وتكەن اپتادا ەلىمىزدىڭ ءار وڭىرىندە سىبايلاس جەمقورلىقپەن بايلانىستى بىرقاتار ءىرى قىلمىستىق وقيعا ورىن الىپ, ءتىپتى اراسىندا بىلدەي ءبىر سالانىڭ تىزگىنىن ۇستاپ وتىرعان شەنەۋنىكتەر قۇرىقتالدى. ماسەلەن, اقمولا گارنيزونى اسكەري سوتىنىڭ ۇكىمىمەن توتەنشە جاعدايلار مينيسترلىگى ورتكە قارسى قىزمەت كوميتەتىنىڭ توراعاسى ن.دەربىسوۆ پەن شىمكەنت قالاسى توتەنشە جاعدايلار دەپارتامەنتىنىڭ باستىعى م.جاقسىباەۆتىڭ 5 جىلعا, جەتىسۋ وبلىسى توتەنشە جاعدايلار دەپارتامەنتىنىڭ باستىعى ب.ءىزباساروۆتىڭ 9 جىلعا باس بوستاندىعىنان ايىرىلعانىن ايتۋعا بولادى.
سىبايلاس جەمقورلىققا قارسى ءىس-قيمىل اگەنتتىگىنىڭ مالىمەتىنشە, ولار بيزنەس وكىلىنەن ونىڭ كاسىبىنە قامقورلىق جاساعانى ءۇشىن 39,7 ملن تەڭگە پارا العان. سونداي-اق ب.ءىزباساروۆ 1,7 ملن تەڭگە كولەمىندەگى قاراجاتتى وزىنە قوسىمشا زاڭسىز ەسەپتەپ, بيلىگىن اسىرا پايدالانعانى ءۇشىن سوتتالدى.
سوت ۇكىمى زاڭدى كۇشىنە ەنبەسە دە, ولار مەملەكەتتىك قىزمەتتە جانە كۆازيمەملەكەتتىك سەكتور سۋبەكتىلەرىندە لاۋازىمداردى يەلەنۋ قۇقىعىنان ايىرىلدى.
وڭتۇستىك استانامىزدا مەدەۋ اۋدانىنىڭ سوتى «الماتى باس جوسپارى» جشس باس ديرەكتورىنىڭ ورىنباسارى س.ءومىرالى ۇلىنا قاتىستى ۇكىم شىعاردى. ول الاياقتىق جاساعانى جانە جەرگىلىكتى كاسىپكەردى جەر ۋچاسكەسىنىڭ نىسانالى ماقساتىن وزگەرتكەنى ءۇشىن قالالىق جەر قاتىناستارى باسقارماسىنىڭ لاۋازىمدى ادامىنا 9,6 ملن تەڭگە سوماسىندا پارا بەرۋگە يتەرمەلەگەنى ءۇشىن كىنالى دەپ تانىلعان.
سوت ۇكىمىمەن وعان 3 جىل 6 اي مەرزىمگە باس بوستاندىعىنان ايىرۋ جازاسى تاعايىندالىپ, مەملەكەتتىك قىزمەتتە جانە كۆازيمەملەكەتتىك سەكتور سۋبەكتىلەرىندە قىزمەت اتقارۋ قۇقىعىنان ءومىر بويى ايىرىلدى.
ىشكى ىستەر مينيسترلىگىنىڭ قۇرىلىمىندا قىلمىستىق اتقارۋ جۇيەسى دەپ اتالاتىن سالا بار. ول – ەلىمىزدەگى تۇرمەلەردىڭ قىزمەتىنە جانە پروباتسيا سالاسىنا جاۋاپ بەرەتىن ۇلكەن جۇيە. وكىنىشكە قاراي, قىلمىس جاساپ سوتتالعان ادامداردى قاداعالايتىن سالانىڭ قىزمەتكەرلەرى اراسىنان دا قىلمىسقا بەت بۇرىپ, زاڭدى بەلشەسىنەن باساتىندار تابىلىپ جاتىر. ماسەلەن, بۇعان وسكەمەن قالالىق سوتىنىڭ وبلىستىق قىلمىستىق اتقارۋ جۇيەسى دەپارتامەنتى قىزمەتكەرلەرىنە قاتىستى شىعارعان ۇكىمى دالەل.
№17 مەكەمە باستىعىنىڭ بۇرىنعى ورىنباسارى مەن اعا ينسپەكتور جىلجىمايتىن م ۇلىكتىڭ جوقتىعى تۋرالى تۇرعىن ءۇي كوميسسياسىنا ادەيى جالعان مالىمەتتەر بەرۋ ارقىلى 5,8 ملن تەڭگە كولەمىندەگى قاراجاتتى ۇرلاعانى ءۇشىن كىنالى دەپ تانىلعان. ولارعا دا 3 جىل 6 اي مەرزىمگە باس بوستاندىعىن شەكتەۋ جانە مەملەكەتتىك قىزمەت پەن كۆازيمەملەكەتتىك سەكتوردا لاۋازىم اتقارۋ قۇقىعىنان ءومىر بويىنا ايىرۋ جازاسى تاعايىندالدى. سونىمەن قاتار ولاردىڭ سايكەسىنشە «ادىلەت مايورى» جانە «ادىلەت لەيتەنانتى» اتتى پوگوندارى يىعىنان سىپىرىلدى.
