اتا-بابادان قالعان جەردى كىرپىك ىلمەي كۇزەتۋ – ۇلكەن ابىروي. شەكارا قىزمەتىنىڭ اپتاپ ىستىق پەن اڭىراعان جەلدىڭ وتىندە جۇرەتىن جاۋىنگەرلەرى ءاربىر بۇتانىڭ قالقاسى, تاۋدىڭ اڭعارى, وزەن ساعاسى, جولدىڭ بۇلتارىسى مەن سايدىڭ قالتارىسىنداعى تىنىشتىققا جاۋاپتى. سوندىقتان ارناۋلى قىزمەت ساربازدارىنىڭ شىمىر بولۋىنا ەرەكشە كوڭىل بولىنەدى. بۇل ورايدا ۇقك شەكارا قىزمەتى «بوران» ارناۋلى ماقساتتاعى بولىمشەنىڭ سپورت جاتتىقتىرۋشىسى سايان نۇرىشەۆتىڭ ەڭبەگى ەرەكشە.
بالا كۇنىنەن سپورتقا جاقىن وسكەن سايان ءۇشىن ساربازداردى سپورتقا باۋلۋ – تابيعاتىنا جاقىن ءارى سۇيىكتى جۇمىسى. ءوزىنىڭ ايتۋىنشا, بۇل سالاعا وسىدان 25 جىل بۇرىن وتان الدىنداعى مىندەتىن اتقارۋعا كەلىپ, سودان بەرى اسكەري ومىرمەن تاعدىرىن بايلانىستىرۋعا شەشىم قابىلدايدى.
«اسكەرگە دەيىن ءارتۇرلى سپورتپەن شۇعىلداندىم. سونىڭ ىشىندە ۆولەيبول, فۋتبول, كۇرەس, بوكس سەكىلدى سپورت تۇرلەرىمەن ۇدايى جاتتىعىپ ءجۇردىم. اسكەرگە دايىن سپورتشى رەتىندە كەلدىم دەسەم بولاتىن شىعار. باسىندا الماتىداعى اسكەري بولىمشەدە جارتى جىل جاتتىعۋدا ءجۇرىپ, كەيىن ۇشارالداعى شەكارا بولىمشەسىنە اۋىستىرىلدىم. سول جەردە دەنە دايىندىعىنىڭ باستىعى قابىلەتىمدى بايقاپ, ءارتۇرلى جارىستارعا قاتىستىرا باستادى. باسىندا قويان-قولتىق ۇرىسقا قاتىسىپ, ءۇشىنشى ورىن الىپ كەلدىم. كەيىن دە جەڭىل اتلەتيكا, ءارتۇرلى فۋتبول, ۆولەيبول, ۇستەل تەننيسىنەن جارىستارعا قاتىسىپ ءجۇردىم. جەڭىس تە, جەڭىلىس تە بولدى. ەكى جىلدان سوڭ مىندەتتى اسكەري قىزمەتىم اياقتالاتىن كەزدە اسكەري باسشىلىقتان وسى سالادا قالۋعا ۇسىنىس ءتۇستى. جۇرەك قالاۋىم وسى جەرگە بۇرىپ تۇرعانىن ءتۇسىنىپ, كەلىسىم بەردىم. بۇل شەشىمىم ەشقاشان وكىندىرگەن ەمەس. بىزدە جىلىنا توعىز ءتۇرلى سپورتتان ۇدايى جارىس بولادى. بۇرىن جارىسقا ءوزىم قاتىسسام, قازىر جاتتىقتىرۋشىمىن», دەيدى ول.
سودان بەرى س.نۇرىشەۆ ەل ىشىندەگى ەمەس, شەكاراشىلار اراسىندا وتەتىن حالىقارالىق جارىستاردا دا باق سىناپ, جۇلدەلى ورىنمەن كەلگەن كۇندەرى كوپ. وسى جىلداردا رەسەي, ۋكراينا, بەلارۋس, قىتاي, وزبەكستان مەملەكەتتەرىندەگى سپورتتىق جارىستاردا كوك تۋىمىزدى جەلبىرەتىپ, قازاق اسكەرىنىڭ ايبىنىن اسقاقتاتۋعا ۇلەس قوسىپ كەلەدى.
«جەڭىس وڭاي كەلمەيدى. ولجالى بولۋ ءۇشىن كوپ ەڭبەك ەتىپ, تەر توگۋ كەرەك. بىردە قوستانايدا ۇقك اراسىندا سپارتاكيادا ءوتىپ, فينالدا قولىمنان جاراقات الىپ, ەكىنشى ورىنعا تابان تىرەدىم. اراعا ءبىر اي سالىپ ەكىنشى جارىس بولدى. قولىم تولىق جازىلماي جاتىپ جارىس الاڭىنا شىقتىم. باستاپقىدا اۋىرىپ تۇرعان قولىممەن جەڭىسكە جەتۋ قيىن سەكىلدى كورىندى. بىراق ەسەمدى قايتاردىم. تاعى ءبىر جولى سارباز بولىپ جۇرگەندە قارۋ اتۋدان جارىس ءوتتى. نىساناعا كوزدەپ اتۋدان بىرنەشە رەت ءمۇلت كەتتىم. جاتتىقتىرۋشىمنىڭ ماعان دەگەن سەنىمىن اقتاي الماعانىما قاتتى ۇيالدىم. سول كۇنى تۇنىمەن كوز ىلمەي شىققان شىعارمىن. تاڭعى بەستەن تۇرىپ كەلەسى كەدەرگىدەن ءوتۋ جارىسىنا دايىندالدىم. ساعات توعىزدا ستارت بولۋ كەرەك. تاڭەرتەڭ جاتتىقتىرۋشى مەنى ورنىمنان تاپپاي قالادى. سونداعى ءبىرىنشى ويىنا كەلگەنى ء«وز ەركىمەن بولىمشەنى تاستاپ قاشىپ كەتتى» بولعان عوي. ال سىرتقا شىقسا مەن جارىسقا ساقاداي ساي تۇرعانىمدى كورىپ قاتقان قازىقتاي سىلەيىپ تۇرىپ قالدى. سول جارىستا سپورتتىڭ ءۇش تۇرىنەن جەڭىمپاز اتانعانىم ەسىمدە», دەيدى ول.
