بۇگىنگى مەكتەپ تۇلەگى ماماندىقتان بۇرىن گرانت الۋدى ويلايدى

بۇل اقيقاتقا اينالىپ بارادى. تۇسكەن ماماندىعىنا كوڭىلى تولماسا دا, امالسىز ءتورت-بەس جىلدى وتكىزىپ, قاتىرما قاعازدى قالتاعا سالىپ, ودان سوڭ ءار مەكەمەنىڭ ەسىگىن قاعىپ, جۇمىسسىز جۇرگەن «ماماندار» از ەمەس. الەمدە 80 مىڭ ماماندىق بولسا, ءبىز سونىڭ 10 مىڭدايىن مەڭگەرەتىن سەكىلدىمىز. قازىر تالاپكەرلەردىڭ 70 پايىزى اتا-انانىڭ ايتۋى­مەن, دوستارىنىڭ نۇسقاۋىمەن, جارنامانىڭ «جا­رىلقاۋىمەن» ماماندىق تاڭدايتىن كو­رىنەدى. تەك 19 پايىز تالاپكەر تاڭداعان ما­مان­دىعىنا تاباندى ەكەن. ستۋدەنتتەرمەن وي بولىسسەڭ, بەسەۋدىڭ بىرەۋى وقىپ جۇرگەن ماماندىعىنا كوڭىلى تولاتىنىن ايتسا, قالعاندارى كەزدەيسوق كەلگەندەرىن جەتكىزەدى. ۇبت-دا ءتورتىنشى ءپان دەگەن بار. سول بويىنشا ءبىرىنشى تاڭداعان ماماندىعىڭا تۇسە الاسىڭ, قالعانى الگىندەي امالسىزدىڭ تىرلىگى. ماسەلەن, مەديتسينا ماماندىعىن «ءسۇيدىڭىز», بىراق تىلەك قابىل بولمادى. ءتورتىنشى ءپان بيولوگيا, سول بويىنشا اۋىل شارۋاشىلىعىنا قاجەت ماماندى وقىتاتىن جوو-عا تۇسۋىڭە مۇمكىندىك بار. گرانتقا قولى جەتپەگەندەر اتا-اناسىنىڭ قالتاسىنا قاراي جەكەمەنشىك وقۋ ورىندارىن جاعالايدى. بىزدەگى ماماندىق دايىنداۋ وسىلايشا جالعاسۋ ۇستىندە. كەيدە استارىنا ۇڭىلمەي, دايىندالعان مامان ناشار دەپ جاتامىز. سوندا مەملەكەتتىڭ قارجىسى, اتا-انانىڭ اقشاسى قالايشا اقتالمايدى, ونىڭ سەبەبى نە دەگەندە زەرتتەپ-زەردەلەۋ قاجەت ءتارىزدى. ءبىز بۇل ويدى نەگە قوزعاپ وتىرمىز؟ ەلباسىنىڭ تاپسىرماسىنا وراي يندۋستريالىق-يننوۆاتسيالىق دامۋ باعدارلاماسىنا قاجەتتى 35 مىڭنان استام مامان دايىنداۋ كەرەك ەكەن. بۇل ءۇشىن جاڭا باعدارلامالار جاسالىپ, ماتەريالدىق بازا كۇشەيتىلىپ, پروفەسسورلار الەۋەتى ارتتىرىلماق. سوندا وسىعان دەيىن داي­ىنداعان ماماندارىمىز ىلىككە الىنبايتىن بولدى ما؟ بۇل باعدارلاما دا بۇرىنعى باع­دارلامالاردىڭ سۇرلەۋىمەن كەتىپ, مامان دايىنداۋ دەگەن ماقامدى قاشانعا دەيىن سوزامىز؟ جاڭا قادام الدىندا مەكتەپ تۇلەكتەرى اراسىندا ماماندىق تاڭداۋ, كاسىپكە باۋلۋ بويىنشا جۇمىستار جۇرگىزسەك, ۇتىلماس ەدىك. بۇل جۇمىستى قانشا جەردەن كۇستانالاساق تا كەڭەس زامانىندا جۇيەلى جۇرگىزىلەتىن. سونى دا ەسكەرسەك, ەش ارتىقتىعى جوق سەكىلدى. سەبەبى, وسى كۇندەرى ءبىلىم ۇيالارىنان ءومىر باسپالداعىنا اتتاعالى وتىرعان ۇل مەن قىزدىڭ ويى بولاشاعىنا تياناق, ەلىنە سەپتىگىن تيگىزۋگە قۇرال بولار ماماندىق تاڭداۋ ەمەس, ۇبت-نىڭ قاساڭ سۇراقتارىن جاتتاۋمەن ءوتىپ جاتىر. سۇلەيمەن مامەت, «ەگەمەن قازاقستان».