«وتاندىق ەلەكتر ەنەرگياسىندا كوتەرمە ساۋدا نارىعىنىڭ جاڭا مودەلى قولدانىلا باستاعالى «ەكىباستۇز گرەس-2 ستانساسى» ەلەكتر ەنەرگياسىنىڭ ورتالىقتاندىرىلعان جانە تەڭگەرىمدەۋشى نارىعىنا ساتۋشى رەتىندە قاتىسادى, سونداي-اق وندىرىلگەن ەلەكتر ەنەرگياسىنىڭ بارلىق كولەمىن 2023 جىلعى 1 شىلدەدەن باستاپ كورسەتىلگەن نارىقتاردا وتكىزەدى. ال ستانسادان ءوندىرىلىپ شىعاتىن جىلۋ سولنەچنىي كەنتىنىڭ تۇرعىن ۇيلەرى مەن وزگە دە عيماراتتارىن, كاسىپورنىمىزدىڭ وندىرىستىك الاڭىن جىلىتۋعا باعىتتالعان. ۇلتتىق ەكونوميكانىڭ ءوسۋى ەلەكتر ەنەرگەتيكاسى سالاسىنىڭ وزىق دامۋىن تالاپ ەتەدى. سەكتوردىڭ تۇراقتى دامۋىنىڭ نەگىزگى فاكتورلارى – ەلەۋلى ينۆەستيتسيا مەن وتاندىق تۇتىنۋشىلاردى جابدىقتاۋدى ءتيىمدى باسقارۋ. مەملەكەت باسشىسى 2023 جىلعى جولداۋىندا ەلەكتر ەنەرگەتيكاسى سەكتورىنا باسا ءمان بەرەتىنىن اتاپ ءوتتى. ماسەلەنى جۇيەلى شەشۋ ءۇشىن جاڭا ءوندىرۋشى قۋاتتاردى ەنگىزۋ جانە جۇمىس ىستەپ تۇرعان ەلەكتر ستانسالارىن جاڭعىرتۋ, جاڭارتۋ, تەحنيكالىق جاراقتاندىرۋ بويىنشا بىرقاتار جوبانى ىسكە اسىرۋ تالاپ ەتىلدى», دەيدى «ەكىباستۇز گرەس-2 ستانساسى» اق باسقارما توراعاسى بولات قاشاعانوۆ.
جوبانى ىسكە اسىرۋ ەنەرگەتيكالىق تاۋەلسىزدىكتى, ەنەرگيا قاۋىپسىزدىگىن, ەكسپورتتىق الەۋەتتى, ەلەكتر ەنەرگياسى مەن ەلەكتر قۋاتىنا ءوسىپ كەلە جاتقان قاجەتتىلىكتەردى قامتاماسىز ەتۋگە ىقپال ەتپەك. بۇعان قوسا, وزگەرىستەر سولنەچنىيداعى الەۋمەتتىك سالانى نىعايتۋعا سەپ بولادى دەگەن سەنىم زور. ەلدى مەكەندەگى تۇرعىنداردى جۇمىسپەن قامتۋ بۇگىندە ماڭىزدى ماسەلەنىڭ بىرىنە اينالعان. قوسىمشا ەنەرگيالىق بلوكتەردى سالۋ كەزەڭىندە شامامەن 1 500 ادام جۇمىلدىرىلادى. جوبانى ىسكە اسىرعاننان كەيىن جاڭادان ىسكە قوسىلعان قۋاتتاردى پايدالانۋ ءۇشىن 300-دەن استام تۇراقتى جۇمىس ورنى قۇرىلادى.
«بىلتىر رەسەيدىڭ تەحنولوگيالىق شەشىمدەرىندەگى جابدىقتى قولدانا وتىرىپ, جوبا بويىنشا تەحنيكا-ەكونوميكالىق نەگىزدەمە ازىرلەنگەن. بيىل مامىردا «مەمساراپتاما» رمك وعان بايلانىستى وڭ قورىتىندى شىعاردى. تامىز ايىندا وتاندىق «KBI Energy Group» جشس, «سترويندۋستريا» جشس جانە رەسەيلىك «ورگرەس» جشس-مەن №3 جانە №4 ەنەرگيالىق بلوكتەرىن جوبالاۋعا, جەتكىزۋگە جانە سالۋعا بايلانىستى EPC-شارت جاسالدى. وسى شارت شەڭبەرىندە «پ» ساتىسىنىڭ جوبالاۋ-سمەتالىق قۇجاتتاماسىن ازىرلەۋ باستالدى. قىركۇيەك ايىندا ەنەرگەتيكا مينيسترلىگىمەن 3-ەنەرگوبلوك بويىنشا ينۆەستيتسيالاردى قايتارۋ ءۇشىن ينۆەستيتسيالىق كەلىسىم جاسالدى. جوبا قۇرىلىسىن ىسكە اسىرۋ جونىندەگى ءىس-شارالار ستانسا اكتسيونەرلەرى بەكىتكەن كەستەگە سايكەس ورىندالادى», دەدى كاسىپورىن باسشىسى.
