م.اشىمباەۆ سپورتشىلارعا ءىلتيپات ءبىلدىرىپ, جىل وتكەن سايىن بوچچادان وتەتىن جارىستارعا دايىندىق دەڭگەيى, وعان قاتىساتىن قاتىسۋشىلار قاتارى جانە قولداۋ كورسەتەتىن جانكۇيەرلەر سانى ارتىپ كەلە جاتقانىن اتاپ ءوتتى. مەملەكەت باسشىسى ينكليۋزيۆتى قوعام قۇرۋ, ساپالى ءبىلىم مەن سپورتتىڭ بارشاعا بىردەي قولجەتىمدى بولۋىن قامتاماسىز ەتۋ ماسەلەلەرىنە ادىلەتتى قازاقستاننىڭ اجىراماس بولشەگى رەتىندە باسا ءمان بەرىپ وتىر.
«پرەزيدەنتىمىز قاسىم-جومارت توقاەۆ ادىلەتتى قازاقستان قۇرۋ جانە تەڭ مۇمكىندىكتەر قوعامىن قالىپتاستىرۋ باستى مىندەت ەكەنىن ۇنەمى ايتىپ كەلەدى. وسى رەتتە بوچچانى دامىتۋ ينكليۋزيا مادەنيەتىن قالىپتاستىرۋدىڭ, قوعامدا ىنتىماقتاستىق, بىرلىك, ءوزارا كومەك سياقتى قۇندىلىقتاردى ورنىقتىرۋدىڭ وزىق ۇلگىسى ەكەنى ءسوزسىز. قازىرگى تاڭدا ەلىمىزدە بوچچانىڭ قارقىندى دامىپ, بالالار مەن ەرەسەكتەردىڭ وسى سپورت تۇرىنە دەگەن قىزىعۋشىلىعى ارتىپ كەلە جاتقانىن كورىپ وتىرمىز. كەيىنگى جىلدىڭ وزىندە بوچچا ۇيىرمەلەرىنە كەلۋشىلەر قاتارى 20 پايىزعا كوبەيدى. اتالعان سپورتتىڭ اۋقىمى دا ءاردايىم كەڭەيىپ كەلەدى. بۇل جولى جارىسقا 14 وڭىردەن كەلگەن سپورتشىلار قاتىستى. الداعى ۋاقىتتا وسىنداي سايىستارعا ەلىمىزدىڭ بارلىق وڭىرىنەن سپورتشىلار كەلەدى دەپ سەنەمىن», دەدى م.اشىمباەۆ.
سونىمەن قاتار ول بۇگىندە فەدەراتسيا تاراپىنان بوچچانى ودان ءارى دامىتۋ ءۇشىن بارلىق باعىتتا جۇيەلى جۇمىس جۇرگىزىلىپ كەلە جاتقانىن تىلگە تيەك ەتتى. بۇل رەتتە وڭىرلەردە فيليال اشۋ, جاتتىقتىرۋشىلاردىڭ بىلىكتىلىگىن ارتتىرۋ سياقتى ىستەردىڭ ماڭىزى زور. بەكىتىلگەن ەرەجەلەرگە سايكەس 19 جاتتىقتىرۋشى مەن 3 تورەشى اتتەستاتتاۋدان وتكىزىلدى. وسىنداي ىرگەلى جۇمىس ارقىلى سپورتشىلار حالىقارالىق جارىستاردا دا جوعارى ناتيجەلەر كورسەتىپ ءجۇر.
«پاريجدە وتكەن پاراليمپيادا ويىندارىندا وتاندىق سپورتشىلار ماڭىزدى جەتىستىكتەرگە قول جەتكىزدى. كەلەسى ويىنداردا بوچچادان قازاقستان قۇراماسى دا جولداما الادى دەپ سەنەمىز. فەدەراتسيا وسى ماقساتقا جەتۋ ءۇشىن بار كۇش-جىگەرىن جۇمسايدى. سىزدەر وزدەرىڭىزدىڭ قاجىر-قايراتتارىڭىزبەن وزگەلەرگە ۇلگى بولىپ, بارشامىزدى قاناتتاندىرىپ, مۇمكىن ەمەس نارسە جوق ەكەنىن دالەلدەپ كەلەسىزدەر», – دەپ م.اشىمباەۆ جارىستىڭ وتۋىنە اتسالىسقان ەرىكتىلەر – دەنە شىنىقتىرۋ جانە بۇقارالىق سپورت اكادەمياسىنىڭ ستۋدەنتتەرىنە, سونداي-اق ۇلەس قوسقان بارشا ازاماتقا العىس ءبىلدىردى.
بوچچادان قازاقستان كۋبوگى جولىنداعى سايىستىڭ ناتيجەسىندە ەرەسەكتەر مەن جاسوسپىرىمدەر اراسىندا ءتورت دارەجە بويىنشا جەڭىمپازدار انىقتالىپ, ماراپاتتالدى. جالپىكوماندالىق ەسەپتە استانا قالاسىنىڭ كومانداسى جەڭىسكە جەتتى. ەكىنشى ورىن الماتى قالاسىنان كەلگەن ۇجىمعا بۇيىرسا, ۇزدىك ۇشتىكتى پاۆلودار وبلىسىنىڭ سپورتشىلارى تۇيىندەدى.
