وڭىرلىك جەلى ازىرگە سولتۇستىك قازاقستان, قوستاناي, شىعىس قازاقستان, پاۆلودار, ماڭعىستاۋ, اقمولا جانە اباي وبلىسىندا اشىلدى. الداعى ۋاقىتتا كەزەڭ-كەزەڭىمەن وزگە ايماقتاردان دا اشىلادى دەپ جوسپارلانىپ وتىر. بۇل تۋرالى جيىندا قسزي ديرەكتورى ەركىن تۇقىموۆ ايتتى. سونداي-اق ول بۇل باستاما وڭىرلەردىڭ اناليتيكالىق الەۋەتىن نىعايتۋدا ماڭىزدى قادام ەكەنىن اتاپ ءوتتى.
– پرەزيدەنت قاسىم-جومارت توقاەۆ حالىققا جولداۋلارىندا مەملەكەتتىك ساياساتتىڭ نەگىزگى باسىمدىقتارىنىڭ ءبىرى وڭىرلەردى دامىتۋ ەكەنىن باسا ايتقان. «قۋاتتى وڭىرلەر – قۋاتتى ەل» – بۇل جاي عانا ادەمى سوزدەر ەمەس, ەلىمىزدى جاڭعىرتۋدىڭ ايقىنداۋشى فورمۋلاسى. وسى ورايدا وڭىرلىك زەرتتەۋلەردى ساپالى ءارى جان-جاقتى جۇرگىزۋ اسا ماڭىزدى. ەكونوميكالىق جانە الەۋمەتتىك سالاداعى ناقتى كورىنىستى «وڭىردەن» كورەتىن بولساق, ءبىز ساپالى تالداۋلار دايىنداپ, وڭىرلەردى قولداۋ مەن دامىتۋ بويىنشا كەشەندى ۇسىنىستار ازىرلەي الامىز, – دەدى ە.تۇقىموۆ.
ءىس-شاراعا سەنات جانە ءماجىلىس دەپۋتاتتارى, اكادەميالىق جانە ساراپشىلار قوعامداستىعىنىڭ وكىلدەرى قاتىستى. ولار باستامانى قولداپ, ساۋالدارىن قويىپ, وڭىرلىك جەلى قامتۋعا ءتيىس ۇسىنىستارىن ورتاعا سالدى.
– وبلىستاعى ساراپشىلار مەيلىنشە تاۋەلسىز بولعانى دۇرىس. ولارعا ءوڭىردىڭ الەۋمەتتىك-ەكونوميكالىق احۋالىن زەرتتەۋدە, وتكىر ماسەلەدە ساراپتاما جاساۋدا جەرگىلىكتى مەملەكەتتىك ورگانداردىڭ باسقا دا مەكەمەلەردىڭ ىقپالى بولماۋى كەرەك. ويتكەنى كوپ جاعدايدا پرەزيدەنت اكىمشىلىگىنە جيناقتالاتىن اقپاراتتار ايماقتاعى تولىق كارتينانى كورسەتپەيدى. حالىقتىڭ مۇڭ-مۇقتاجىنا قۇلاق اسىپ, ىشكى ساياسي ماسەلەلەردى نازارعا العان ابزال. بۇل رەتتە ورتالىق اپپاراتتان باقىلايتىن, ياعني قازاقستاننىڭ ستراتەگيالىق زەرتتەۋلەر ينستيتۋتى بازاسىندا كەڭەس قۇرىلعانى ءجون. وعان ىقپالدى ازاماتتاردى تارتۋدى كوزدەۋ كەرەك. بايقاساق, قازىر ءبىر كىشكەنتاي عانا اۋداننىڭ وزىندە 10-20 كەڭەس بار. بارلىعى سول جەرگىلىكتى مەكەندەگى پروبلەمانى شەشىپ وتىر دەۋ قيىن. ءتىپتى كەڭەسكە جۇرتشىلىق سەنىم بىلدىرگەن بلوگەرلەردى دە تارتۋ ماسەلەسىن ابدەن ويلاستىرۋ قاجەت. ويتكەنى ولار ماسەلەنى اشىق جەتكىزگەنىمەن, حاباردارلىق دەڭگەيىن كوتەرگەنىمەن, ءتۇيىنىن تارقاتپايدى. دەمەك وسى ورايدا وڭىرلىك جەلىنىڭ مىقتى ساراپشىلارى كومەك بولادى دەپ ويلايمىن, – دەدى سەنات دەپۋتاتى عالياسقار سارىباەۆ.
پىكىرلەر تالقىلانعان سوڭ, قاتىسۋشىلار ايماق وكىلدەرىنىڭ تالدامالىق جانە زەرتتەۋشىلىك داعدىلارىن دامۋعا باعىتتالعان ترەنينگتىڭ كۋاسى بولدى. قسزي ساراپشىلارى ايماقتىق ارىپتەستەرىنە ساندىق جانە ساپالىق زەرتتەۋ ادىستەرى, اناليتيكالىق قۇجاتتاردىڭ تۇرلەرى جانە ولاردىڭ قۇرىلىمى تۋرالى ايتىپ بەردى. عىلىمي زەرتتەۋلەردى جوسپارلاۋ بويىنشا پراكتيكالىق كەڭەستەر, اقپاراتتىق قاۋىپسىزدىك تاقىرىبى قاۋزالدى.