ەكىباستۇز №2 ماەس قۇرىلىسى 90-جىلداردىڭ باسىندا توقتاتىلىپ, قۇرىلىسى اياقتالعان ەكى بلوكپەن جۇمىس ىستەۋگە رۇقسات بەرىلگەن. سوندىقتان كاسىپورىندى تەحنولوگيالىق باعىتتا جەتىلدىرۋ, اياسىن كەڭەيتۋدىڭ مۇمكىندىگى وتە زور. قازىر ماەس-2 ستانساسى وندىرەتىن ەلەكتر قۋاتى قىرعىزستانعا دا ەكسپورتتالادى. گيننەستىڭ رەكوردتار كىتابىنا ەنگەن جەر بەتىندەگى ەڭ بيىك 420 مەترلىك الىپ مۇرجا دا وسىندا ورنالاسقان. جىل باسىنان بەرى ستانسا ەنەرگەتيكتەرى 4,1 ملرد كۆت/ساعات قۋات ءوندىردى.
«وتىن بەرۋ تراكتىسى, ءتۇتىن مۇرجاسى 4 ەنەرگيالىق بلوككە شاقتالسا, قوسىمشا قۇرىلىستار بلوگى, اشىق تاراتقىش قۇرىلعىلارى, كومپرەسسورلىق, ەلەكتروليزدىك, كىرمە تەمىرجولدار 8 ەنەرگيالىق بلوككە قىزمەت كورسەتە الادى. بۇعان قوسا مازۋت شارۋاشىلىعى, ىسكە قوسۋ قازاندىعى, كول-سۋ قويماسى, حيميالىق سۋ تازارتۋ قاراستىرىلعان. كۇل ءۇيىندىسىن 16 ەنەرگيالىق بلوك پايدالانادى. تەحنيكالىق سۋ شانداقسور كولى ارقىلى قامتاماسىز ەتىلىپ وتىر. كۇل مەن قوجدى سىرتقا شىعاراتىن جۇيە گيدراۆليكالىق, وزدىگىنەن اعاتىن نەگىزدە جاسالعان. گيدروكۇلدى كەتىرۋدىڭ سىرتقى جەلىلەرى 2 تىزبەكتەن تۇرسا, ولاردىڭ ءبىرى ۇنەمى رەزەرۆتە. كۇل ءۇيىندىسى قاراسور كولىنىڭ باسسەينىندە, ستانسادان 8 شاقىرىم قاشىقتىقتا جينالادى. ەكولوگيالىق تۇرعىدان العاندا بۇل ەكىباستۇز قالاسى مەن سولنەچنىي كەنتىنىڭ تۇرعىندارىنا ەشبىر قاۋىپ توندىرمەيدى», دەپ ءتۇسىندىردى «ەكىباستۇز گرەس-2 ستانساسى» اق باسقارما توراعاسى بولات قاشاعانوۆ.
جىلدىڭ العاشقى 9 ايىندا مۇندا 4 ملرد 166 ملن كۆت/ساعات ەلەكتر قۋاتى وندىرىلسە, شينالاردان 3 ملرد 931 ملن كۆت/ساعات ەنەرگيا بوساتىلعان. 2023 جىل قورىتىندىسىندا قوس بلوك 5 ملرد 659 ملن كۆت/ساعات قۋات بەرىپتى. قۋات ءوندىرۋ ءۇشىن مۇندا «بوگاتىر كومىر» كەنىشىنىڭ كومىرى مەن «پاۆلودار مۇناي-حيميا زاۋىتى» جشس-نىڭ مازۋتى پايدالانىلادى. ءوندىرىس تەحنولوگياسى ءۇشىن نەگىزگى سۋ ق.ساتباەۆ اتىنداعى كانالدان الىنىپ وتىر.
بۇگىندە ستانسادا 1 503 ادام ەڭبەك ەتەدى. ورتاشا جالاقى 505 مىڭ تەڭگەدەن اسادى. كاسىپورىن ءوز قىزمەتكەرلەرى ءۇشىن الەۋمەتتىك كومەكتىڭ كەڭ اۋقىمدى ءتۇرىن ازىرلەگەن. كوپبالالى, 14 جاسقا دەيىنگى مۇگەدەك بالالاردى تاربيەلەپ وتىرعان وتباسىلارعا اي سايىن جاردەماقى, بالا كۇتىمى بويىنشا 3 جىلعا دەيىن جاردەماقى, وقۋ دەمالىسىنا اقى تولەۋ, زەينەتكەرلەرگە دوتاتسيا تولەۋ جانە تاعى باسقا ماتەريالدىق كومەك تۇرلەرى قاراستىرىلعان.
كاسىپورىن باسشىلىعى 4, 5, 6-رازريادتى ەلەكتر-گازبەن دانەكەرلەۋشى, 5-رازريادتى تۋربينالىق/قازاندىق جابدىقتارىنداعى ماشينيست-تەكسەرۋشى ماماندىقتارى بويىنشا تاپشىلىق بار ەكەنىن جاسىرمادى. وسىعان وراي كوللەدج جانە جوعارى وقۋ ورىندارىمەن تۇراقتى نەگىزدە كاسىپتىك باعدار بەرۋ جۇمىستارى قولعا الىندى.
پاۆلودار وبلىسى,
ەكىباستۇز قالاسى
