جيناقتى قازاقستان جازۋشىلار وداعىنىڭ باتىس قازاقستان وبلىسىنداعى وكىلدىگى مەن قادىر مىرزا ءالى اتىنداعى وبلىستىق مادەنيەت جانە ونەر ورتالىعى دايىنداپ, وبلىستىق قوعامدىق دامۋ باسقارماسىنىڭ قارجىلاي قولداۋىمەن باسىلىپ شىققان. كىتاپقا 16-35 جاس ارالىعىنداعى 32 جاس اقىننىڭ شىعارماسى ەنگەن.
– بۇل جيناققا اقجايىق اتىرابىندا تۋىپ-وسكەن اقىنداردىڭ ولەڭدەرىن ەنگىزەمىز دەپ ويلاپ ەدىك. الايدا اقىلداسا كەلە, باسقا وڭىردە ءومىر ەسىگىن اشىپ, ءبىزدىڭ وبلىستا ءبىلىم العان, وسى جاقتا قىزمەتكە ورنالاسىپ, ومىردەگى ورنىن اقجايىق اتىرابىنان تاپقان جاستاردى دا جيناققا ەنگىزدىك. مۇنداي جيناق ءبىزدىڭ وبلىستا سوڭعى رەت 23 جىل بۇرىن باسىلعان ەكەن. يگى باستاماعا قولداۋ بىلدىرگەن ءوڭىر باسشىسى ناريمان تورەعاليەۆكە, وبلىستىق قوعامدىق دامۋ باسقارماسىنا ريزاشىلىعىمىزدى بىلدىرەمىز! جاڭا جيناق جاس اقىندارعا شابىت سىيلاسىن, – دەيدى پرەزيدەنت جانىنداعى ۇلتتىق قۇرىلتايدىڭ مۇشەسى, «قۇرمەت» وردەنىنىڭ يەگەرى, قازاقستان جازۋشىلار وداعىنىڭ باتىس قازاقستان وبلىسىنداعى وكىلى باۋىرجان عۇبايدۋللين.
وبلىستىق قوعامدىق دامۋ باسقارماسىنىڭ باسشىسى دارحان قادىراليەۆ تە ءسوز الىپ, جاس قالامگەرلەرگە ساتتىلىك تىلەدى.
– ءبىز جاستاردى قولداۋعا قاشاندا دايىنبىز. وسى جيناق سونىڭ دالەلى. ولەڭ ولكەسىنە قانات قاققان جاس اقىنداردىڭ شىعارماشىلىعىن شىڭداۋ باعىتىنداعى جۇمىستار جالعاسادى. بۇل يگى جوبا وبلىس اكىمىنىڭ تاپسىرماسىمەن جۇزەگە استى. كىتاپقا ولەڭدەرى ەنگەن اقىنداردىڭ تالاي بەلەستى باعىندىراتىنىنا سەنەمىن, – دەدى دارحان قانىبەك ۇلى.
ال قادىر مىرزا ءالى اتىنداعى مادەنيەت جانە ونەر ورتالىعىنىڭ ديرەكتورى سەرىك توقمامبەتوۆ جاستار شىعارماشىلىعىن شىڭداۋ ءۇشىن الدا دا ءبىراز شارۋا اتقارىلاتىنىن ايتادى.
اسەرلى ادەبي كەشتە جيناققا ولەڭ-جىرى ەنگەن شايىرلار كەزەك-كەزەك ساحناعا شىعىپ, جىردان شاشۋ شاشتى. ماحامبەت وتەمىس ۇلى اتىنداعى باتىس قازاقستان ۋنيۆەرسيتەتى فيلولوگيا فاكۋلتەتىنىڭ ستۋدەنتتەرى ءامينا ەدرەس, دياس بەيىسوۆتەر ءان شىرقادى.
باتىس قازاقستان وبلىسى
