سۋرەتتى تۇسىرگەن – قايىربەك ساريەۆ
ەلىمىزدىڭ سۋ رەسۋرستارى جانە يرريگاتسيا مينيسترلىگىنە قاراستى «قازسۋشار» اتتى رەسپۋبليكالىق مەكەمە بار. وسى «قازسۋشار» رمك-ءنىڭ باتىس قازاقستان وبلىستىق فيليالى مەملەكەتارالىق ماڭىزى بار قاراوزەن مەن سارىوزەندەگى سۋ شارۋاشىلىعى نىساندارىن, جانىبەك سۋارۋ-سۋلاندىرۋ جۇيەسىن, وبلىسارالىق ماڭىزداعى جايىق-كوشىم سۋلاندىرۋ-سۋارۋ جۇيەسى مەن شاعان وزەنىندەگى شاعان سۋ قويماسىن, شولاقاڭقاتى وزەنىندەگى شولاقاڭقاتى, ەمبۋلاتوۆكا وزەنىندەگى, سۇلۋساي سۋ قويمالارىن پايدالانىپ, قاداعالاپ وتىرادى.
وسىلايشا, وبلىستىڭ سۋارۋ-سۋلاندىرۋ جۇيەسىنىڭ قۇرامىنا جالپى كولەمى 510 ملن تەكشە مەتر سۋ جيناي الاتىن ون ءتورت سۋ قويماسى كىرەدى. ولار – ءتورت سۋ تورابى, ەكى سورعى ستانساسى, 1 057,66 شاقىرىمعا سوزىلاتىن ماگيسترالدى, تاراتۋشى كانالدار, كولمەك پەن تۇراقتى سۋلاندىرۋ ۋچاسكەلەرى.
– سۋ تاسقىنى كەزىندە ءبىز بارىنشا سۋدى ساقتاپ قالۋعا تىرىستىق. فيليالدىڭ سۋ شارۋاشىلىعى جۇيەلەرىنەن 1,087 ملرد تەكشە مەتر سۋ الىندى. سونىڭ ناتيجەسىندە 146 مىڭ گا جەرگە سۋ شىعارىلدى, كوشىم وزەنىنىڭ تومەنگى اعىسىندا ورنالاسقان كولدەرگە, قامىس, سامار جايىلمالارىنا سۋ بەرىلدى. سۋ قويمالارى جوبالىق بەلگىلەرگە دەيىن تولتىرىلدى, – دەيدى «قازسۋشار» رمك باتىس قازاقستان فيليالى ديرەكتورىنىڭ مىندەتىن اتقارۋشى راۋان حۇسايىنوۆ.
مامانداردىڭ ايتۋىنشا, وڭىردە ۆەگەتاتسيالىق كەزەڭ ءساتتى وتكەن. اۋىل شارۋاشىلىعى تاۋارىن وندىرۋشىلەرگە تولىق كولەمدە سۋارمالى سۋ بەرىلگەن. وتكەن 9 ايدىڭ قورىتىندىسىندا كورسەتىلگەن قىزمەت كولەمى جوسپارعا سايكەس كەلىپ تۇر. قازىردىڭ وزىندە جىلدىق جوسپاردىڭ ورىندالۋى 99,1% بولعان.
– ءبىز كۇزگى-قىسقى كەزەڭدە جانىبەك, بوكەي ورداسى, بايتەرەك, تاسقالا, اقجايىق, قازتالوۆ, جاڭاقالا اۋداندارىنىڭ ەلدى مەكەندەرىندە قولايلى سانيتارلىق-ەكولوگيالىق جاعداي جاساپ, مال سۋاتىن ۇيىمداستىرۋعا مۇمكىندىك بەرىپ وتىرمىز. وسى كۇنگە دەيىن سانيتارلىق-ەكولوگيالىق ماقساتتارعا 90,0 ملن تەكشە مەتر سۋ بەرىلدى. جىل قورىتىندىسىندا سۋ بەرۋ جوسپارى تولىق ورىندالادى, – دەيدى راۋان ەرلان ۇلى.
فيليالدىڭ قىزمەت كورسەتۋ ايماعىندا 6091 گا ناقتى سۋارمالى القاپ بار. بيىلعى 9 ايدا سۋ تۇتىنۋشىلارىمەن ارادا 271 كەلىسىمشارت جاسالعان ەكەن. سونداي-اق وبلىستىڭ وڭتۇستىك اۋداندارىندا تۇراقتى سانيتارلىق-ەكولوگيالىق جاعدايدى ساقتاۋ ماقساتىندا جىل سايىن شارتتىق نەگىزدە ەدىل سۋى بەرىلەدى. بۇگىندە 133,0 ملن تەكشە مەتر سۋ الىنىپ, تولىق كولەمدە اياقتالعان. سونىڭ ىشىندە رەسەي فەدەراتسياسىنىڭ ساراتوۆ كانالىنان باتىس قازاقستان وبلىسىنداعى قاراوزەن مەن سارىوزەنگە 105,0 ملن تەكشە مەتر سۋ, پاللاسوۆ جۇيەسىنەن جانىبەك سۋارمالاۋ-سۋلاندىرۋ جۇيەسىنە 28,0 ملن تەكشە مەتر سۋ بەرىلگەن. ساراپشىلار الداعى جىلى دا سۋ مول بولادى دەگەن بولجام ايتىپ وتىر. ءبىز كەلەر جىلعى كوكتەمگى سۋ تاسقىنىن قارسى الۋعا دايىنبىز با؟
– كەلەسى سۋ تاسقىنىن وتكىزۋگە دايىن تۇرۋى ءۇشىن 24-28 قازان ارالىعىندا شاعان سۋ قويماسىنىڭ قاشىرتقى يماراتىنىڭ بارلىق شاندورى كەزەڭ-كەزەڭىمەن كوتەرىلىپ, جوعارى بەكىتىلدى. سۋ قويماسى پايدالانىلمايتىن كولەمگە دەيىن بوساتىلىپ, قىسقى جۇمىس رەجىمىنە اۋىستىرىلدى, – دەيدى راۋان ەرلان ۇلى.