مەملەكەت باسشىسىنىڭ زاڭدىلىق پەن قۇقىقتىق ءتارتىپتى قامتاماسىز ەتۋ جونىندەگى تاپسىرماسىن ىسكە اسىرۋ ءۇشىن سىبايلاس جەمقورلىققا قارسى ءىس-قيمىل اگەنتتىگى جەمقورلىقتىڭ, ونىڭ ىشىندە جوعارى لاۋازىمدى ادامدار اراسىنداعى پاراقورلىقتىڭ جولىن كەسۋ بويىنشا جۇيەلى جۇمىس جۇرگىزىپ كەلەدى. ماسەلەن, تاياۋ كۇندەرى اگەنتتىك اۋىل شارۋاشىلىعى مينيسترلىگىنىڭ اگروونەركاسىپتىك كەشەندەگى مەملەكەتتىك ينسپەكتسيا كوميتەتىنىڭ توراعاسىنا قاتىستى سوتقا دەيىنگى تەرگەۋدى اياقتادى.
ول كاسىپكەرلىك سۋبەكتىسىنەن 4,4 ملن تەڭگە كولەمىندە پارا الدى دەپ ايىپتالىپ جاتىر. اتاپ ايتقاندا, شەگىرتكەگە قارسى پەستيتسيدتەردى جەتكىزۋ جونىندەگى قىزمەتتەردى مەملەكەتتىك ساتىپ الۋ كەزىندە زاڭسىزدىقتارعا جول بەرگەن. سوتتىڭ سانكتسياسىمەن لاۋازىمدى تۇلعا مەن كاسىپكەر ءۇي قاماعىنا الىندى.
«سىبايلاس جەمقورلىققا قارسى ۆولونتەرلىك» جوباسى ەلىمىزدە قوعامدىق باقىلاۋدى كۇشەيتۋدىڭ ماڭىزدى جانە ءتيىمدى قۇرالىنا اينالىپ وتىر. انتيكور ەرىكتىلەرى سالا قىزمەتكەرلەرىنە كومەكتەسىپ, مەملەكەتتىك ساتىپ الۋ كەزىندەگى ءتۇرلى قيتۇرقىلىقتى اشىپ جاتىر. ماسەلەن, ولاردىڭ كومەگىمەن بيىل 15,2 ملرد تەڭگەنىڭ زاڭسىز جۇمسالۋىنىڭ جولى كەسىلدى. ەرىكتىلەر جول قۇرىلىسىنىڭ مونيتورينگىنە, وزەكتى الەۋمەتتىك ماسەلەلەردى شەشۋگە جانە بيۋدجەت قاراجاتىنىڭ ءتيىمسىز جۇمسالۋىن بولدىرماۋعا بەلسەندى ارالاسىپ كەلەدى. جالپى سانى شامامەن 2,5 مىڭ ادامدى قۇرايدى.
مىسالى, الماتى قالاسى ەرىكتىسىنىڭ ۇسىنىمىمەن ەنەرگەتيكا جانە سۋمەن جابدىقتاۋ باسقارماسى جىلجىمالى ەلەكتروتەحنيكالىق زەرتحانانىڭ ساتىپ الۋ باعاسىن 45 ملن تەڭگەگە تومەندەتتى. ال تۇركىستان وبلىسىندا ەرىكتىلەر بالالار ءۇيىنىڭ تاربيەلەنۋشىلەرىن مەديتسينالىق ۇيىمدارعا ەلەكتروندىق ۇكىمەت پورتالى ارقىلى بەكىتۋدىڭ ءتيىستى فۋنكتسيونالى جوق ەكەنىن انىقتادى. بۇل مەديتسينالىق مەكەمەلەرگە اقىلى نەگىزدە جۇگىنۋ قاجەتتىلىگىنە اكەپ سوقتىرعان ەدى.
سونداي-اق ەرىكتىلەر اۆتوجولدار قۇرىلىسىن مونيتورينگىلەۋگە بەلسەندى قاتىسىپ كەلەدى. اباي وبلىسىندا ولار وبلىستىق جولدى جوندەۋ كەزىندە جول بەلگىلەرى بولماۋىنا جانە جۇمىس تولىق ورىندالماعانىنا نازار اۋداردى. ۋاقتىلى ارەكەت ەتۋ ناتيجەسىندە زاڭ بۇزۋشىلىقتار جويىلدى.
