ارقايسىمىز ۇلەس قوسساق, الىنبايتىن اسۋ جوق

ەلباسى نۇرسۇلتان نازارباەۆتىڭ اتىنا قۇرمانعازى اتىنداعى قازاق ۇلتتىق كونسەرۆاتورياسىنىڭ ستۋدەنتى راحات-بي ابدىساعىننان حات كەلدى, دەپ حابارلادى پرەزيدەنتتىڭ ءباسپاسوز قىزمەتى. اۆتور ءوز حاتىندا كلاسسيكالىق مۋزىكامەن كاسىبي تۇرعىدا اينالىساتىنىن جانە وسى 16 جاسىنا دەيىن بىرقاتار شىعارمالاردىڭ اۆتورلىق قۇقىعىنا يە بولعانىن ايتادى. ر.ابدىساعىن وتانىنا دەگەن ماحابباتىن فورتەپيانو مەن سيمفونيالىق وركەسترگە ارنالعان «قازاق راپسودياسى» اتتى مۋزىكالىق تۋىندىسى ارقىلى جەتكىزگەن. «وندا مەنىڭ زاماناۋي قازاقستاندى قالاي قابىلدايتىنىم, ونىڭ قارقىندى دامۋىن سەزىنۋىم كورىنىس تاپقان. مەن ءوز سەزىمدەرىمدى اركىمگە تۇسىنىكتى دىبىستىق مۋزىكالىق بەلگىلەر ارقىلى بەرۋگە تىرىستىم», – دەپ جازادى كونسەرۆاتوريا ستۋدەنتى. اۆتور قازىرگى ۋاقىتتا الەمنىڭ ءتۇرلى حالىقتارى داستۇرلەرىنىڭ بەلسەندى تۇردە كىرىگۋ ءۇردىسى بايقالىپ وتىرعانىنا توقتالادى. «الەمدىك مادەنيەتتە وزگەلەردىڭ اراسىندا ءبىزدىڭ ەلىمىزدىڭ, ءبىزدىڭ حالقىمىزدىڭ مادەنيەتىنىڭ ەڭ جاقسى قىرلارى ايقىن كورىنگەنى وتە ماڭىزدى!», – دەلىنگەن حاتتا. سونداي-اق, ەلدىڭ تاعدىرى ونىڭ كوشباسشىسىنىڭ تاعدىرىمەن تىكەلەي بايلانىستى ەكەنى دە ايتىلعان. «ءبىزدىڭ ارقايسىمىز, قازاقستان ازاماتتارى, مەملەكەت باسشىسى جاريالاعان باعدارلامانى دامىتا وتىرىپ, ءوزىمىز بەلسەنە ارالاساتىن سالادا قوماقتى ۇلەس قوسۋعا ءتيىسپىز», – دەپ جازادى حات يەسى. سوڭىندا ر.ابدىساعىن مەملەكەت باسشىسى جاريالاعان «قازاقستان-2050» ستراتەگياسى ەلدىڭ بارشا ازاماتتارىنىڭ اتسالىسۋىمەن تابىستى جۇزەگە اسىرىلاتىنىنا سەنىم بىلدىرگەن.