فورۋمنىڭ العاشقى كۇنى رەسپۋبليكالىق انالار كەڭەسى مۇشەلەرىنىڭ بىلىكتىلىگىن ارتتىرۋ ماقساتىندا سەمينار ۇيىمداستىرىلعان. وعان قازاقستان حالقى اسسامبلەياسى رەسپۋبليكالىق انالار كەڭەسىنىڭ توراعاسى ءنازيپا شاناي, «انا ءۇيى» نەگىزىن قالاۋشى انار راحيمباەۆا, اتىراۋ وبلىسى اكەلەر كەڭەسىنىڭ توراعاسى شوتا قاناتوۆ, سونداي-اق مەملەكەتتىك ورگانداردىڭ وكىلدەرى جانە وڭىرلىك انالار كەڭەستەرىنىڭ مۇشەلەرى قاتىستى.
بىلىكتىلىكتى ارتىرۋ سەمينارى بارىسىندا ء«بىرتۇتاس تاربيە» تۇجىرىمداماسىن ىسكە اسىرۋدا قوعامعا تۇساۋ بولار وتكىر ماسەلەلەر تالقىلاندى. ال ەكىنشى كۇنى ەلورداداعى دوستىق ۇيىندە سالتاناتتى ءىس-شارا ءوتتى.
جيىنعا قازاقستان حالقى اسسامبلەياسى توراعاسىنىڭ ورىنباسارى مارات ءازىلحانوۆ, مادەنيەت جانە اقپارات ۆيتسە-ءمينيسترى ايزادا قۇرمانوۆا, وقۋ-اعارتۋ مينيسترلىگى تاربيە جۇمىسى جانە قوسىمشا ءبىلىم دەپارتامەنتىنىڭ ديرەكتورى مەرۋەرت مەدەتبەكوۆا, ۇلتتىق ۇلان باس قولباسشىسىنىڭ تاربيە جانە الەۋمەتتىك-قۇقىقتىق جۇمىستار جونىندەگى ورىنباسارى گەنەرال-مايور قانات ۇمبەتوۆ, اتالعان كەڭەس مۇشەلەرى جانە ەتنومادەني بىرلەستىكتەردىڭ وكىلدەرى قاتىستى.
– انالاردىڭ ءپاتريوتيزمدى, ۇلتتىق رۋحتى قالىپتاستىرۋداعى جانە وتباسىلىق قۇندىلىقتاردى ساقتاۋداعى ماڭىزى زور. انالار كەڭەسى 10 جىل ىشىندە كوپتەگەن باستامانى جۇزەگە اسىرىپ, ەتنوسارالىق كەلىسىمدى دامىتۋعا جانە وتباسىلىق داستۇرلەردى نىعايتۋعا ەلەۋلى ۇلەس قوستى. رەسپۋبليكا بويىنشا 1 700-دەن اسا انالار كەڭەسى گەندەرلىك تەڭدىكتى ساقتاۋ, ايەلدەردىڭ قۇقىقتارىن قورعاۋ, وتباسى ينستيتۋتىن دامىتۋ, ءارى ناشاقورلىق پەن زورلىق-زومبىلىق سياقتى الەۋمەتتىك ماسەلەلەرمەن كۇرەسۋ سياقتى مەملەكەتتىك باسىمدىقتار شەڭبەرىندە ءوز قىزمەتىن بەلسەندى جۇرگىزىپ جاتىر, – دەدى ا.قۇرمانوۆا.
قاتىسۋشىلار «سالاماتتى سانا» ارنايى جوباسىنىڭ جۇزەگە اسىرىلۋ بارىسى مەن وڭىرلىك انالار كەڭەستەرىنىڭ قىزمەتى تالقىلادى. ءىس-شارادا قۋاندىق بيشىمباەۆتىڭ ىسىندە مەملەكەتتىك ايىپتاۋشى بولعان ايجان ايماعانوۆا ءسوز الدى. ول جينالعانداردى مەرەيتويمەن قۇتتىقتاپ, حالىقتى قوعامدا قۇقىقتىق مادەنيەتتى ناسيحاتتاۋعا بەلسەندى اتسالىسۋعا شاقىردى.
– كەيىنگى كەزدە جاستار اراسىندا قۇقىق بۇزۋشىلىقتىڭ كوبەيۋى بايقالادى. زورلىق-زومبىلىق, ۆانداليزم, بۇزاقىلىق فاكتىلەرى مەن بالالارعا قاتىستى قىلمىستاردىڭ ارتۋى الاڭداتىپ تۇر. بالالار قۇقىق پەن بوستاندىق ساقتالاتىن قاۋىپسىز قوعامدا ءوسۋى قاجەت. قوعام زاڭنىڭ ۇستەمدىگى ارقىلى عانا داميدى. مەملەكەت باسشىسى قاسىم-جومارت توقاەۆ تا ءدال وسى سوزدەردى حالىق الدىنداعى باياندامالارىندا ايتىپ ءجۇر. انالار كەڭەسى ء«تارتىپتى وزىڭنەن باستا» قوعامدىق اكتسياسىن باستاۋدى ۇسىندى. مۇنداعى باستى ماقسات – جاستار اراسىندا قۇقىقتىق مادەنيەتتى قالىپتاستىرۋعا ۇندەۋ, قۇقىق بۇزۋشىلىق پەن تارتىپسىزدىكتىڭ الدىن الۋ, قوعامدا زاڭ مەن ءتارتىپ ۇستەمدىگىن ناسيحاتتاۋ. وسى ارقىلى جاستاردى قۇقىق بۇزۋشىلىقتان اۋلاق بولۋعا تاربيەلەيمىز, – دەدى پروكۋرور.
باسقوسۋدا انالار كەڭەسىنىڭ بەلسەندى مۇشەلەرى ازاماتتىق قوعامدى دامىتۋعا جانە ەتنوسارالىق بىرلىكتى نىعايتۋعا قوسقان ۇلەسى ءۇشىن ماراپاتتالدى.
