ناۋقاستىڭ دياگنوزى انىقتالدى

بۇعان دەيىن حابارلاعانى­مىز­داي, 26 قاڭتاردا اتىراۋداعى «تەڭىز» كەنىشىندەگى جوبانىڭ مەردىگەرى – «يمستالكوم» سەرىكتەس­تىگىنىڭ ەكى قىزمەتكەرى جۇقپالى دەرتكە شالدىعىپ, بىرەۋى كوز جۇمعان ەدى. باستاپقىدا وبلىس ورتالىعىنداعى اۋرۋحاناعا جەتكىزىلگەن ناۋقاسقا مەنينگيت, مەنينگوكوكتسەميا سىرقاتىمەن اۋىرعان دەپ بولجام جاسالعان بولاتىن. وسىعان بايلانىستى قۇرامىندا ينفەكتسيونيست-دارىگەر, ەپيدەميولوگ-دارىگەر, ۆيرۋسولوگيا جانە باكتەريولوگيا زەرتحاناسىنىڭ مەڭگەرۋشىلەرى بار بريگادا قۇرىلىپ, «تەڭىز» ۆاحتالىق قالاشىعىنا ىسساپارعا جىبەرىلگەن ەدى. ال كەشە وبلىستىق تۇتىنۋ­شىلار قۇقىعىن قورعاۋ دەپارتا­مەنتى باسشىسىنىڭ ورىنباسارى ەربولات ۋايىسوۆ گازەت تىلشىسىنە اۋرۋحاناداعى ناۋقاستىڭ دياگ­نوزى ناقتىلانعانىن, مەديتسينا تەرمينىمەن ايتقاندا, مەنينگوكوككتى جۇقپا, مەنينگوكوكتسەميا دەپ اتالاتىنىن حابارلادى. «ەپيدەميولوگيالىق تەكسەرۋ كەزىندە قايتىس بولعان ادامدا اۋرۋدىڭ كلينيكالىق بەلگىلەرى (باستىڭ اۋرۋى, تاماعىنىڭ اۋىرسىنۋى, دەنە قىزۋىنىڭ 37,7 گرادۋسقا دەيىن جوعارىلاۋى) 21 قاڭتاردا باستالعانى انىقتالدى. ناۋقاس مەديتسينالىق كومەككە جۇگىنبەگەن, ءوز بەتىنشە ەمدەلىپ, پاراتسەتومول, تاعى باسقا دارىلەر قابىلداعان. دارىگەرلىك كومەككە جۇگىنگەن كەزدە ناۋقاستا ءجىتى جۇرەك جۇمىسىنىڭ السىرەۋى, وكپەنىڭ ءىسىنۋى بەلگىلەرى بولىپ, اۋىر حالدە بولعان. ەكىنشى ناۋقاستا اۋرۋ بەلگىلەرى 23 قاڭ­تاردا باستالعان. جاعدايى ورتاشا اۋىر, تۇراقتى, قازىرگى كەزدە وبلىستىق جۇقپالى اۋرۋلار اۋرۋحاناسىندا ەم قابىلداۋدا. اۋرۋلارمەن بىرگە جۇمىس ىستەگەن 3 قىزمەتكەر «تەڭىز­شەۆرويل» سەرىكتەستىگىنىڭ كليني­كاسىنا وقشاۋلانىپ, انتيبيوتيكتەرمەن پروفيلاكتيكالىق ەم الۋدا. دياگنوزدارى كلينيكالىق دالەلدەنگەن, لابوراتوريالىق زەرتتەۋ جۇقپالى اۋرۋلار اۋرۋحاناسى زەرتحاناسىندا جالعاسۋدا دەپ ءمالىم ەتتى وبلىستىق تۇتىنۋ­شىلار قۇقىعىن قورعاۋ دەپار­تامەنتى باسشىسىنىڭ ورىنباسارى ەربولات ۋايىسوۆ. قازىر جۇقپالى ىندەت تىركەلگەن وشاق ورنىندا ەپيدەمياعا قارسى شارالار جاسالىپ, ءجىتى باقىلاۋعا الىندى. جولداسبەك شوپەعۇل, «ەگەمەن قازاقستان». اتىراۋ وبلىسى.