ءماسليحاتتار ۋاقىتپەن بىرگە تىنىستايدى

ەلىمىزدىڭ مەملەكەتتىك بيلىگىندە جەرگىلىكتى وكىلەتتى ورگاندار – ءماسليحاتتار ماڭىزدى ورىن الادى. 1994 جىلى ناۋرىز ايىندا ەلىمىزدىڭ بارلىق ايماعى سەكىلدى قوستاناي وبلىسىندا دا ءماسليحاتتاردىڭ العاشقى ۇيىمداستىرۋ سەسسيالارى ءوتىپ, دەپۋتاتتار ىسكە كىرىسكەن بولاتىن. سودان بەرى وبلىستاعى ءماسلي­حاتتار جەرگىلىكتى اتقارۋشى بيلىكپەن تىزە قوسىپ, وڭىردەگى كۇر­دەلى ماسەلەلەردى بىرگە شەشىپ كەلەدى. وبلىستىڭ ەكونوميكا­لىق-الەۋمەتتىك دامۋىنداعى ين­نو­ۆاتسيالىق-ينۆەستيتسيا­لىق جانە الەۋمەتتىك سالالاردا­­عى مەم­لەكەتتىك باعدارلامالار­دىڭ ءجۇ­زە­گە اسۋىنا ءماسليحات­تار ىقپا­لى ۇلكەن. جاقىندا قوستاناي وبلىستىق ءماسليحاتىنىڭ حاتشىسى ساي­لاۋبەك ەسجانوۆ وبلىستىق ءباسپاسوز كلۋبىندا جۋرناليستەردىڭ سۇ­راقتارىنا جاۋاپ بەردى. وبلىستاعى ءماسليحاتتاردا 300-دەن اسا, ال وبلىستىق ءماسليحاتتا 36 دەپۋتات بار. ولار عىلىمداعى, اۋىل شارۋاشىلىعى مەن وندىرىستەگى, ءبىلىم بەرۋ, دەنساۋلىق ساقتاۋ, مادەنيەت سالالارىنداعى جاۋاپتى قىزمەتىمەن قاتار, ءماسليحات جۇمىسىن قوعامدىق نەگىزدە اتقارادى. وبلىستىق ماسليحاتتاعى التى تۇراقتى كوميسسيا نەگىزىنەن بيۋدجەت جانە الەۋمەتتىك سالاداعى ءتۇرلى ماسەلەلەردى تالداپ, باعىتتاپ وتىرادى. سايلاۋبەك ەرعازى ۇلى ­جۋرناليستەرمەن كەزدەسۋىندە كوبىنە تۇرعىندار اراسىندا پىكىرتالاس تۋدىراتىن ماسەلەلەرگە توقتالدى. سولاردىڭ ءبىرى – ونو­ماستيكا ماسەلەسى, ادەتتە, جۇرت­شىلىقتىڭ نازارىن كوبىرەك اۋدارادى. وبلىستىق ءماسليحات حاتشىسى سۇراققا سايكەس جاۋاپ بەرە كەلىپ, كوشە, ەلدى مەكەندەر اتىن ءوز­گەرتۋ داعدارىس كەزىندە ۋاقىتشا كەيىنگى شەگەرىلە تۇراتىنىن ايتتى. قازىر كوپشىلىكتى يدەولوگيالىق ەمەس, ەكونوميكالىق ماسەلەلەر كوبى­رەك ويلانتۋعا ءتيىس. ويتكەنى, مۇنىڭ بارلىعى دا قارجىنى تالاپ ەتەدى. – كوشەنىڭ, ەلدى مەكەننىڭ اتىن وزگەرتۋ, بەلگىلى تۇلعالارىمىزدىڭ ەسىمىن قالىپقا كەلتىرۋ, ماڭگى ەستە قالدىرۋ سەكىلدى ماسەلەلەر ماسليحاتتارعا تۇسەدى. ارينە, مۇنىڭ بارلىعى دا كەرەك. الايدا, دەپۋتاتتار بۇل ماسەلەنى 2-3 جىلعا كەيىنگە ىسىرا تۇرادى. سەبەبى, داعدارىس – ۋاقىتشا قۇ­بىلىس, ول وتەدى. ەكونوميكا جاق­سارىپ, ­بيۋدجەت قالپىنا كەلگەن كەزدە قاجەت دەپ تابىلعان اتاۋلاردى وزگەر­تۋ قاشپايدى, – دەدى. سايلاۋبەك ەسجانوۆ. سونىمەن قاتار, سايلاۋبەك ەرعازى ۇلى وبلىس بيۋدجەتىنىڭ قىسقاراتىنىن ەسكە سالدى. ەتەك-جەڭىمىزدى جيناپ, كورپەگە قاراي كوسىلىپ, ءبىردى ەكەۋ ەتىپ ۇنەمدەگەندە عانا الەمدى شارپىپ وتىرعان داعدارىسقا قارسى تۇرۋعا بولادى. الەۋمەتتىك باعدارلامالار بار مۇمكىندىگىنشە جۇرگىزىلەتىن بولادى. بىراق كەيبىر جوبالارعا قارجى شەكتەلەدى. ءماسليحات حاتشىسى اۋىلدىق وكرۋگتەر اكىمدەرىنىڭ بيۋدجەتى, وڭىردە ءتۋريزمدى دامىتۋ, وبلىستىق دەپۋتاتتار جۇمىستارى, تەگىن ءدارى-دارمەك سەكىلدى الەۋمەتتىك قاجەتتەرگە بيۋدجەتتەن بولىنەتىن قارجى, ءماسليحاتتىڭ بۇگىنگى تىنىسى تۋرالى دا سۇراقتارعا جاۋاپ بەردى. – دەپۋتاتتار بيۋدجەت قار­جىسىنىڭ ءتيىمدى ءارى ورىندى جۇمسالۋىنا اسا ءمان بەرەدى. ءتىپتى, جەرگىلىكتى اتقارۋشى بيلىكپەن وسى جونىندە كەلىسپەيتىن كەزدەر دە كەزدەسەدى. مىسالى, قايسىبىر جىلى «لەسنايا سكازكا» دەمالىس لاگەرىن جوندەۋگە بيۋدجەتتەن بولىنەتىن قارجىنى ۋاقىتشا توقتاتقانى بار. سەبەبى, كىشكەنتاي عانا لاگەردى قالپىنا كەلتىرۋگە بيۋدجەتتەن مول قارجى جۇمساۋدى دەپۋتاتتار قيسىنسىز دەپ شەشتى. ولاردىڭ بارلىعى دا مامان, ىسكەر جاندار عوي, ەكونوميكالىق ماسەلەلەردى جاقسى بىلگەننەن كەيىن ءار نارسەنىڭ رەتىن دە ورىندى قوزعايدى, – دەدى وبلىستىق ءماسليحات حاتشىسى س.ەسجانوۆ. سوندىقتان ماسليحاتتارعا حالىق سەنەدى. ءنازيرا جارىمبەتوۆا, «ەگەمەن قازاقستان». قوستاناي.