قازاقستاندا مۇگەدەك بالالار كوبەيدى - مينيستر

ۇكىمەت وتىرىسىندا پرەمەر-مينيستر ولجاس بەكتەنوۆ دەنساۋلىق ساقتاۋ مينيسترلىگىنىڭ باسشىسىنا «ەلىمىزدە مۇگەدەك بالالار كوبەيدى, ونىڭ سەبەبى نەدە جانە ءبىز نە ىستەي الامىز؟» دەپ سۇرادى.

سۇراققا جاۋاپ بەرگەن مينيستر سوڭعى ءۇش جىلدا شىنىمەن دە بالالار اراسىندا مۇگەدەكتىكتىڭ ارتقانىن راستادى. 

«سوڭعى ءۇش جىلدا بالالار اراسىنداعى مۇگەدەكتىك 11 پايىزعا ارتتى. تۋا بىتكەن پاتولوگيالاردى ەرتە انىقتاۋ ماقساتىندا وسى جىلدىڭ 1 ناۋرىزىنان باستاپ 10 وڭىردە 23 مىڭ ايەلگە تەگىن تەكسەرۋ جۇرگىزىلدى. ءبىز بۇل جۇمىستى قالعان ايماقتاردا دا اتقارامىز», دەدى اقمارال ءالنازاروۆا.

بۇل رەتتە دەنساۋلىق ساقتاۋ ءمينيسترى ءوز بايانداماسىندا جاڭا تۋعان نارەستەلەر مەن التى جاسقا دەيىنگى بالالارداعى مۇگەدەكتىك قاۋپىن ەرتە انىقتاۋ ءۇشىن سكرينينگتىڭ ءتورت ءتۇرى جۇرگىزىلەتىنىن اتاپ ءوتتى:

• نەوناتالدىق – بۇل جاڭا تۋعان نارەستەلەرگە تۇقىم قۋالايتىن اۋرۋلاردى انىقتاۋ مەن دياگنوستيكالاۋ, ەمدەۋ ءۇشىن جاسالادى (وسى جىلدىڭ 9 ايىندا 256 مىڭنان استام جاڭا تۋعان نارەستە (98 پايىز) قامتىلدى, 17 نارەستەدە فەنيلكەتونۋريا, 3100 جاڭا تۋعان نارەستەدە تۋا بىتكەن گيپوتيرەوز انىقتالدى);
• اۋديولوگيالىق – ەستۋ قابىلەتىنىڭ بۇزىلۋىن انىقتاۋ (جاڭا تۋعان نارەستەلەردىڭ 96,3 پايىزى جانە 1 جاستان 6 جاسقا دەيىنگى بالالاردىڭ 55 پايىزى قامتىلعان);
• وفتالمولوگيالىق – شالا تۋىلعان نارەستەلەردەگى رەتينوپاتيانى انىقتاۋ (شالا تۋىلعان نارەستەلەر 5590 (99,2 پايىز) قامتىلدى, ونىڭ ىشىندە 388 شالا تۋعان نارەستە (37,4 پايىز) كورسەتكىشتەرى بويىنشا حيرۋرگيالىق ەمدەۋدەن ءوتتى);
• پسيحوفيزيكالىق – جاڭا تۋىلعان نارەستەلەر مەن 5 جاسقا دەيىنگى بالالارداعى پسيحوفيزيكالىق دامۋ بۇزىلىستارىن انىقتاۋ (وبەكتىلەردىڭ جالپى سانىنان بالالاردىڭ 92 پايىزى (1 732 426) قامتىلدى).