ءومىر بولعان سوڭ جەڭىس پەن جەڭىلىس قاتار ءجۇرۋى – زاڭدىلىق. سپورتتا دا باپ پەن باقتىڭ ۇنەمى ۇيلەسىم تابا بەرمەيتىنى تاعى بار. بىراق ساياندى جەڭىلىس جىگەرلەندىرىپ, ادىلەتسىز شەشىم شەشۋشى ساتتە كۇش بەرەتىندەي. سەبەبى ونىڭ قابىلەت-قارىمىنا كۇدىك ارتىپ, جارىس جولىنان سەبەپسىز شىعارىپ سالعان ساتتەردە سپورتقا دەگەن ادالدىعى ۇنەمى العا سۇيرەيتىنىن ايتادى. ماسەلەن, فۋتبولدان قۇراما مۇشەلىگىنە وتكىزبەي, جىگەرىن جاسىتقىسى كەلگەندەر دە سپورتشىنىڭ ساعىن سىندىرا الماعان سەكىلدى. ءبىر جولى كۇشتىك قۇرىلىم اراسىندا فۋتبولدان جارىس ءوتىپ, سايان قوسالقى قۇرامعا الىنادى. كوماندالاستارى قارسىلاستارىنان ۇپايمەن جەڭىلىس تاۋىپ جاتادى. جاتتىقتىرۋشى شارشاعان سپورتشىنىڭ ورنىنا الاڭعا ونى جىبەرەدى.
«بابىم كەلىستى مە, باعىم جاندى ما بىلمەيمىن, كوماندالاستارىمنىڭ ەسەبىنە ەكى گول سالىپ, جەڭىس تۋىنىڭ جەلبىرەۋىنە سەبەپشى بولعانىم بار. «دينامونىڭ» فۋتبول كوماندالارى اراسىندا وتكەن جارىستا 16 گول سالىپ, «ۇزدىك ويىنشى» دا اتاندىم. ال قازىر ارناۋلى ماقساتتاعى باسقارمادا شاكىرت تاربيەلەپ, ءارتۇرلى جارىستارعا قاتىستىرىپ ءجۇرمىز. شەكاراشى ءۇشىن سپورت تەك ويىن ەمەس, كۇندەلىكتى جاتتىعۋعا اينالۋ كەرەك. ويتكەنى قاۋىپتىڭ الدىن الۋ ءۇشىن دەنە دايىندىعى مىعىم بولعانى دۇرىس. اسىرەسە كۇشتىك قۇرىلىمنىڭ ىشىندەگى ارناۋلى ماقساتتاعى بولىمشەگە ارتىلار جۇك ەكى ەسە», دەيدى سايان سەرىك ۇلى.
سەنىم مەن جىگەر, ەڭبەك پەن قۇلشىنىس ارقىلى سپورتشى جەتكەن جەتىستىك جەتەرلىك. سونىڭ ىشىندە وزبەكستاننىڭ 5 دۇركىن چەمپيونى, ەكى دۇركىن وليمپيادا ويىندارىنىڭ چەمپيونى, قويان-قولتىق ۇرىستان تمد-نىڭ بىرنەشە دۇركىن جەڭىمپازى, ودەسساداعى حالىقارالىق ءتۋرنيردىڭ جۇلدەگەرى سەكىلدى ماراپاتتارىن ەرەكشە ايتىپ وتكەن ابزال. بۇل عانا ەمەس, سايان – «اسكەر» فۋتبول كلۋبىنىڭ نەگىزىن قالاۋشىسى.
قويان-قولتىق ۇرىس, اسكەري ترياتلون, وق اتۋدىڭ ءۇش تۇرىنەن سپورت شەبەرى اتانعان ول – وتانىنا بەرىك, انتىنا ادال, وتباسىندا ءتورت بالا تاربيەلەپ وتىرعان ۇلگىلى اكە. ومىرلىك جارى دا شەكارا قىزمەتىندە ەل تىنىشتىعى كۇزەتىندە قالتقىسىز قىزمەت ەتىپ كەلەدى. «اكە كورگەن وق جونار» دەگەندەي, تۇڭعىشى الىبەك تە سپورتقا اۋەس. اناسى مەن اكەسىنەن كورگەنى كوپ بالا كىشكەنتاي كۇنىنەن تاڭمەن تالاسا اسكەري دابىل سوعىلعاندا سارباز بولىپ, ءتۇرلى جارىسقا دا ىلەسە بارادى ەكەن. بيىل اتا-اناسىنىڭ جولىن جالعاۋدى ماقسات تۇتقان ۇلى دا 8-سىنىپتان سوڭ «ارىستان» مەكتەبىنە وقۋعا تۇسكەن. ۇلىنىڭ تاڭداۋىن اكەسى دە ارقاشان قولدايتىنىن ايتادى. ويتكەنى وتاندى قورعاۋ – ەر جىگىت ءۇشىن قاسيەتتى پارىز, قاستەرلى بورىش.