سونىمەن قاتار شولاقاڭقاتى, ەمبۋلاتوۆكا, سۇلۋساي وزەندەرىندەگى سۋ قويمالارى دا سۋ تاسقىنىن اپاتسىز وتكىزۋ ماقساتىندا بوساتىلىپ, قىسقى جۇمىس رەجىمىنە اۋىستىرىلعان.
سۋ رەسۋرستارىن تاسىمالداۋ كەزىندەگى شىعىنداردى ازايتۋ, سۋدى ۇتىمدى, ءتيىمدى پايدالانۋ, سۋ شارۋاشىلىعى نىساندارىن قالىپتى تەحنيكالىق جاي-كۇيدە ۇستاۋ, سۋ تاسقىنىن اپاتسىز وتكىزۋگە دايىنداۋ ماقساتىندا جىل سايىن فيليالدىڭ ءوز كۇشىمەن سۋ شارۋاشىلىعى نىساندارىندا مەحانيكالاندىرىلعان تازارتۋ, اعىمداعى جوندەۋ جۇمىستارى جۇرگىزىلەدى. بيىل ۇزىندىعى 73,6 شاقىرىمدىق كانالداردى تازارتۋ, 8 نىساندا جاي جوندەۋ جۇمىسى اياقتالعان. سۋ تاسقىنىنان كەيىن 6 نىساندا قالپىنا كەلتىرۋ جۇمىسى جۇرگىزىلگەن. بۇل باعىتتاعى جۇمىس جالعاسادى.
راۋان ەرلان ۇلىنىڭ ايتۋىنا قاراعاندا, بۇگىندە كيروۆ سۋ قويماسىن قايتا جاڭعىرتۋ, شاعان وزەنى تارماعى مەن كوشىم ماگيسترالدىق كانالىن مەحانيكالاندىرىلعان تازارتۋ جونىندەگى جوبالار ىسكە اسىرىلىپ جاتىر. سونىمەن بىرگە جايىق-كوشىم جۇيەسى سۋ قويمالارىنىڭ كاسكادىن, جانىبەك سۋلاندىرۋ-سۋارمالاۋ جۇيەسىن, 7 ماگيسترالدىق كانالدى قايتا جاڭعىرتۋ جونىندە جوبالىق-سمەتالىق قۇجاتتاما ازىرلەۋ جۇمىسى ءجۇرىپ جاتىر.
تاعى ءبىر جاعىمدى جاڭالىق – تاسقىن سۋدى جيناپ الۋ, سۋ قويمالارىنىڭ كولەمىن ۇلعايتۋ ماقساتىندا جالپاقتال اۋلىندا سۋ جيناۋ كولەمى 28,0 ملن تەكشە مەتر بولاتىن سۋ قويماسىن سالۋ جوسپارلانعان. بۇگىندە جوبالاۋ-سمەتالىق قۇجاتتاما مەملەكەتتىك ساراپتامادان ءوتىپ جاتىر. سونداي-اق قازتالوۆ اۋدانىنىڭ سەكسەنباي اۋلىندا سۋ جيناۋ كولەمى 10,0 ملن تەكشە مەتر بولاتىن سۋ قويماسىن سالۋ جوسپارلانىپ, تەحنيكالىق-ەكونوميكالىق نەگىزدەمە ازىرلەنۋ ۇستىندە. بيىل قايتا جاڭعىرتۋ جۇمىسىن جۇرگىزۋ ماقساتىندا جايىقباي سۋلاندىرۋ كانالى دايىن جوبالىق-سمەتالىق قۇجاتتاماسىمەن كوممۋنالدىق مەنشىكتەن رەسپۋبليكالىق مەنشىككە بەرىلگەن.
– ءبىز وڭىردەگى بارلىق سۋ شارۋاشىلىعى نىسانىنىڭ كۇزگى-قىسقى كەزەڭگە دايىندىعىن تەكسەرىپ شىقتىق. بارلىق نىسان قاناعاتتانارلىق جاعدايدا, قالىپتى رەجىمدە جۇمىس ىستەپ تۇر. دايىندىق تولقۇجاتتارى جاساقتالعان, – دەيدى فيليال باسشىسى.
باتىس قازاقستان وبلىسى
