعىتتاۋى كەرەك. ءماجىلىستىڭ الەۋمەتتىك-مادەني دامۋ كوميتەتى مينيسترلىكتىڭ الدىنا بۇل ماسەلەنى قويدى.
جالپى زاڭ جوباسىندا 60-تان استام نورمانى ۇكىمەت قورىتىندىسىنا جىبەردىك. سونىڭ 80-90 پايىزىنا وڭ قورىتىندى الدىق. بۇل زاڭ شىعارۋ ىسىندە جاقسى كورسەتكىش بولىپ سانالادى», دەپ ءسوزىن قورىتىندىلادى دەپۋتات.
