«اقمولا وبلىسى اكىمىنىڭ وكىمىمەن, قازاقستان رەسپۋبليكاسى پرەزيدەنتى اكىمشىلىگىنىڭ كەلىسىمى جانە قالالىق ءماسليحاتتىڭ ماقۇلداۋىمەن ءانۋار كۇمپەكەەۆ كوكشەتاۋ قالاسىنىڭ اكىمى بولىپ تاعايىندالدى. وبلىس اكىمى مارات احمەتجانوۆ جاڭا اكىمدى تانىستىرۋ بارىسىندا ونىڭ تاجىريبەلى باسشى ەكەنىن, جوعارى كاسىبي جانە ۇيىمداستىرۋشىلىق قابىلەتتەرگە يە ەكەنىن اتاپ ءوتتى», دەلىنگەن وبلىس اكىمدىگى ءباسپاسوز قىزمەتىنىڭ حابارلاماسىندا.
مارات احمەتجانوۆ اتاپ وتكەندەي, جاڭا اكىمگە تۇرعىن ءۇي-كوممۋنالدىق شارۋاشىلىق, اۆتوموبيل جولدارى جانە قۇرىلىس سالالارىنداعى ماسەلەلەردى شەشۋ بويىنشا بەلسەندى جۇمىس جۇرگىزۋ قاجەت بولادى. سونىمەن قاتار قازىرگى ۋاقىتتا قالا اكىمىنىڭ باستى مىندەتتەرىنىڭ ءبىرى – جىلىتۋ ماۋسىمىن ويداعىداي وتكىزۋ جانە تۇرعىنداردى ساپالى اۋىز سۋمەن قامتاماسىز ەتۋ بولماق.
«الدا شەشىلۋى ءتيىس ماسەلەلەر مەن جۇزەگە اسىرىلاتىن جاڭا جوبالار بويىنشا اۋقىمدى جۇمىس كۇتىپ تۇر. سوندىقتان جەدەل ءارى ءتيىمدى شەشىمدەر قابىلداۋ تالاپ ەتىلەدى», دەدى وبلىس اكىمى.
