سۋرەت: ru.freepik.com
«جامبىل وبلىسىنىڭ مامانداندىرىلعان تابيعات قورعاۋ پروكۋراتۋراسىنىڭ ارالاسۋىنان كەيىن جامبىل, رىسقۇلوۆ, مويىنقۇم, قورداي اۋداندارىندا قالدىقتاردىڭ پايدا بولۋى مەن جيناقتالۋ نورمالارىن بەكىتۋ ماسەلەلەرى بويىنشا ءتيىستى اكتىلەر, سونداي-اق جۋالى, تالاس, رىسقۇلوۆ اۋداندارى مەن تاراز قالاسىندا تاريفتەردى بەكىتۋ شارالارى قابىلداندى. جۇرگىزىلگەن جۇمىستىڭ قورىتىندىسىندا ستيحيالىق قوقىس ۇيىندىلەرى ءۇشىن 9 اۋدان اكىمىنىڭ ورىنباسارى مەن اۋىلدىق وكرۋگ اكىمدەرى اكىمشىلىك جاۋاپتىلىققا تارتىلدى. بۇدان باسقا, پروكۋراتۋرانىڭ قالدىقتاردى دۇرىس ەسەپكە الماۋ دەرەكتەرى بويىنشا قاداعالاۋ اكتىسىمەن جامبىل وبلىسىنىڭ باس مەملەكەتتىك ەكولوگيالىق ينسپەكتورىنىڭ مىندەتىن اتقارۋشى تارتىپتىك جاۋاپكەرشىلىككە تارتىلدى», دەلىنگەن رەسمي مالىمەتتە.
دەرەككە سەنسەك, ەلىمىزدە جىل سايىن 5 ملن تونناعا جۋىق تۇرمىستىق قالدىق شىعارىلادى. ونىڭ شيرەگىنە جۋىعى عانا وڭدەلەدى. سوندا قالعان قوقىس قايدا شاشىلىپ جاتىر؟
جىل باسىندا جەرگىلىكتى باق-تا المانيالىق «AMK Global GmbH» كومپانياسى تاراز قالاسىندا تۇرمىستىق قاتتى قالدىقتاردى قايتا وڭدەۋدەن وتكىزەتىن زاۋىت سالۋعا نيەتتى دەگەن اقپارات تارادى. ءتىپتى بۇل ماسەلەگە ءوڭىر باسشىسى ەربول قاراشوكەەۆ تە ارالاسقان. «ThiemeBieg & Associates GmbH» كونسورتسيۋمىنىڭ باس ديرەكتورى تيمە تورستەنمەن كەزدەسۋدە اتالعان جوبانى جۇزەگە اسىرۋ ماسەلەسى تالقىلانعان.
«كەزدەسۋ بارىسىندا ينۆەستورلار كومپانيا مەن جوبالارى تۋرالى جان-جاقتى اقپارات بەردى. تاۋلىگىنە 500 توننا قوقىس وڭدەۋگە قۋاتتى زاۋىت 100 جاڭا جۇمىس ورنىن قۇرۋعا مۇمكىندىك بەرەدى. كومپانيا جوبانى ىسكە اسىرۋ ءۇشىن 140 ملن ەۋرو ينۆەستيتسيا سالۋدى جوسپارلاپ وتىر. ميۋنحەن ۋنيۆەرسيتەتى ازىرلەگەن وزىق تەحنولوگيالاردى پايدالاناتىن «AMK Global GmbH» كومپانياسى قالدىقتاردىڭ 80 پايىزىنا دەيىن قايتا وڭدەۋدەن وتكىزەدى. سونداي-اق كاسىپورىندا قوقىستى سۇرىپتاۋ بويىنشا اۆتوماتتى جەلى ىسكە قوسىلادى. مۇندا وتتەگى, ازوت, كومپوست, كومىرتەكتى تالشىق جانە تازا اۆياتسيالىق وتىن سەكىلدى جاناما ونىمدەر ءوندىرىسىن جولعا قويۋ جوسپارلانادى. جالپى, كاسىپورىن قۋاتتىلىعىن كەزەڭ-كەزەڭىمەن ارتتىرۋ پوليگونداعى قالدىقتاردى تاسىمالداۋ مەن ولاردى قايتا وڭدەۋگە مۇمكىندىك بەرەدى دەپ كۇتىلەدى. ايتا كەتەيىك, نەمىس كومپانياسىنىڭ وكىلدەرى جۇمىس ساپارى اياسىندا وبلىس ورتالىعىنداعى پوليگونعا ارنايى بارىپ, تانىسىپ قايتتى. ەربول قاراشوكەەۆ ينۆەستورلارعا مەملەكەت تاراپىنان كورسەتىلەتىن جەڭىلدىكتەردى ءتۇسىندىرىپ, جوبانىڭ ماڭىزدىلىعىن اتاپ ءوتتى», دەپ مالىمدەدى سول كەزدە جەرگىلىكتى باق.
بۇل جاڭالىقتى ەستىپ, وڭىردەگى احۋال رەتكە كەلەر دەپ ۇمىتتەنگەن ەدىك. بىراق جىل باسىنان كەيىن بۇل اڭگىمە ۇمىت قالعان سەكىلدى.
«قوقىس وڭدەيتىن زاۋىت – وتە ماڭىزدى نىسان. ءبىز قورشاعان ورتانى قورعاۋعا باعىتتالعان جوبالاردى قولدايمىز. ەندىگى ماسەلە – اتالعان زاۋىت قۇرىلىسىن تەزدەتىپ باستاپ, ناقتى ىسكە كوشۋ. بۇل رەتتە قالا باسشىلىعى مەن سالالىق باسقارمالار كومپانيامەن تىعىز بايلانىستا بولىپ, جوبانى تولىق سۇيەمەلدەۋى قاجەت», دەگەن ەدى ءوڭىر باسشىسى جىل باسىندا.
قالاي دەسەك تە, جامبىل وبلىسىنا قوقىستى قايتا وڭدەيتىن زاۋىت كەرەك ەكەنى انىق. جىل باسىندا ءاپ-ادەمى باستالعان زاۋىتتىڭ تاقىرىبى اڭگىمە كۇيىندە قالىپ كەتكەن جوق پا دەگەن وي كەلەدى. ويتكەنى قىركۇيەك ايىندا جىل ىشىندە اتقارىلعان جۇمىستاردى جىپكە تىزگەن ءوڭىر باسشىسى ينۆەستيتسيالىق جوبالار, سالىنىپ جاتقان زاۋىتتاردىڭ بىرقاتارىنىڭ اتىن اتاپ, ءتۇسىن تۇستەگەنىمەن, قوقىس وڭدەيتىن زاۋىت تۋرالى جاق اشپادى.
جىل باسىندا ايتىلعان جوبا ۇمىت قالعان جوق پا؟ جاۋاپتى باسقارمالاردىڭ باسشىلارى مەن وزگە دە جاۋاپتى تۇلعالار قوقىس وڭدەۋ زاۋىتىنىڭ قۇرىلىسى قاشان باستالاتىنىن ءوڭىر باسشىسىنا ايتپاعان با؟ الدە ءوڭىر باسشىسىنىڭ تاپسىرماسىنا نەمقۇرايلى قاراپ ءجۇر مە؟ كىم ءبىلسىن. زاۋىت تۋرالى اكىمنىڭ بايانداماسىندا ايتىلماعانىنا قاراعاندا, قۇرىلىستىڭ اۋىلى الىس سياقتى...
جامبىل وبلىسى
